hugoma2015 發表於 16-2-25 20:18 
啊，SORRY，一時激動，已經改翻！
靖王D書粉都有鬧噶，之前兔區就有書粉開鋪鬧左幾版。
好多人都話WK靚仔做得好唱得好，老實唔係我杯茶，佢樣係幾好，但唱歌冇感情又走音，眼神表情好多場都有種奸味，去到昭仁宮救郡主果陣，見到太子命人放箭，佢個眼神同嘟嘴果下我冇好感，書入面係靖王拼命相救，應該係好得人心，但我就硬係覺得麻麻，WK好多場我都感受唔到佢係鐵血沙場十幾年嘅將軍，唔夠威武感，動作唔利落，反而譽王揸住把劍行出帳幕果下眼神好有殺氣。
1、呢個劇組好中意留白一D人物，令人唔知道所指誰人＞＞＞宗主聶鋒相認果個留白係OK嘅，因為都知宗主所指何人。紀王同豫津講當年有人想同佢指腹為婚，即個我覺得完全係癈場，作用不大，加咗呢幕都唔知有咩作用，甚至令有D觀察以為講嘅係夏江個仔，但其實夏江同言侯交情又點會可以去到咁親，就算係同夏江夫人好朋友，都應該唔夠宸妃、林燮同晉陽長公主咁有份量。藺晨講最聰明的2個人在宮裡都冇作用，冇可能藺晨會指宗主同靖王兩個，靖王公認係唔夠聰明，以藺晨同佢交情同藺晨自負性格，唔會去誇讚靖王，話靜妃更牽強，靜妃都冇見過藺晨，藺晨又點會話佢同宗主一樣最聰明。後面兩件事/對白就顯得冇需要，仲要無端多咗空白題令觀察估完都唔肯定。
2、夏江系皇帝面前指認宗主果場＞＞＞邏輯的確係死穴，夏江將火寒毒同林殊劃上等號係一個致命傷，劇組應該係以此影襯出梁帝多疑嘅性格，寧願殺錯，不可放過根本就係皇帝心聲，夏江一向審時度世，清楚點樣可以引起梁帝懷疑，但千算萬算，自己都不知不覺間超越咗安全範圍，對於夏江，梁帝後來都唔信，佢講果兩句係有份量，係足以令佢即場賜毒酒，去到呢度，我覺得劇組改寫時用力過猛，第一次睇我完全唔知佢地應該點收科，靖王如果英到真係準備飲但俾自己父親打落杯酒會好D，起碼皇帝都仲有半點人性，唔想自己唯一可以傳位嘅仔都殺，以前佢可以忍心殺祈王，而家唔殺靖王，原因何在？靖王叻過祈王？當然唔會係，皇帝年紀大咗，對於親情有貪圖有戀棧，咁樣比起靖王倒酒好D。再者，宗主真係林殊的話，即係佢自己親人，有少少憐憫之心真合理，何況如果相信眼前嘅宗主係林殊，而家宗主咁嘅身世比佢風燭殘年都唔好得好多，隨時宗主死先過皇帝啦。當然，當年要殺林殊嘅係梁帝，因為佢比起林燮更令皇帝擔心，今時今日知道林殊好有可能未死，就算而家冇力揸劍，宗主一樣有服仇嘅能力，只係梁帝冇想過其實成班佢顧忌嘅人根本冇諗過會背叛佢，係佢自己小人之心，多此一舉。
3、就算放走，事後都一定繼續整死佢，而且會提防靖王＞＞＞呢度同上面一點一樣，唔切合當時情況同皇帝性格，佢可以仲去睇越妃，又再見夏江，賜埋毒酒，又點會輕易因為靖王而放過宗主，真係講唔通。
4、夏江攻擊宗主，武將出身的靖王居然袖手旁觀，呢個唔合理。尤其系當時佢已經知道宗主就是林殊，以佢對林殊的感情，呢個時候佢應該奮不顧身飛過去救就真＞＞＞所以咪話搞到靖王唔只冇腦，仲要係遲鈍，佢都係打慣仗嘅將軍，對於呢種場面又點會一舊飯咁企喺度睇？真係覺得御林軍一定保護到宗主？或者一定會保護宗主？唔驚梁帝乘機一石二鳥，宗主同夏江兩個都唔放過？
商業機構好多考慮係好正常，見慣不怪，事實琅琊榜已經好彩，只係男二差D，睇其他配角都睇到人好開心，因為實在好戲之人幾多吓，除咗靖王，宮羽同秦般弱兩個滑族女人都弱咗少少，反而少D嘅戲份嘅四姐、小新、謝琦都幾令人印象深刻。
花旗太太生活在花旗國，留意時差，你問我未必即時答到。
我覺得直接安排靖王飛身去救宗主，然後拖夏江出去（夏江唔好講咩寧可殺錯，唔好放過），然後皇帝放佢地走，好過搞毒酒呢一場。另外出大殿門果段，宗主幾乎企唔穩，要扶住門口借力，其實同原著佛牙死，宗主癱坐地上，要靠靖王借力企起身果段好相似。劇組應該安排靖王去扶一下宗主，然後俾返D特寫宗主。咁就可以彌補少少刪除“榛子酥”果一段既遺憾了。
發表於 
返回列表
