少年成長今日: 3|主題: 16130

收藏本版

發帖

返回列表

跳至頁

查看: 17785 | 回覆: 0

全家確診 [複製鏈接]

csir3290

子爵府

積分: 12774

1^#

發表於 22-12-18 10:59 |只看該作者 |倒序瀏覽 |打印

星期四返緊工嘅時候，忽然收到我老婆嘅電話話屋企嘅工人姨姨確診咗，即係話我哋一家即刻變成緊密接觸者，要留喺屋企隔離。我即刻同老細講，然之後立即返屋企開始五日嘅檢疫生活。我老婆話為咗安全計，所以請工人姨姨去咗竹篙灣隔離，而我哋一家就留喺屋企檢疫。

我哋知道最大機會被傳染嘅就係阿仔，因為阿仔每日都同工人姨姨晏晝嘅時候一齊食飯，果然嗰晚阿仔開始話唔舒服，喉嚨痛同開始有少少發燒。我老婆都跟著開始有咳同埋喉嚨痛。到檢疫嘅第一日我老婆同個仔都中咗招，佢哋立即變成確診隔離。而我同阿女因暫時都未中，但檢疫期又重新計過。所以為安全計喺屋企都要分開隔離，老婆同阿仔同一間房，阿女自己去咗書房瞓，我就喺自己房度瞓。喺屋企大家都帶曬口罩分開食嘢用唔同廁所，除此之外都冇乜再特別嘅隔離措施。本來都諗住好多麻煩嘢會發生，但係到咗第二日阿仔同老婆嘅症狀開始好轉變得輕微，而我哋一家人又因為唔可以出街，所以都喺曬屋企，反而變得仲多咗時間傾計同相處。而且阿仔都好乖都第二日佢嘅徵狀好得七七八八嘅時候，佢都幫手做一啲家務，因為工人姨姨唔喺度自然啲家務就由我同老婆負責。一家人又唔可以出街變成大家都要搵方法去消磨，一齊睇戲，同阿仔阿女一齊砌lego，又要做下家務咁又過咗一日。本來諗住好悶唔知點過嘅生活不經不覺咁好快又過咗三日，原本諗住有啲唔開心嘅隔離生活，點知一家人開開心心咁又過咗去，個心態就好似忽然間多咗幾日假期一家人一齊相處咁。事實又再一次證明凡事只要唔好向負面諗，態度正面一啲其實好少嘅事都會令到大家開心好多。就好似今次無端端嘅隔離生活變成一家人難得相處的幾日假期咁，雖然要做返曬啲家務，但係大家分工合作有傾有講咁又過咗去。身為家長正正就係要以身作則教細路仔點樣樂觀同埋積極去面對各種難以預料嘅情況。雖然隔離嘅生活大家都唔想發生，但係既然要面對，如果喺屋企入面父母都發曬忟憎咁仔女有點樣去面對呢。

講開又講，隔離期間其實我有陣時都會諗既然我老婆同個仔都中埋，咁就不如不設防正如我哋啲同事講早中早享受，既然呢一隻病毒嘅影響只係好似感冒咁不如早啲大家一齊確診，所以我都曾經有諗過不如喺屋企隔離嘅時候大家都不設防希望一齊確診，咁就唔使諗住逐個嚟咁麻煩。連我老婆都話不如一齊唔好戴口罩一齊確診好過！

點知到最後真係畀我老婆講中咗，喺我同阿女成為緊密接觸者檢疫期嘅最後一日，我個女都中埋，即係全屋得我一個未中，但我嘅檢日期又要多五日。然後終於同一晚就連我都失守埋。原來真係同住一家人就算分開廁所用分開瞓分開食飯都係會中。所以既然全家都確診曬，我哋都解除曬所有防疫措施，好似平常一樣。但係我初頭嗰兩日真係好辛苦又咳又瞓唔到，慢慢先至好啲。雖然一家人都中曬，但係解除曬啲防疫措施大家除咗唔出得街之外都係開開心心咁一齊喺間屋入面生活。生活態度原來真係好影響一家人點樣去面對危機。如果大家都係成日愁眉苦臉，細路仔其實都識得睇大人眉頭眼額，如果終日諸多不滿，事事挑剔，由其是當一家人要困獸鬥喺屋企十幾日嘅時候，總係會有好多唔順眼嘅地方，如果做家長嘅都唔識得帶頭用樂觀啲仲積極啲嘅心情去面對，仲成日攪到家嘈屋閉，又或者愁眉不展，細路仔都只會有樣學樣。所以喺家庭入面出現嘅一啲情況究竟係危機定係契機，其實主要就係取決於家長自己嘅心態同睇法。家長就算係一個點樣悲觀嘅人都好，但係面對住自己個仔女其實都應該慢慢學懂積極同埋樂觀一啲。咁樣先至能夠教到擁有樂觀積極態度嘅小朋友出嚟！

0 0 0

私人傳訊

跳至頁

返回列表

回覆

發帖

熱門搜尋：

少年成長 今日: 3|主題: 16130

瀏覽過的版塊

少年成長今日: 3|主題: 16130