夫婦情感今日: 0|主題: 42771

收藏本版

發帖

返回列表

跳至頁

查看: 80104 | 回覆: 555

我與Bruce Wayne的大鑊婚禮（完，多謝）

[複製鏈接]

12 3 4 5...28

426

oguh

子爵府

積分: 11575

1^#

發表於 12-7-31 15:15 |只看該作者 |正序瀏覽 |打印

本帖最後由 oguh 於 12-8-1 21:51 編輯

之前寫下寫下，寫晒成個相愛的崎嶇過程，多謝大家支持：
http://www.baby-kingdom.com/forum.php?mod=viewthread&tid=5352122&extra=&page=1

去到呢個地步，我就寫埋我地既婚禮。如果無睇之前個post既JM，我係度人物簡介一下：

我C6係英國人，年少得志，好後生就有自己事業，從前爛玩花心做盡所有衰野，「自大高傲，招招積積，嬉皮笑臉，認屎認屁，享樂專家，鍾意揸住架名貴跑車招搖過市，又鍾意炫耀自己做野點點點叻。對其他人有時把口又勁賤，成日以串人為樂，真係好乞人憎。」但其實「內心非常柔軟，非常脆弱，同埋佢脾氣雖臭，心地非常善良」。

佢不滿我係forum叫佢C6，要我係我地故事中強調佢係Batman Christian Bale咁靚仔，同埋再三叮囑我，叫我寫得佢「高大英俊，有型靚仔，有才華有智慧有品味」，所以我以下叫他作Bruce為藝名。記住，呢個係佢自己一箱情願，佢同人地大名星無一忽係似。

第一節：

我同Bruce經歷左咁多，終於去到要計劃婚禮呢一步。

之前已有協議，佢婚後來港定居，由決定落實之後，佢努力學習中文，佢既中文老師，就係我。我買左大量幼兒中文習作比佢，教佢識字、寫字，我以為慢慢教，就無問題，點知以佢既資質，寫兩寫，講兩講，就掟筆發脾氣，話：「呢D都唔係人學既野來既！咁難！」佢只係分到「大」同「天」，但見到「人」同「入」，佢話簡直係痴線。

但次次佢發完癲之後，佢股牛脾氣，又好唔甘心放棄認輸，好勝既佢又會自己死死氣繼續拿著本習作寫寫寫，又問我呢個字點讀，果個字點解。我一直盡我所能教佢、答佢問題；每一日，我都開始同佢講廣東話，開頭佢真係想發癲，有時仲話我特登講得快玩佢，其實係佢自己聽唔到。有時我返香港，我以為佢放監啦，唔洗再練中文，之後見返面，佢示範比我睇佢識寫乜乜乜字，巴閉要人讚。同埋佢開始睇大量港產片，佢最鍾意，都係老外鍾意果D動作片、功夫片，李小龍、成龍既戲佢以前一早睇晒，我買李連杰黃飛鴻系列比佢，英雄本色佢讚到誇啦啦，又鍾意埋周潤發，又叫我買佢其他戲比佢睇，結果佢鍾意賭神，秋天的童話佢話悶到暈，果然係無來浪漫。周星馳佢都鍾意，話有D似80年代某D荷里活搞笑片，但好多佢都唔係好明，明D唔明D咁睇。

佢咁努力學中文，除左佢想日後香港生活，仲想係婚禮前，用中文好好同我家人溝通。佢話我，你母語係廣東話，但你又識普通話、英文同法文，令佢覺得自己好低能。同埋佢覺得大爺佢應該比我叻，無理由我可以兩文三語，而佢只係識一種語言。

佢努友學習我既語言同文化，令我覺得佢比人其他人成功既因素係，佢真係決定左就唔容易放棄，咩都要做到為止。

回正題，計劃婚禮第一步，我地要決定係咩地點舉行婚禮。Bruce對婚禮既concept係，玩玩玩玩玩，以下係佢真係講過既wedding ideas，而佢真係覺得可行:

﹣大家一齊去Hawaii，用直升機跳落去火山口邊緣，然後千鈞一髮間，係半空中同牧師講 “Yes I do!”
﹣去馬爾代夫，包晒幾個小島，所有guests同我地一齊潛水，包括我既高齡grandma，係水底證婚（佢忘記左，我唔識潛水，對水都有恐懼）。
﹣佢覺得去西藏好神聖，好有型，不如去西藏珠峰之上行禮，之後請晒所有guests去睇天葬，實好難忘。
﹣係牧場行禮，佢要用Dark Knight姿態進場，即係騎住馬咁行出黎，以配合佢既英偉風範，而我佢話會安排隻驢仔比我，每個guests仲可以收一籃兔仔做回禮。

以上係我僅僅記得既ideas，佢仲有無數咁多意見，只係太多我唔記得了。但係大家可以想像，每次傾，我都係嘔血居多，我話，你諗D實際D，真係可行既好無，佢死撐話；「我果D真係可行，係你唔敢去實行！」想用激將法迫我就範。

我地縮緊範圍，最後決定係英國行禮，然後係香港搞一個party，咁樣就比較顧及到兩邊既人，比較實際。

好，我以為大家一齊定左日子、地點，然後再決定其他details係正常做法。但Bruce佢一D都唔正常，佢做在一樣常人唔會做既野。（續）