吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 興趣嗜好› 閒來無事說些事.....

興趣嗜好今日: 1|主題: 124523

收藏本版

回覆發帖

返回列表

跳至頁

樓主: cforchat

[其他] 閒來無事說些事.....

[複製鏈接]

10 111213 14...43

cforchat

大宅

積分: 2724

221^#

發表於 17-7-10 10:54 |只看該作者

細姪女一向嘅學業成績中上, 所以嚟緊嘅放榜, 父母對佢期望甚殷, 我都密切留意佢嘅分數, 應該入大學唔難.

最近同佢父母茶聚, 先至知道出咗意外, 原來喺臨考前, 細姪女墮入愛河喎. 吓!? 早唔早遲唔遲, 臨入(大學)閘先至嚟拍拖? 唉, 根據過往所聽過嘅經驗, 戀愛中嘅男女大多無心學業, 睇嚟今次入大學嘅期望可能要化為春夢.

由出世到而家, 細姪女都係佢父親嘅掌上明珠, 錫佢錫到燶, 連作為阿媽嘅地位都唔夠佢高. 所以一旦拍拖, 阿媽嘅反應唔算太大, 或者本身都係過來人, 唔覺得有乜咁大不了啦, 始終女生外向, 自己應該好明白.

但係阿爸嘅反應就大咯, 一提起個男仔就扯晒火, 又係嘅, 情人被搶喎, 唔火滾就奇. 唔知係咪因為失戀而茶飯不思夜不能眠呢, 呢日見佢容顏憔悴外形枯瘦白髮滄桑鬚根雜亂, 唔係愁到一夜白髮咁淒楚下話?

我睇過個男仔張相, 又幾靚仔喎, 兩個人企埋一齊幾合襯吖, (我梗係唔敢講出口啦, 驚刺激阿爸爆血管) 換咗我係細姪女, 遇著個咁靚仔嘅人, 仲邊有心機讀書吖, 隨手就將所有書本扔出街啦.

本來puppy love 只係閒事一樁, 試問邊個未試過吖, 黑心啲講, 可能好快就散, 不過細姪女卻好認真帶咗男仔見家長, 令成件事又嚴肅咗, 唔似係玩玩吓咁簡單.

可能係咁, 令阿爸火氣更大, 講真, 生得個女, 就預咗係暫時幫人養住先, 遲早一日都係人哋嘅, 不過冇諗過會咁快啫, 只係擁有十幾年, 都未被承歡膝下, 咁快就話要拱手讓畀人, 一時間又的確猶如晴天霹靂嘅. (平時眼見細姪女好嗲阿爸, 去到邊都黏到實一實, 忽然冇咗貼身膏藥, 對阿爸嚟講真係情何以堪, 唔覺得失落就怪)

嗱, 呢件事如果發生喺古代 (即係我細個嘅時候), 只得兩個處埋手法, 一係斷絕父女關係, 小情侶私奔. 一係強拆鴛鴦, 令有情人鬱鬱而終. 第一個結局, 喺好耐好耐之後, 當初氣焰凌人嘅長者徐徐老矣, 開始想念子孫, 於是想法設法打探子女下落, 最後大家冰釋前嫌, 三代同堂齊歡暢同慶賀...... 第二個結局, 小情侶終其一生都會對拆散者懷恨在心, 又或者未終老, 已自行了斷餘生甚至殉情.

不過呢支歌仔而家已不合事宜, 做父母嘅幾唔鍾意都要昧著良心按下怒火言笑晏晏裝作接受, 因為假如稍為有意見或表示不滿, 一係令兒女愈走愈遠, 一係令佢哋睇唔開釀成悲劇, 到時就後悔莫及. 所以而家嘅父母舉步維艱, 一言一行都要好小心, 以免無意中傷到弱小心靈令其走向絕路.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

222^#

發表於 17-7-11 10:29 |只看該作者

少女懷春嘅時候, 總喜歡與三五知己互訴心聲, 暗戀邊個同學呀, 鍾意邊個老師呀, 迷上邊個偶像呀...... 當然, 亦會憧憬未來, 唔知邊個會係真命天子呢, 唔知靚唔靚仔呢, 唔知會喺咩情況下相識呢.....

