之前開過post講我未來99幾唔妥我,琴日又黎料,仲好大鑊...
事源我係佢屋企,我地只係係房,佢冇啦啦又拍門,今次冇罵,淨係講佢冇惡意,想同我傾計喎,咁我男朋友梗係擋住佢,大叫佢走,話唔想比我地2個見到面,因為佢要做磨心.佢媽之前話佢食軟飯,佢一直記住好mind,咁佢好火又拎出黎講,佢呀媽又癲,話佢小器,呢樣個樣,又話對唔住囉...之類,之後佢個仔拉住我走左.
夜晚,大家都冇事下左火,咁我男友話想自己煮野食,點知煮煮下佢媽又返,本來大家下左火,冇野喇,點知佢又沖入去,單單打打話佢個仔唔比面佢,又話佢小器,又話佢比得小家用,又話佢揾得錢小,呢樣個樣.咁又吵一鑊,我地又走.
個時我男友好激動,我拉實佢,係樓下佢喊左好耐,我話遲早要面對,不如今日講清楚啦.到佢平伏返,佢個8婆呀妹返左,仲喊晒口打比佢叫佢返去,咁我地就返去.戲肉先黎,我一入門,佢個妹已經指住我話我8婆,叫我同佢呀媽道歉,我好嬲,佢成隻癲婆咁向住我大叫,我男友即刻喝住佢仲想打佢咁,話我冇做過任何野,係佢呀媽錯仲不知悔改.佢呀妹驚,但仲要叫我8婆,話因為我搞到佢屋企嗌好多次交,我男友一直維護我,話我咩都冇做過.
之後六國大封相,我出左好小聲,我只係講左我唔中意有人係背後打小報告,離間我地感情,我亦都唔會因為個99要求而學煮飯,佢仲講到明我要服侍佢個仔,我反駁佢,我話係老公應該照顧我,唔係我嫁黎仲咩?後來佢又話我心理唔平衡.冇家教,又話我教唆佢個仔唔好要佢地,2個人一唱一和做場大龍鳳,我男友見佢地喊到煩,大聲喝佢地話唔係想睇佢地做戲,係想問清楚佢地想點.佢呀妹又癲叫我地搬走囉,咁激一激,我男友咪話搬囉.最後,我地梗係比佢地唱到衰到冇人有,琴晚我同男友係出面過夜,佢好無助,我唔想搞成咁,但我唔可以比人恰到上心口.而我男友都唔想再返去,好大壓力.
我同佢講,無論佢想點,我支持佢,就算佢要搬返去,要分手,我都唔會再纏,我實在好憎佢地2個,話我冇家教,佢有咩?佢講d野有邊句人講的?話我癲,話我神經病,話佢個仔痴著我變都同我一樣自閉,又話我搶左佢個仔,又喊晒話冇左個呀哥冇左個仔,屋企少左個人,想點?無非想佢飛左我姐?使唔使做咁大場戲?佢地仲係佢爸面前抹黑我地,幸好佢爸爸比較明事理,佢亦知佢地2個好難頂,琴晚佢爸爸打黎.話我地一齊佢唔會阻亦阻唔到,想明日約我地2個傾下,我好驚好不安,我根本冇錯,係佢地一次又一次傷害我,係要當面wear爛塊面嘈我,我根本唔想同佢地講半句野!琴晚好在我男友幫我,我地想租屋住,但原本plan定的計劃要全盤押後,我地都好唔開心失晒預算......
mouth: 
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
