夫婦情感今日: 3|主題: 42735

收藏本版

發帖

返回列表

跳至頁

查看: 46237 | 回覆: 421

我的Bruce Wayne，與他的Alfred

[複製鏈接]

12 3 4 5...22

203

oguh

子爵府

積分: 11575

1^#

發表於 12-8-2 19:15 |只看該作者 |倒序瀏覽 |打印

本帖最後由 oguh 於 12-8-2 19:17 編輯

之前兩個長post，講左我同Bruce既相識、相愛到結婚，如果無睇過既JM，可以睇返：
我與C6又名Bruce Wayne的崎嶇之路http://www.baby-kingdom.com/forum.php?mod=viewthread&tid=5352122&extra=&page=1

我與Bruce Wayne的大鑊婚禮
http://www.baby-kingdom.com/forum.php?mod=viewthread&tid=5359373&extra=&page=1

我係度人物簡介一下：

我C6係英國人，年少得志，好後生就有自己事業，從前爛玩花心做盡所有衰野，「自大高傲，招招積積，嬉皮笑臉，認屎認屁，享樂專家，鍾意揸住架名貴跑車招搖過市，又鍾意炫耀自己做野點點點叻。對其他人有時把口又勁賤，成日以串人為樂，真係好乞人憎。」但其實「內心非常柔軟，非常脆弱，同埋佢脾氣雖臭，心地非常善良」。

佢不滿我係forum叫佢C6，要我係我地故事中強調佢係Batman Christian Bale咁靚仔，同埋再三叮囑我，叫我寫得佢「高大英俊，有型靚仔，有才華有智慧有品味」，所以我以下叫他作Bruce為藝名。記住，呢個係佢自己一箱情願，佢同人地大名星無一忽係似。

寫晒「史詩式」大長篇愛情故事，今次會短D。

第一節：

之前既故事，出現過Bruce既哥哥Robin，媽媽Batmom，最後我都幫自己改埋Selina呢個名，完全跟足Bruce要求，將佢既世界化身為Batman既世界，而Batman既世界裡面，有一個角色非常重要，就係忠心管家Alfred。

而我地屋企，都有一個Alfred。

如果JM以為Alfred係愛情結晶的話，sorry要令你地失望（愛情結晶可能另開post）。但佢係我地既關係中，扮演一個重要角色。

時間又回到我同Bruce剛拍拖熱戀時，還記得初相識時，佢每日都著度身訂造既西裝返來，高大有型，官仔骨骨，一絲不苟，好吸引人。熟悉佢之後，發現佢對「衣」同「住」真係好講究；同佢去買底衫，佢好似驗屍咁睇件衫既物料；佢識得分枕頭套、被套用埃及邊種棉、幾多針先無最舒服；佢願意用十幾萬買一張皮毛地氈被自己踏；佢會特登去其他國家買傢俱，運費同件傢俱一樣咁貴，佢會當藝術品欣賞；係屋企，佢見到地上有一條頭髮，佢都會即刻執左去；某程度上，佢係有病。

我諗，係咪佢細個窮過，令佢特別珍惜佢自己買回來既物件？如果衫爛左，佢會令去補；傢具殘舊左，佢會拿去翻新；佢唔輕易掉自己既東西，如果要掉，悼件東西咁好似去送殯咁，放入垃圾桶前萬分不捨咁哀悼。

有段時間我地已經同居，有次我話，同你一齊住好悶，間屋咁大，得我地兩個，好空虛，我想養狗。

Bruce即刻「起晒角」，好大反應，死都唔肯，佢話佢最憎狗，細個去偷野時比人放狗咬過差D死。（鬼叫你去偷野！）

我見佢咁大反應，唯有慢慢去說服佢，開頭都無反應，又係我潛移默化下，佢終於頂唔住比我不停煩佢，佢做野忙又諗住有隻狗陪下我都好，咁終於有一日，佢應承同我一齊去睇下狗。

佢強調，只係睇下，唔代表一定養，見到合適既狗先算。

但佢都知，我都係一個鍥而不捨既人，我都係好善長咬住唔放。起碼佢肯同我去睇狗，算有個好開始。

我地某一日，就去左一個動物收容中心，去睇下有咩狗適合領養。

唔知大家知唔知，有一D狗被領養機會比其他狗微，包括：黑狗，老狗，傷殘狗。

我去收容中心，一早心裡已經心裡有數，我要去睇最無可能被收養既狗。入到去，Bruce即刻皺晒眉，唔知係咪驚，一直都唔出聲。一路都係我同個員工溝通，佢自己一個黑口黑面跟住，用好厭惡既眼神望住D狗，我心諗，你咁既款人地點會肯比我地領養？我暗中pinch佢一下。

我地行左一陣，睇左好多狗，行到一個籠前面，我見到一隻類似混種狼狗既黑狗，好平靜咁坐左係角落。

好野，有黑狗。我暗暗高興。然後係籠門前觀察下佢，問下員工佢既來歷。黑狗係街上流浪被人發現，然後送來呢度，佢會親近人唔怕人，之前應該有人養然後被遺棄，左後腳有D跛，可能流浪期間受過傷，但已痊癒，只係輕微跛。估計已經七歲，唔係年輕狗，已絕育。

我心暗中大喜，簡直係bingo，佢集黑、老、傷殘於一身，有無咁筍呀？

我問，可唔可以開籠，同佢接觸下。Bruce即刻好大反應，佢問我：「下？你唔係要芝娃娃果D細狗咩？」

我無理佢，蹲下來同黑狗慢慢接觸，佢動作好慢好溫柔，過來慢慢聞下我。從佢溫文既動作，我已經喜歡佢。然後員工比我地同隻黑狗出去行個圈，同佢散下步，感受下點。Bruce好唔願意，佢話：「好大隻，不如我地去睇芝娃娃啦。」

我叫佢試下啦，佢好唔情願去接近隻狗，而狗係有靈性動物，佢feel到Bruce形態猶猶疑疑，以為佢不懷好意，即刻對住佢吠，叫聲震天，六尺高既猛男Bruce即刻被佢嚇死。我鬧佢，男人老狗唔好私私縮縮好唔好？一齊去行啦！

然後我地同狗行左一圈，我用懇求既眼神，求佢比我帶呢隻其貌不揚，但心地善良既黑狗返屋企。

佢問多我一次：「真係決定左？唔去睇下芝娃娃？」
我：「你都知我唔係果種抱住芝娃娃既女人。」

Bruce嘆一口氣，然後去辦領養手續，第二日，我地買左好多野，準備帶佢返Bruce屋企。

我地幫佢改左名，但一如以往，所有係我地既故事角色都要同Batman有關，所以我係呢度叫佢做Alfred，一個在Bruce身邊最忠心、最誠懇既角色。

Alfred七歲混種黑狼狗，正式成為我地屋企一份子。（續）