第九節：
Big Day，我望住一片田園，身處一間鄉村大屋之中，感覺非常surreal，好似發緊夢。
我由細到大都無憧憬過既婚禮，今日竟然用呢個方法實現。
我回想起我同Bruce相識時，我仲係一個學生，而佢係一個有錢道友。
今日，我已經係職業女性，而佢係一個萬事都為我著想既男人。
十年後、廿年後，我同佢，又會變成點呢？
引用著名心理學家Carl Jung一句：The meeting of two personalities is like the contact of two chemical substances: if there is any reaction, both are transformed.
對，我同Bruce，都transformed了很多，才能到今日。
Bruce迷信，結婚前一日大家唔應該見面，佢出左去鎮既酒店住左一晚。
媽媽前一晚同我上頭，雖然當日早上無中國儀式，但佢點都要幫我上一上頭。這位好媽媽，一生都富貴衣食無憂不用勞碌，知書識禮有教養，一生都有爸爸愛護同我地既尊敬。佢話，佢條命真係好到無人有，直頭係太好，所以個天要奪走佢一D野，就係我家姐，要佢白頭人送黑頭人。（之前post講過，我家姐抑鬱自殺離世，對全家上下打擊好大）佢幫我上頭時，佢話：「你地三個細路係我一生最重要既野，我願意放棄所有錢財健康，去換返你地三個整整齊齊，但我都知無可能，咁我想用我餘下所有既福氣，都比晒你呢個女，我可以咩都唔要，最緊要係你。」媽媽一世都未講過咁肉麻既說話，佢一講，我就喊。
其他detail，我真係唔太記得。
大家會疑惑，Bruce係咪真係騎馬進場呢？我當然唔比佢咁做，無馬在場。
Florence無崩潰，佢頂住做埋果一日姊妹，後來有人同我講返，佢成程睥住Robin。
Live band奏音樂，大家係花園就坐準備，我同爸爸、伴娘係客廳等，準備一陣行出去。
我咩都唔記得，只係記得我個心跳得好快，腳好軟，手好震。
然後行出去，踏出人生中非常的重要一步。
見到遠處既Bruce，著住禮服，梳好頭髮，剃乾淨鬍子，執正晒，其實佢又真係幾靚仔有型。雖然平時佢有時好似乞衣。
我唔記得自己有無笑，有無呼吸，記得捉爸爸手臂捉得好實。
在場有好多人，親戚、朋友、同事們，有些是Bruce工作上相識的人，都是有頭有面。
我記得我諗，如果呢一刻我緊張到嘔，會否太樣衰呢？手心直標汗。
爸爸將我交比Bruce，果一刻，我有D暈。
Bruce捉實我，拍一拍我手背，佢知我好緊張，安撫我。但其實佢都直標冷汗，佢都好緊張。
神父開始證婚，我一句都聽唔入耳，只係望住Bruce，扮笑得出。
然後，到佢講誓詞，佢一路講，一路強忍眼淚。
到我講我既誓詞，我感覺自己喉嚨乾涸，聲音沙啞，口震震咁講晒。
終於，證婚儀式完結，我鬆一口氣，大家可以食野、飲酒、跳舞、玩跳彈床喇！
Party開始，live band又奏音樂，我地帶頭跳第一隻舞，真係緊張到暈。但一路都有Bruce捉實我，不停話我表現好好，又不停問我佢今日靚唔靚仔，係咪可以做明星，係咁講無聊野令我笑。
大家坐低食下野，又有人跳下舞，細路仔就去玩跳彈床，我地周圍同人social影相，好開心。突然，Robin話要make a toast，咁大家就靜落黎聽佢講野啦。
呢個六尺高既大男人，同Bruce果然係兩兄弟，開頭都講得幾風趣，然後講到佢地童年往事，忍唔住眼濕濕咁講唔到落去，然後將個波拋比Bruce，叫佢自己講下。
我真係驚，因為我地無準備speech，即興唔知佢會講D乜，咁佢講完我又洗唔洗講呢？
Bruce拍下Robin背脊，然後企起身，笑笑口咁有D不知所措，當時佢已經有D醉。
我都唔知佢會講D乜，但我知有人幫我地拍緊video，呢一段片佢以後睇返，相信佢會無限尷尬。（續）
！我真係中毒太深了!
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
