究竟由幾時開始, 邊個人提議, 所有食品都要標示到期日㗎呢?
翻看家中除咗少部份罐頭之外, 幾乎所有食品都過咗最佳食用日期, 包括肉類蔬果類, 連藥物都過晒期.
雖然大部份食品都有食用限期, 但我一於少理, 只要眼看還新鮮, 鼻嗅冇異味, 我就照煮照食如儀. 在我角度, 喺未定立食用日期之前, 邊有過期唔過期㗎, 只要食物冇腐壞發臭, 放幾耐又有咩問題呢.
就係因為有咗食用日期, 令好多人誤以為食咗過期食物對身體有害, 因而對就算外觀依然新鮮但因為過咗期限嘅食物望而卻步. 如果商人冇善加利用, 將之捐畀環保團體用以幫助草根階層, 最後只能送去堆填區. 可憐呢啲食物嘅真身, 若然泉下有知, 佢哋讓人們裹腹嘅使命, 最終卻淪為垃圾, 一定會為自己白白犧牲而感到不值.
之所以對食用限期咁反感, 仲有另一個原因, 就係有時喺超市貨架上, 見到有啲肉類明明外表已發黑, 甚至肉眼都睇到黏液, 居然照放喺度賣. 而好多生果蔬菜又爛又發霉, 又係照賣, 因為仲未到期, 所以職員就唔理. 假如有老人家老眼昏花不知就裡買咗返屋企, 雖然可能打開後會發現唔食得, 但就無啦啦令佢哋要破費. 若然老人家眼朦鼻塞味覺唔靈照煮嚟食, 到時食壞肚追究起上嚟唔知邊個要負責.
好多老人家捱過窮, 所以奉行做人要有衣食, 但係現世代卻與前人嘅理念背道而馳, 只追求新鮮, 已經唔理浪費唔浪費. 就以食肆所見, 已結帳人已走嘅檯面仲遺下好多食物, 有啲好明顯只動筷一兩箸. 見到侍應執檯時毫不留手將之倒掉在殘羮剩菜盆車內, 我都會暗自肉痛慨嘆, 既然食唔晒, 點解要點咁多呢, 又點解唔打包呢. (所以我絕對唔可以喺食肆打工, 因為日日見到食物被浪費, 肯定會抑鬱)
嚴格嚟講, 我未經歷過冇飯開嘅日子, 但依然珍惜所有未變壞嘅食物, 唔會輕易扔掉. 喺我哋一家嘅字典裡, 只要食得落肚, 就算幾難食都會照哽, 唔容許浪費. 因為我相信, 地球嘅資源始終有限, 雖然可能要幾代之後先至耗盡, 但話晒而家身處地球上, 無論為地球又好, 為後代又好, 應該盡一點綿力, 好好愛護珍惜任何資源.
當然, 我人微言輕, 冇可能改變已經根深柢固嘅思想, 只想藉此抒發一下每當見到一啲食物好地地被棄掉而感到可惜與肉赤嘅心情而已.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
