少年成長今日: 3|主題: 16132

收藏本版

發帖

返回列表

跳至頁

查看: 31645 | 回覆: 3

補充練習 [複製鏈接]

csir3290

子爵府

積分: 12797

1^#

發表於 24-6-2 11:24 |只看該作者 |倒序瀏覽 |打印

星期六等姊弟學嘢嘅時候，百無聊賴打發時間最好就係行書店。每次去行書店都會見到好多家長同埋仔女一齊行書店，本來係好好嘅活動。但得意嘅係通常家長同埋細路一齊行書店，最多人行嘅部分竟然係買補充練習嘅部份，你會見到喺嗰度其實家長就好用心去揀，但係望下細路仔個樣就唔係幾開心，通常家長都會問仔女邊本啱，呢本做唔做，嗰本好唔好等，通常啲仔女就係答「是但啦！」反而你望返另外一面放兒童圖書嘅地方，都係好多細路仔，但係通常就淨係得細路仔自己喺度睇，比較少會見到家長坐埋喺離陪佢哋一齊睇書。香港啲書店好行嘅地方就係因為唔會人多，行得好舒服仲可以慢慢睇。因為講真自從有咗手機之後行書店嘅人就越嚟越少。

講返家長同細路仔一齊買補充練習做，我唔反對因為我自己對仔女細嘅時候都會買啲補充畀佢哋做。但係好多時家長都會買一大堆補充，以為做得多細路仔就會成績好，但係其實只要問返啲小學生佢哋細個有冇做過補充練習，十個有五六個可能都答你做過，但係咪真係咁有作用呢？我唔可以話完全冇，但係如果要發揮補充練習嘅作用，家長就唔可以期望只係就咁買咗本補充畀個細路仔自己做，佢就會有好大進步。好多家長會都以為補充練習後面有答案，細路仔自己做完自己對就得啦！對完答案做錯咗細路仔就會自己識改正，其實諗深一層係咪真係咁樣就可以達到想要嘅成果呢？我覺得如果要利用補充練習幫細路仔嘅話，其實家長都要擺相應嘅心機落去！我自己對仔女我之前都講過，佢哋細個嘅時候我都會買啲補充練習畀佢哋，但係一定唔會多，首先唔可以令到佢哋反感，可能一日只係做幾題，到放長假時先至會每日做一個練習當做温習。做補充練習要令到細路仔覺得唔係壓力，當然佢哋唔會自己自動就喜歡做補充練習，其實係需要家長同佢哋培養呢個習慣。我自己就一定會先拎走個答案，所以如果有補充練習畀佢哋做，每一晚返到屋企其實都要同佢哋睇返，重點唔係淨係啱同錯，而係佢哋究竟明唔明當中點解會做錯。家長要利用本補充練習去知道自己仔女其實喺學習上面有啲咩概念上面嘅問題，所以如果佢哋做錯，唔係就咁叫佢哋改正，而係做家長嘅都需要睇下佢哋做成點同錯喺邊，教返佢哋正確嘅概念。而補充練習另外一個重要作用就係測驗考試前，作為幫仔女作一個總結性嘅溫習，所以家長更加要喺佢哋做完練習之後，要同佢哋一齊對答案同埋掌握佢哋唔識嘅部分教番佢哋。所以家長如果只係諗住買一大堆補充畀啲仔女佢哋自己就會做，做完又會自己對，其實某程度上家長只不過係覺得自己已經做咗同埋用咗方法幫仔女學習。更極端嘅係有啲家長以為買得越多就做得越多，仔女成績自然就會越嚟越好。但係有啲家長就根本唔需要買補充練習畀仔女做，仔女嘅成績一樣可以保持得咁好，重點其實係喺仔女細個嘅時候，家長點樣培養同埋點樣教仔女學習，同掌握仔女嘅進度。咁我當然明白唔係個個父母都可以有咁多時間放落去幫仔女學習，但係如果只係諗住買一大堆補充練習就可以幫到仔女嘅話，咁其實有啲自欺欺人，用錢埋一大堆補充練習，仔女又未必做得開心，又未必達到預期嘅效果，咁不如用多啲時間幫仔女溫習可能效果仲好。有啲家長可能成日會覺得自己讀書唔多幫唔到仔女，但係講真小學嘅課程又有幾艱深呢？只不過係肯放幾多心機同埋時間落去咁解。同埋跟重要嘅係如果趁仔女仲細讀緊小學嘅時候，就要幫佢哋好好培養學習嘅習慣，其實到中學家長就已經可以慢慢放手。因為學習嘅習慣自細就要養成，到到中學先至發覺佢哋成績唔好，唔自己溫習，唔自己做功課。其實家長諗返轉頭細路仔細個嘅時候又有冇培養佢哋呢啲習慣呢！

我好贊成家長同仔女多啲行書店又好圖書館又好總之就多啲睇書，咁樣先至係培養閱讀習慣嘅最重要方法。我成日都話家長自己都唔睇書你又點樣要求自己嘅仔女會自動自覺睇書呢！家長都唔識得幫細路仔發掘唔同嘅閱讀題材，細路仔最多咪睇嚟睇去都係漫畫，或者只係停留喺有圖畫嘅書囉！如果家長自細更加只係同細路仔行書店嘅目的係買補充嘅話，只不過係令細路仔更加遠離閱讀呢一個嗜好！所以我對仔女細個嘅時候，同佢哋行書店係一定同佢哋睇書如果要買補充就一定係我自己或者我老婆幫手買，唔會帶對仔女一齊。有啲家長話唔同嘅仔女一齊唔知買乜嘢補充，講真唔係連自己對仔女讀幾年班讀緊邊一個學期都唔知啩，況且真係唔需要買一大堆，我自己以前都只不過係一個學期一本就係咁多。所以同細路仔行書店嘅目的應該係陪佢哋多啲睇唔同嘅書籍。