總結各人嘅擇偶條件, 幾乎全部都係要靚仔得嚟又有錢, 有錢得嚟又疼自己.

唉, 發夢歸發夢, 現實又點會咁理想, 咁盡如人意吖.

當初吱吱喳喳一班人, 今時今日仍然小姑獨處嘅大有人在, 就算結咗婚生兒育女, 亦要為口奔馳, 可以講冇一個夢想成真.

好似我咁, 當家嘅實際條件, 與夢想中嘅白馬王子何只相差十萬八千里, 直情係一個天使一個地獄使者. 我甚至懷疑上天派佢嚟嘅目的係要攞我命, 否則佢又點會成日整啲杰撻撻嘅嘢我嘆吖.

何謂杰撻撻, 真係一言難盡, 就算三言兩語都講唔晒, 總之無日無之地發生, 鑊鑊新鮮鑊鑊甘.

最最乞人憎係佢唔覺得有問題呢下至㷫吖嘛, 激到我嘔膶, 佢依然沒事人咁繼續嘻皮笑臉, 仲好意思叫我要保持心境平靜.

點靜先, 連心跳都靜止好唔好?

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

223^#

發表於 17-7-12 08:29 |只看該作者

曾幾何時都幾鍾意友坂理惠, 覺得佢好靚女外表又冷冷哋, 幾有性格. 乜而家搞成咁嘅樣, 令人慘不忍睹.

所以話女人唔可以過瘦, 一瘦就顯得面容乾枯雙頰凹陷形容憔悴, 就算雙目依然有神, 仍令人覺得面目無光.

好似宮澤理惠, 拍寫真集嘅年紀正值卜卜脆, 仍帶有幾分嬰兒肥, 唔只討人喜愛, 亦唔覺淫穢, 正如一個小朋友赤身露體, 正常人係唔會萌生任何邪念. 當時嘅佢又係好靚, 瘦咗之後就好蒼老. 其實佢同友坂嘅年紀都唔係大, 唔知做乜殘成咁.

就以肥姐為例, 佢未病前身形胖嘟嘟皮膚白滑, 橫看豎看點都唔似幾十歲嘅人, 證明女人係要有啲肉地先至襟老.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

224^#

發表於 17-7-13 09:56 |只看該作者

原以為臨考至嚟拍拖, 細姪女嘅成績唔慌好得去邊, 點知出到嚟嘅結果又唔係太差, 果然根基夠紮實呀吓.

一接獲成績, 佢媽媽即刻來電報喜, 問我跟住要做啲乜, 我話我都唔太清楚喎, 佢個女係當事人咪仲清楚, 佢應該知道點做㗎嘞. 點知佢話問過個女, 個女都話唔知, 所以至打嚟問我可唔可以上網幫佢查吓程序喎. 又會咁嘅, 讀書嗰個唔知, 要阿媽盲摸摸幫佢頻撲.

問咗有關資料, 上網查看, 開頭烏啄啄畀咗錯誤嘅訊息, 話佢知入所選嘅學校與科目綽綽有餘, 等佢鬼死咁開心, 後來再查真啲, 先至發現以細姪女嘅成績, 根本連門檻都入唔到, 情況忽然急轉直下, 搞到阿媽當堂冇晒心機.

放下電話, 私下與當家同埋吾兒討論, 以細姪女嘅分數, 如果揀一啲普通科目, 要躋身八大完全冇難度, 可惜佢堅持要讀嘅科目又未能逹標, 只能退而求其次自行報讀有關院校, 等一兩年之後再考, 假如考到就可銜接上去, 萬一考唔到就浪費咗呢個分數了.

