少年成長 今日: 1|主題: 16114

首先我要高度讚揚你嘅愛心同毅力，揍小朋友唔易，揍一個唔係自己所出嘅細路更難，佢乖唔乖當然關鍵，但遇上困難時，難免會覺得自己只係執人首尾，極易有放棄念頭，既然你選擇堅持，我哋會祝福同支持!!!

喺落手落腳教個小朋友之前，你先要攪清楚你喺呢個家嘅地位同得到男友嘅全力支持，你要同個男人講清楚，假如佢係想你成為佢老婆同個仔嘅媽咪，佢就要認認真真咁同佢父毋講一次，唔係求其hea講兩句，而係講到明要尊重你教嘅方法，當然你正式成為佢老婆係會易d處理，起碼有個post，人哋唔會當你freelance看待，亦都唔可以心諗或口講：你係乜水，關你乜事。

而另一個要解決嘅係分俾小朋友嘅時間太少，我明白大家要搵食，但根據你所形容嘅男孩，佢係極度缺乏安全感同好難相信人，連出去見倒其他小朋友都唔敢同人玩, 佢跟本成日都係自己一個人，斷估爺爺嫲嫲唔會識同佢玩，所以佢好黐會同佢玩嘅你，佢weekend不停打俾你叫你哋過去，係因為佢等咗成個禮拜真係好想同你哋去玩，而佢嘅衰態度係完全因為無人教佢同就慣佢，佢以為靠惡就解決倒問題 (起碼爺爺嫲嫲會就範)。既然你知佢咁在意你哋過唔過去，最好就佢每次一衰態度你哋就完全唔睬佢，直頭當見佢唔倒，直至佢好聲好氣say sorry，如果仲係咁嘅就同佢講weekend唔會見佢，一定要言出必行!!!! cut你線就打返去同佢講： 因為你cut我線，我好唔開心，你可唔可以同我say sorry，如果唔係我weekend唔會見你，又係一定要言出必行同全程態度認真，但唔駛惡，唔好鬧。
當然啦，有罰都要有賞，例如一星期儲咗三次乖，weekend就可以實現佢一個願望，但盡量唔好淨係同佢去買份玩具就算，佢如果真係想要玩具，你就同佢一齊整一d出嚟，信我，你哋大家都一定會開心好多，小朋友會更加感覺你愛佢，佢亦會更愛你。

其實平日你返工有時夜返屋企都未必見倒佢，希望你每日都盡量抽時間打幾次俾佢，問吓佢做緊乜，關心吓佢，又話吓俾佢知你做緊乜，叫佢有乜心事唔開心就講你知，你亦可以同佢分享，建立你同佢之間嘅秘密，令佢學習關心別人。

有時你嫌小朋友煩，越避佢佢越要引你主意，佢越發脾氣你越冷靜，喺佢平靜之前都唔駛同佢講嘢，因為你要俾佢知道發脾氣同喊係無用，你亦唔驚佢發脾氣同喊，無論係幾時同喺邊度都由得佢，(就算喺街你都唔可以怕尷尬!!!!) 佢見臺戲無人睇，好快就收檔，如果你堅持，一個月內會有好明顯嘅改善。

明白就算你男友點支持你，都唔夠日日揍嘅爺爺嫲嫲鬥，但你哋交得俾兩老照顧，真心唔好諗住改變佢哋要完全跟你方法，最多要求互相尊重，喺你教緊小朋友時，對方唔好出聲，心痛嘅就行開一陣，呢d就請你男友幫手。


路好漫長，你要加油。


小朋友遇上你係佢嘅福。