少年成長今日: 0|主題: 16130

收藏本版

回覆發帖

返回列表

跳至頁

查看: 34961 | 回覆: 4

加仔女IG [複製鏈接]

csir3290

子爵府

積分: 12776

1^#

發表於 26-2-8 13:14 |只看該作者 |正序瀏覽 |打印

早兩日食晏同個同事傾開，佢話佢見到佢個仔成日睇社交平台，所以最近佢都開咗個ig戶口，睇下係咪咁多嘢睇，但佢講其實最主要嘅原因都係想了解佢個仔究竟係ig平台上面究竟講啲乜嘢！但佢個仔就點都唔肯畀佢follow，所以佢根本唔知道個仔都幾係ig度會講啲乜嘢同有啲乜嘢朋友。佢都已經問過個仔兩次，但個仔都係唔肯加佢，而且佢都感覺到個仔唔鍾意，所以佢都唔想再問，費事令到個仔同佢有啲乜嘢磨擦。因此佢嗰日其實係問我好唔好另開一個戶口，用張後生仔嘅相等佢個仔唔知道係佢老豆嘅戶口，然後就肯加佢，用呢個戶口就可以睇到個仔識啲咩人同埋講啲咩嘢。我聽完佢講之後第一句就係問佢點解你咁想知你個仔係ig度睇啲乜嘢同埋識啲乜嘢人呢？佢話成日見到佢個仔睇ig，好想知道佢有乜嘢咁多嘢睇，同埋佢又擔心佢畀人呃。咁我第二個問題就係問佢，就算當你用咗第二個戶口而你個仔又真係加咗你，如果你見到你個仔講啲你覺得唔應該講嘅嘢，咁你會有乜嘢反應呢？你係咪會即刻出聲或者會同個仔講，咁係咪又會畀個仔知道你用第二個戶口嚟監察佢呢！咁會唔會令到你個仔更加反感，而更重要嘅係你呢個方法用咗一次，我當你成功咗，但咁仲會唔會有第二次呢？而且為且避開你嘅監察，佢會唔會自己又開個另外一個戶口呢！到時你兩父子嘅關係咪仲會因ig戶口嘅問題搞到差錯，咁又何必呢！而且，如果要透過ig先至知道自己嘅仔諗乜嘢，咁會唔會你同個仔嘅溝通都好嘅都好有問題呢？所以先解決嘅唔係ig嘅戶口，反而係你兩個溝通問題。
我相信好多父母都曾經遇過呢個問題，係呢一個資訊發達嘅年代，社交平台充斥，好多家長都想喺社交平台入面加咗自己嘅仔女，美其名係多啲溝通，其實就係想監察佢哋喺社交平台上嘅一舉一動。首先我自己就覺得社交平台都係屬於個人嘅私人地方，就算自己仔女都係一樣，佢都有自己嘅私隱，佢都有自己嘅朋友，佢有自己想講嘅嘢，我哋點解要有咁多監察呢！而且如果我哋要靠睇仔女嘅社交平台先至能夠解到仔女嘅一舉一動，咁其實親子之間嘅關係係咪都出現咗一個好大嘅問題呢！好似我自己咁，我就好相信自己教仔女嘅方法，我亦都信任仔女喺社交平台上面都會有自己嘅分寸！況且教細路仔用社交平台應有嘅態度，應該由細就開始由家長教育。

我自己一早就已經有自己嘅社交平台，而且間唔中都會係自己嘅社交平台度出吓post，所以反而到我自己對仔女開始用社交平台嘅時候，係佢哋主動要我加佢哋落去，因為係佢哋想睇我同老婆究竟社交平台出啲乜嘢，所以就自然加咗對方做朋友。但我都要記住一樣嘢，就係雖然大家都睇到對方嘅社交平台，但係都唔會批評對方所出嘅post。反而有陣時如果有啲嘢我覺得需要啲細路仔注意嘅話，我就會借啲意利用睇到其他人嘅post，嚟同佢哋傾吓，從中提醒下佢哋有啲乜嘢要注意，正正因為係其他人嘅post，唔關佢哋事，所以佢哋反而會樂意同我哋去傾，分享大家嘅睇法。

總之我自己嘅宗旨就係社交平台都係人哋嘅私隱，做家長千祈唔好過份幹涉，指指點點，諸多批評。尤其係對青春期嘅仔女，更加係一個大忌。如果唔係好地地一個社交平台反而會變成破壊大家關係嘅平台！