後來問佢媽媽, 終於有冇去其他院校登記, 佢話冇, 因為阿女之前已經報咗其他喇喎. 係咪呢, 都話佢個女識㗎啦, 又駛乜佢瞎操心呢. 佢話點知個衰女啫, 之前問極都話唔知. 唉, 子女愈唔肯與父母溝通就愈搞到父母擔心, 愈緊張就愈問, 愈問就愈煩, 愈煩就愈唔想答, 於是就一路惡性循環.

我問佢阿女對自己嘅成績有乜睇法, 佢話阿女一放學就話唔舒服返咗屋企瞓覺, 全程黑晒面唔瞅唔睬, 都冇機會同佢深入交談.

以我哋三個臭皮匠嘅推測, 細姪女之所以冇晒心機, 一來當然係入唔到心儀嘅學科啦, 二來可能係佢唔鍾意阿媽將自己嘅成績周圍唱, 三來, 我哋認為係最大可能嘅就係, 本來已經反對佢拍拖嘅阿爸, 唔多唔少都有說話畀佢聽, 例如 : 掛住拍拖啦, 搞到成績咁差....... 無論係自責又好, 怪責父母嘅唔諒解又好, 都會令佢情緒低落.

不過我相信佢只係短暫失落嘅, 因為當諗起背後有個男朋友仔作為精神支柱, 好快又會充滿生氣.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

225^#

發表於 17-7-14 10:56 |只看該作者

本帖最後由 cforchat 於 17-7-14 11:27 編輯

都知道市道唔好搵工難, 但勢估唔到會惡劣成咁啫.

早排我求職欲渴而投寄嘅應徵信全部石沉大海, 我都還好, 因為揀擇, 所以啱心水嘅只係得幾間. 當家就失落啲, 因為佢係以大包圍式投寄, 幾乎只要有手有腳都做得嘅工佢都有殺錯冇放過, 諗住到時至慢慢篩選, 點知都係音訊全無, 搞到佢勁無癮.

我唔知而家嘅僱主用咩嚟衡量應徵者是否適合做呢份工, 又未見過面, 又未交談過, 只係睇簡單履歷就判定合適與否, 未免過於武斷.

以前份工, 我都有份招聘人手, 只要應徵者嘅履歷符合工作崗位所需, 不論男女不論老少不論住得遠或近, 我都一律約見. 對應徵者嚟講, 見得即係有機會, 好過冇聲冇影. 喺我角度, 既然人哋符合條件, 見一見又何妨呢, 嘥得幾多時間吖, 能夠畀到對方一線希望, 就算最終未被選中, 至少令人有一種存在感嘛. 況且有啲就算差少少, 但如果合眼緣, 只要佢肯做肯學, 先請再教都冇問題.

假如有得見, 我好有信心機會率會大大提高, 始終透過互動, 先可以更加了解面前呢個人適唔適合. 當然, 如果間公司學歷行先經驗次要, 請個文員仔都話要大學畢業, 工時長人工少, 咁高要求卻刻薄, 請我都唔做啦講真.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

CML2006

侯爵府

積分: 20190

好媽媽勳章醒目開學勳章畀面勳章環保接龍勳章

226^#

發表於 17-7-14 14:00 |只看該作者

今日係貓B入屋第五日，尋日（即係第四日）終於開咗大。

私人傳訊回覆引用

YURICKY

公爵府

積分: 28523

畀面勳章

227^#

發表於 17-7-15 02:18 |只看該作者

回覆樓主:

樓主嘅文筆講女人心時似亦舒，風趣時似蔡瀾/倪匡

呢種style我鍾意

p.s:我同事大學生同我同一職位，死未，當然，升職佢快過我啦，諗到呢樣，係咪考返啲陪月/家居助理牌呢

p.ss:同事去左生B, 頂埋佢份工作，今天終於可以將一部份工作交俾另一位同事做，同事一個屈尾十走去同上司講佢好忙做唔到，工作打回頭先發覺平時做野都擔心嘈醒呢位同事嘅自己真心係一個蠢材，蠢到加零一

