少年成長今日: 0|主題: 16124

收藏本版

回覆發帖

返回列表

跳至頁

查看: 1179 | 回覆: 0

主觀願望 [複製鏈接]

csir3290

子爵府

積分: 12720

1^#

發表於 4 天前 |只看該作者 |倒序瀏覽 |打印

早幾日同啲細路練完波，習慣咗都會一路執嘢一路吹吓水傾吓偈，發覺其中一個細路好似唔係幾開心，完咗之後就同佢傾多陣。開頭都唔係好願意講，但係慢慢傾吓傾吓佢就講原來又係為咗讀書嘅問題！個細路話最近同屋企人因為讀書嘅問題搞到好唔開心，因為佢已經重讀咗一次中三，但係今年佢都係冇信心自己可以升班，而且佢都話對讀書冇興趣，而學校老師都曾經建議過佢轉去讀職訓局嘅課程，佢自己都去參觀過覺得都幾適合自己，因為唔使成日坐喺嗰班房度，佢自己又鍾意汽車，所以佢想轉去讀汽車維修課程，希望第二時可以做一個汽車維修嘅技師。佢參觀完就返去同家長商量，點知佢家長問都唔問，淨係同佢講叫佢要乖乖地讀到中六畢業，佢已經一再同家長解釋，話畀家長聽自己冇心機讀書，亦都唔鍾意讀呢啲書，就算勉強畀佢升到中四，其實要佢應付文憑試佢根本就唔會有信心，亦都一定唔會考得好，到頭來如果想繼續讀，可能都係要走返入去職業訓練局讀相同嘅課程，但係到時先至讀嘅話，除咗嘥咗三年中四至中六嘅時間之外，仲需要畀學費。佢話佢已經好耐心唔係發曬脾氣咁同父母傾，點知佢父母聽完之後淨係話佢只不過係想搵藉口唔讀書離開學校，到時學壞咗咁點算！所以佢父母點都唔肯畀佢去讀。佢話佢試過同學校老師講，請學校老師同佢父母傾下，點知佢父母親啲連老師都鬧埋，只係話老師想搵籍口趕佢個仔出校，總之佢就唔會畀佢個仔轉讀職訓局課程。個細路話而家中三考緊試，佢都唔會考得好，如果再留班又係畀父母鬧，但係同佢哋講話去讀職訓局課程又係畀父母鬧，總之就係點樣都會畀人鬧，所以一諗到呢度佢就已經唔想再同父母講任何嘢。
呢個細路鍾意打籃球，鍾意打波嘅細路其實都唔會壞得去邊，但係因為學業前途問題同屋企搞到關係咁差，其實亦都冇乜必要。我明白父母嘅擔心，講真如果個細路自己話出去讀職訓局，畀咗佢出去，點知讀讀下佢唔讀嘅話，又真係會令到父母擔心！但係如果聽個細路自己咁講，其實個細路都諗得幾清楚，而且對課程嘅了解亦都幾多，咁似乎佢都幾識諗。況且我覺得個細路講得幾啱嘅一句就係就算勉強畀佢升到中四，以佢咁嘅成績同埋基礎，根本就未必能夠可以應付到文憑試，如佢自己又識諗咁點解唔畀佢試下呢！我都明白好多家長可能喺佢哋嘅心目中，中六文憑試係唯一嘅出路，起碼個細路仔都叫做中學畢業！但係其實而家喺香港根本就有好多多元化嘅出路，文憑試未必係唯一嘅出路！但係好多家長唔了解，又唔肯嘗試去搵多啲資料去了解多啲！家長可能一句說話就逼個細路繼續留喺學校，但係一個咁樣嘅決定，可能就影響咗個細路之後嘅前程，好似呢個細路咁，起碼佢都自己有個目標就係想做一個汽車維修技師，但係家長一句咁簡單就做嘅決定，乜嘢資料都唔搵，乜嘢都唔去了解嘅話，根本只係先入為主就覺得細路一定要中六畢業，咁對細路嘅前途可能影響重大！淨係諗下佢一路咁樣勉強繼續升落去，如果佢根本越讀越冇興趣，其實佢學壞嘅機會仲大，又或者根本磨滅到佢連想做汽車維修技師嘅目標都冇埋，到時想佢中六畢業呢一個主觀願望係幫咗個細路定係害咗個細路都唔知道！所以做家長如果唔知嘅，就真係唔好怕嘥時間，自己去睇多啲聽多啲人嘅意見，擴闊多啲自己嘅眼界，知道多啲而家社會嘅趨勢。唔好成日先入為主將自己嘅諗法加喺細路仔身上。既然要去讀職訓局呢個諗法係呢個細路自己經過深思熟慮諗出嚟嘅，咁點解唔畀佢試下呢？因為細路仔自己所做嘅決定，我哋都要畀機會佢自己負責！如果讀讀下唔讀，將來捱得點辛苦都係自己攞嚟嘅！但起碼將來唔會抱怨父母。呢個細路將來會唔會讀讀吓唔讀或者能唔能夠成為一個汽車技師都係一個未知之數，但係可以肯定嘅喺現階段佢同父母嘅關係一定已經破壞咗先！