原文章由 KoyeBaby 於 08-11-3 08:52 發表
尋日囡囡啱啱沖完涼,99抱住bb嗰時借d意走嚟我度...
99: bb落樓下玩好無呀,有好多玩具又有小朋友喎!落去玩好無呀?
我(明知佢係對住我講): 你咪落囉...(其實千萬個唔願意因為信佢唔過,但係見係會所嘅遊樂場應該無問題先答應)
99(突然好大聲): 去咩啫!咁都要睇你俾唔俾架!!
我(已經好興但係唔想同佢嘈): 我出得聲你咪去囉!
99: 同嫲嫲出街街,嫲嫲帶你出去玩~
我(知佢仲嬲緊上個星期我唔俾佢帶出街,諗住好聲好氣): 我係驚你睇佢唔住啫...(囡囡啱啱識行會周圍搵嘢玩又易跌)
99(好大聲): 點會睇唔住呀!有幾難呀!點睇唔住呀!!(下刪幾十字)
我唔想同佢嘈已經唔出聲由佢發癲,但係佢又要搵嘢嚟講...
99(好得戚咁): bb,嫲嫲帶你落去玩,唔好成日困喺屋企!
我(聽到真係忍唔住): 朝早先帶過佢出街咋!呢幾日都有出街,點叫困喺屋企呀!!
99: ...
我嬲佢明知我同c6朝早先帶過囡囡出去玩,佢睇住我哋出門口嘅,我仲問過佢去唔去,佢依家講到我個女好似俾我軟禁喺屋企咁!次次我哋出完街佢就對住我講"又出街呀?",出又鬧,唔出又鬧!!佢都痴線架!!!
我唔俾佢帶bb出街唔係因為佢係99,係完全信佢唔過!佢唔識開奶唔識換片,粗手粗腳,成日夾硬扯囡囡手腳,搞到囡囡撞損哂!又污糟邋遢,自己隻手油淋淋都唔洗唔抹摸囡囡!又無觀念bb有咩食得有咩唔食得,囡囡未出牙佢都塞龍眼俾佢食,好彩無哽死咋,但係都痾咗幾日要睇醫生,佢死唔認關佢事!!
我同自己講過,佢呢世都唔駛旨意可以帶我個女出街!我連樓下都唔會俾佢帶!!豈有此理!我真係好鬼憎佢!!!