私人傳訊回覆引用

cforchat

大宅

積分: 2724

228^#

發表於 17-7-15 08:39 |只看該作者

回覆 YURICKY 的帖子

多謝你誇獎, 為免卻之不恭, 我照單全收啦吓!

p.s. 陪月/家居助理證書呢啲一定要旁身, 就好似男人人到中年, 都要有個保安證看門口一樣.

p.ss. 你對人好時, 人哋未必會回報, 尤其是有利益衝突時, 人性醜陋面表露無遺, 有時的確幾心淡. 所以而家多數自己顧自己, 各不相干, 或者心理上會好過啲.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

229^#

發表於 17-7-15 09:38 |只看該作者

好佩服嗰啲主婦, 無論有冇做嘢, 都將屋企打掃得窗明几淨一塵不染井井有條.

有朋友喺國內有屋, 間中都會趁周末入去住一兩日, 佢話每次返到去, 第一時間就要先做清潔, 因為太大塵唔洗唔得, 搞得嚟都冇咗大半日, 跟住第二日又話走. 然後隔多一排再返去, 返到去又係洗洗洗...... 唉, 咁有乜謂呢. 畀着我, 反正只係留一兩日, 咪由得塵歸塵你歸你, 乜都唔駛理, 第二日拍吓籮柚又走, 洗乜鬼吖.

自問係一位對打掃執屋極度懶惰嘅人, 以前返工有藉口畀自己, 平時做嘢咁攰, 難得放假梗係要唞唞㗎啦. 好嘞, 而家冇做嘢, 冇藉口唔執拾啦, 咁又唔係喎. 每當要收拾時, 好自然會移動啲物件, 一路移就一路囉唆當家與吾兒將啲嘢隨處放, 如此一來, 當家與吾兒就買我怕, 叫我唔好執, 費事被哦之時又搞亂佢哋啲嘢.

其實如果一個人住, 執屋容乜易吖, 問題係其他同屋住都有自己嘅物品, 雖亂卻有序, 一旦被人唔知頭唔知路將之撥亂反正, 反而破壞佢哋取物嘅習慣, 收拾者落得嘅下場只有吃力不討好, 所以既然佢哋唔介意間屋亂, 我亦樂得順應民意.

有時見到對面樓有人在抹窗, 我就對當家與吾兒講, 唉, 你睇吓人哋幾勤力, 我真係慚愧, 吾兒叫我過去同嗰個人講窗係唔駛抹㗎唔好破壞規矩. 哈, 難得佢哋支持我嘅惰性, 我一於唔理, 繼續懶落去.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

230^#

發表於 17-7-16 08:28 |只看該作者

大多數男士對科技產品較有認識, 亦樂於深入研究, 當家都唔例外, 所以每逢周遭有人有疑問, 都會向佢請教.

相反, 大多女士對科技知識所知無幾, 亦懶得去求真, 就算有說明書都唔會揭, 我都唔例外, 遇上電子產品發生任何故障, 惟一會做嘅就係呱呱叫.

聽到我求助, 當家就立馬過嚟幫我解決問題, 遇着棘手案件, 佢可以不眠不休鍥而不捨尋根究底, 務求搵出癥結所在.

佢咁見義勇為, 如果問我有冇感動, um...... 係冇嘅! 對於一個醉心研究電子嘅人嚟講, 呢啲機會只係讓佢可發揮所長, 多啲嚟密啲手, 開正佢嗰瓣, 佢樂意之至. 假如係其他非電子嘅問題, 譬如廚房有用具爛咗, 浴室有潔具損壞, 要佢維修係要排期㗎, 並非佢有嘢做緊唔得手, 只係修理嘅項目唔係佢所好, 所以拖得就拖.

每當佢將我嘅電子產品修理好, 就會坐喺側邊, 諗住中途再有乜故障, 可以隨時出手, 唔駛我又呱呱嘈. 佢呢啲修後服務, 對其他人或會覺得窩心, 但係對於我嚟講卻構成騷擾, 無鬼啦啦被睇住做嘢極唔慣. 所以每次當佢又準備坐埋嚟睇住我操作時, 我就同佢講呢度冇你嘅事, 跪安啦! 佢就會哈哈大笑一路撤一路投訴我打完齋唔要和尚.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

231^#

發表於 17-7-17 08:38 |只看該作者

有關電話騙案嘅報導, 各大媒介不時都會作出呼籲, 叫市民提高警惕, 但依然三頭兩日就會發生受騙個案, 到底係受害人無知, 定係騙徒手法高明?

若果只係開初, 事件未被公開, 咁受騙還情有可原, 始㚵新手法嘛, 唔似得過去熟口熟面嘅祈福黨跌錢黨咁有得防範. 不過自從揚咗件事, 好多人都知要慎接不明來歷電話, 唔好輕易提供個人資料, 就算對世事不聞不問嘅人, 除非佢與世隔絕, 日常唔與人接觸, 又謝絕睇一切媒體資訊, 否則根本冇可能唔知而家外出發生嘅事.

我真係好有興趣知道, 點解眾苦主只憑來電方三言兩語恫嚇, 就會乖乖奉上銀兩, 而且過程並唔簡單, 又要開戶又要跟足指示, 經過多番折騰, 先能夠將錢匯出. 喺呢段期間, 佢哋個腦諗緊乜? 難道一丁點懷疑都冇?

喺我立場, 除非自己身有屎, 驚對方追究, 才會用錢來作捂口費掩飾罪行. 假如行得正企得正, 理得佢話我涉及咩案件吖, 有證據咪告我囉, 唔駛旨意我會掏出一分一毫血汗錢. (如果被砌生豬肉, 到時再搵包青天查明真相.)

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

232^#

發表於 17-7-18 09:14 |只看該作者

每逢六合彩金多寶日, 投注站雖然人山人海, 仍阻隔不了市民前往追逐黃金夢.

以前公司啲同事, 有時興之所致會柴娃娃夾份買, 如果冇心水號碼, 就會將自己三圍數字生日日期組合嚟買, 買完之後, 大家就各自發夢, 如果中咗就會點點點, 假如第二日見唔到人就代表發咗達唔駛做.

翌日, 又見到一個二個返公司, 好明顯大家嘅名字冇出現喺富豪榜.

每次美夢落空, 大家都互相打趣, 一定係某某嘅三圍報大數, 又或者係阿邊個嘅歲數報細咗, 總之一定有嘢賴, 好鬼好笑.

有次當家興致勃勃叫我噏三個數字, 佢又噏三個, 跟住買咗一注六合彩. 結果佢三個字中晒, 我一個字都唔中, 激死佢.

自問冇橫財命, 所以除咗偶一為之夾份玩吓嗰啲, 從未萌生任何博彩念頭.

曾經聽過, 中奬者嘅獎金, 乃來自全港市民投注嘅錢, 要得到咁多人嘅錢, 係要好多好多福份先至承受得起, 若然命中並冇此福, 咁就要付出代價來抵消. 例如聽過有人中獎後, 自己或家人相繼出事.

我相信富貴由天, 誇張啲講, 注定你係富貴命, 個天一定搵機會將錢跌入你口袋內, 而毋須自行去求財望發達.

其實只要有瓦遮頭, 三餐有着落, 身體健康, 生活愉快愜意, 平平淡淡過一生咪仲好, 有時唔係有錢就代表快樂. 睇吓幾多名門富戶為爭產而對簿公堂手足相殘親情決裂嘅個案, 就知道有錢亦有有錢嘅煩惱.

寄語嗰啲望天打卦嘅人, 還是安安份份靠自己拼搏所得到嘅更為實在, 有健康體魄有精力有動力去掙錢嘅人, 其實都係一種福氣.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

233^#

發表於 17-7-19 08:57 |只看該作者

原來劉濤唱歌咁好聽, "紅顏舊"算係近年來最喜愛嘅其中一首歌.

講到好似同佢好熟, 其實都係睇咗"瑯琊榜"至開始認識佢.

講返首歌, 第一次聽係劇中郡主與林殊相認嘅一幕, 一句林殊哥哥, 然後含淚愛憐地輕撫愛郎臉龐, 一切盡在不言中. 幕後淡淡播出呢首歌, 歌詞配合意境, 說不出的淒美動人, 渾然置身劇中, 久久未能釋懷.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

234^#

發表於 17-7-20 11:55 |只看該作者

當家連續幾日到幾間大機構面試, 返來時滔滔不絕述說見工時嘅情況.

話明大機構, 通常人工低要求多, 唔係點刮埋啲民脂民膏畀高層享用吖, 所以列出嘅工作性質都非常苛刻, 低級人工做高級職務, 幾乎上天下海樣樣皆要做. 當家因而沉不住氣, 當場就反唇相稽, 差在未拍檯而起揚長而去.

見佢講到眉飛色舞, 自以為不為五斗米折腰而顯得清高, 又因多次反問令面試官面有難色而洋洋自得. 我潤佢 : 我知你唔急, 想慢慢搵, 不過你寄得履歷, 即係對份工有興趣, 人哋約得你去面試而你又肯去, 即係你都諗住會做. 如果抱住玩玩吓, 人哋請你都唔會做嘅心態去面試, 咁不如慳返啲車費唔好去啦. 唔志在係你嘅心態, 唔係你嘅態度, 話晒你而家係求人, 幾唔滿意都要好頭好尾做埋場戲先散, 真係請你先搵個理由推咗去, 冇必要搞到對方咁窘. 人哋寸起上嚟都可以窒你咁唔志在就唔好嚟見吖笨, 盞你冇癮. 你自己話嘞, 換轉你請人, 想請個聽聽話話乜都係係係嘅人好吖, 定係請個乜都窒頭窒勢嘅人嚟寸自己好呢? 你就算做嘢叻到曉飛, 可是咁嘅態度邊個敢請你吖, 所以落選乃意料中事. 唔該你好好反省, 第時見工唔好又故態復萌.

我係咪要將啲米收去第二度, 畀個剩得幾粒米嘅米缸佢睇, 話佢知就嚟冇飯開, 等佢唔好大安旨意仲有好多米糧而唔折腰呢.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

235^#

發表於 17-7-21 14:08 |只看該作者

以前諗都冇諗過自己會識整麵包, 多得youtuber嘅教路, 令我手法愈來愈純熟, 只要唔好落啲九唔搭八嘅材料, 基本上每次都能成功烘焙出一底包.

用麵包機, 由於有一定重量限制, 所以唔能夠隨心所欲想整幾多就幾多, 一定跟足提供嘅份量, 最多只能稍為加少少或減少少, 整體上都唔能夠太大改動, 而且出嚟嘅形狀都係方包型.

雖然佢有個模式係可以畀時間你喺中途釀入餡料, 但係焗起後咪又係方包款, 有時睇得多都會有啲厭.

記得初時用呢個模式, 可以用手忙腳亂嚟形容, 因為當時仲未掌握到麵粉嘅受水性, 肉眼見到仲好乾, 就係咁加水, 但原來要經過搓揉一陣後先至因應情況加水, 點知我預先加咗好多, 結果麵糰濕漉漉不能成型, 另一邊廂麵包機又發出咇咇響提你要喺限時內將包放入機內, 時間關係, 唯有不斷加粉又加粉, 可以想像出到嚟嘅包係咩水準啦.

焗爐焗就唔同, 可以隨自己所好造型, 圓又得扁又得, 大大個或迷你版都得, 而且恃住工多藝熟, 所有份量都係斷估, 麵粉與水嘅比例只靠手感就知如何酌量添加減少, 所以已好少再發生不能成糰嘅失敗例子.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

236^#

發表於 17-7-22 10:00 |只看該作者

今日係大暑, 照慣例又要煲冬瓜去濕茶.

以前會去藥房執去濕茶, 十蚊八蚊就有一大包, 每次買, 店主都會問有冇跟冬瓜煲, 有又點冇又點呢? 佢話如落冬瓜, 就會執埋蓮蓬, 否則就冇蓮蓬, 原來普通一煲去濕茶都有講究.

後來覺得藥房嘅份量唔及得雜貨店一包包咁抵, 所以就轉咗買一包包現成. 有人話藥房執嘅會較新鮮, 一包包嗰啲唔知放咗幾耐, 冇所謂啦, 至緊要平嘛.

相熟中醫師曾經教過, 大部份中藥材煲之前都唔駛洗, 唔係嘛? 好多中草藥都採摘自山林野外, 呢啲地方滿佈泥濘塵垢, 然後又將藥材攤喺地上晾曬, 當中有可能被踐踏過, 馬路邊沙塵滾滾烏煙瘴氣勁污糟, 點可能唔洗就咁煲? 煲完點飲得落口? 啊! 唔通大部份中藥之所以咁深色, 係因為當中夾雜沙沙石石? 雖則我提出種種疑問, 醫師依然強調唔駛洗, 話洗咗會失去部份藥效, 假如嫌唔乾淨, 飲至底部就將之倒掉, 因為污垢物多數會沉底.

最初我都有跟佢吩咐唔洗, 不過飲嘅時候一諗起與泥同飲, 不期然就想吐, 一兩次之後, 真係過唔到心理關口, 所以照洗可也, 斷估點都冇可能洗得晒所謂藥效啩. 不過只係約略沖洗幾下, 雖然未必乾淨, 總算聊勝於無. 唔知係咪心理作用, 洗過之後, 煲出嚟嘅色較為清澈, 冇之前咁混濁, 而底部沉澱嘅沙石亦比之前少.

平時一包去濕茶內, 只得一朵蓮蓬, 今次呢包, 居然有五六朵, 都唔知有冇害. 但又冇理由自行抽起, 就算抽起都唔知點處置, 所以冇理, 照常煲就算, 希望唔會有不良影響啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

237^#

發表於 17-7-23 09:34 |只看該作者

吾兒尋晚瞓覺前仲係一號風球, 今早起身已經八號, 佢以為發緊夢, 未試過唔知有三號卻已經掛八號.

通常看似冇乜料嘅風, 其實威力驚人, 不過可能我呢邊唔係風口位, 所以唔覺得大風, 只係間中傳來一聲半響風聲, 加上又冇乜雨, 完全唔覺要掛八號嘅必要.

假期至嚟打風, 好多打工仔應該幾失望, 唔只冇得外出遊玩行街街, 亦少咗一日額外假. 根據以往, 一般快來嘅風亦會快去, 所以今日之內應該會除風, 除非改變路線, 否則幾難逗留多一日.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

238^#

發表於 17-7-24 10:26 |只看該作者

本帖最後由 cforchat 於 17-7-24 10:28 編輯

當家唔認同我話佢面試落敗係因為寸嘴, 佢辯稱轉述畀我聽時多多少少加咗幾分浮誇, 其實面試時係循規蹈矩, 所以應該唔關態度囂張事, 不被選中最大可能因叫價超出所定嘅價錢.

唉, 咁咪又係另一條死罪.

舉例, 如果間公司已寫明人工係1000-2000, 跟住又問你期望幾多, 偏偏你又唔識死叫價3000, 人哋就會心諗, 請個樣樣皆能嘅超人頂多都係畀1500-2000, 面前呢條友樣樣皆不能竟然夠膽死想3000, 假如畀1000, 佢表面可能會勉強屈就接受, 但肯定唔甘心, 到時做得幾日貨仔就話有第間公司出得起3000而走人, 咁公司豈不是白白蝕咗培訓兼浪費時間又要請過另一人, 唔好嘞, 都係揀啲期望2000以下嘅應徵者, 做唔做得嘢都係其次, 廉價行先.

同理, 我以前請人時, 老闆定咗所聘請嘅職位係1000, 我亦會照登1000, 有啲應徵者會自己加上期望薪金一欄, 假如超出1000, 就算已括住可商量, 就算佢嘅條件符合所需, 我多數都唔會考慮, 原因同上面一樣.

當家強調, 其實佢根本冇諗過坐地起價, 始終係接受咗所登嘅價錢至去應徵, 怪就怪嗰啲人係都要問佢期望幾多人工, 佢已經問乜唔係你哋已經定咗個價咩, 佢哋話唔係㗎, 你可以期望高啲㗎.

嗱, 就係咁, 令入世未深嘅當家着咗道, 死因完全非戰之罪.

我唔明點解呢啲公司, 既然有個定價, 又何必假民主畀人有個假希望呢, 你問得我, 我自然想高啲人工㗎啦, 人望高處都好正常啫, 點鬼知超出你所定嘅暗盤價就乜都唔駛講, 直頭冇機會啫. 唔怪得有幾份工只打嚟問期望人工, 只要超出就冇晒下文, 連面試都冇, 分明喺度陰人.

我叫當家引以為鑑, 下次遇有咁嘅情況, 假如份工唔係豬頭骨, 假如都想做份工, 就唔好望高一線嘞, 乖乖跟佢哋嘅定價, 可能較大機會入到門檻.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

239^#

發表於 17-7-25 10:44 |只看該作者

之前朋友考我嘅耳王十四一心猜一字, 今次輪到我出題考佢.

本身對猜字謎語好有興趣嘅佢, 一聽到我畀字佢估, 即刻興奮地叫我放馬過去.

學佢咁, 先清一清喉嚨, 然後不徐不疾 : 聽住嘞喎, 米.... 田.... 共..... 估一個字.

佢嘅反應先係瞪大對眼, 然後隨手執起張紙, 稍稍摺皺, 跟住扔向我, 問我係咪玩嘢.

咩啫! 佢嘅耳王十四一心又何嘗唔係玩嘢之作, 呢啲叫禮尚往來.

講起米田共, 第一次聽嘅時候, 係睇"民間傳奇", 當時有個單元係講唐伯虎點秋香.

話說由鄭少秋飾演嘅唐伯虎, 一次搭艇時, 與撐艇嘅小伙子閒聊, 問對方叫咩名, 唔記得小伙子係沒名沒姓定係姓米, 總之唐伯虎隨口幫佢安個名, 叫做米田共, 小伙子仲歡天喜地話第時就有名字可以話畀人聽佢叫米田共.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

240^#

發表於 17-7-26 12:21 |只看該作者

狗狗開始返老還童, 愈來愈搗蛋.

佢哋嘅天性係會挖鬆泥土將食物藏起, 咁佢被養在家中, 冇泥土可挖, 所以每當畀嘢佢食, 佢習慣先將食物叼往沙發, 然後在角落吐出, 跟住用前抓不斷挖不斷挖企圖要收埋食物, 但係沙發又唔係泥地, 無論點挖都係徒勞無功, 日子有功, 如何經得起被佢不時地以尖爪狂挖吖, 因此已經換咗幾套沙發嘞陰功.

不過而家佢好少會將食物收起, 多數即場搞掂, 所以鮮有再見到呢個情景.

但係唔收食物, 唔代表佢會收手, 佢依然成日跳上沙發用抓狂刮, 見佢無目的在刮, 我哋就會加以阻止, 佢無奈走狗, 我哋就冇理佢. 未幾, 聽到房中床上傳來刮聲, 原來佢正在床上刮, 又上前喝止, 佢又走狗, 跟住輪到吾兒嘅床, 佢又在刮, 搞到我哋疲於奔命罵聲四起, 想點呢佢?

每當聽到佢刮時, 我即刻入去, 二話不說望住佢, 一人一狗對望咗一陣, 佢就識時務地踱去窗台望風景, 當我背轉身, 刮聲又響起, 激鬼死!

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用