吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 興趣嗜好› 閒來無事說些事.....

興趣嗜好今日: 0|主題: 123970

收藏本版

回覆發帖

返回列表

跳至頁

樓主: cforchat

[其他] 閒來無事說些事.....

[複製鏈接]

11 121314 15...43

cforchat

大宅

積分: 2720

241^#

發表於 17-7-27 10:23 |只看該作者

本帖最後由 cforchat 於 17-7-27 10:25 編輯

雖然白天酷熱, 但係晚上居然可以連風扇都唔駛開咁滯, 我都要讚自己與吾兒犀利.

不過我較為遜色, 上床時要先開一陣風扇, 然後設定時間掣大約半小時至一小時停, 只要身體處於靜止狀態, 通常都可以一覺瞓到天光. 係偶然半夜要去小解, 由於郁動嘅關係, 有時都覺得熱, 於是又會開半小時風扇, 其餘時間基本上都係藉由窗外吹入嘅自然風.

吾兒仲利害, 連一個半個小時都唔駛開, 唔只唔覺熱, 仲話涼風陣陣好爽㖭. 當家靠嚇, 話吾兒間房涼風陣陣可能有嘢, 我話有嘢嗰啲叫陰風陣陣.

吾兒話可能我張唔係竹蓆冇咁涼爽, 所以至要開風扇驅驅熱, 提議我都換竹蓆, 瞓上去涼浸浸, 連風扇都可以慳返.

唉, 你估我唔想㗎咩, 不過暫時唔換得住.

本來呢, 我都係竹蓆床, 可是用唔夠一年, 就畀狗狗呢位老狗家喺百無聊賴時咬爛啲用嚟穿串住嘅膠線, 開頭爛嘅幅度唔大, 仲可以用膠紙黐住缺口, 以免漫延開去. 點知佢咬開有條路, 總係趁不被注意時咬吓呢忽又咬吓嗰忽, 咬到津津有味不亦樂乎. 結果缺口愈來愈多, 成張竹蓆幾乎完全解體, 竹塊零散破碎, 嚴格嚟講已經唔算係一張床, 只好扔掉換過較便宜嘅普通蓆, 一來一回唔見幾嚿水.

至於點解冇提當家? 鬼咩, 條友怕熱到死, 豈能容許咁熱天時連風扇都唔開吖, 所以佢一見間房風扇靜止不動, 就執拾細軟到廳中留宿於沙發, 全晚風扇吹不停.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

242^#

發表於 17-7-28 11:04 |只看該作者

本帖最後由 cforchat 於 17-7-28 11:06 編輯

行街經過曾經所讀嘅中學, 部份記憶湧現出來.....

一次數學考試後, 老師當住同學們面前讚揚我考得好, 令到一個二個同學紛紛向我投來艷羨目光.

當下我抓破頭, 所有科目, 最弱就係數學, 成日都走堂唔聽書, 有乜可能考得好呀, 一定係老師搞錯.

當即記起同班有位同學與我嘅名字差不多, 佢一向嘅成績都好好, 於是大膽問老師, 考得好嗰個係咪小柔而唔係老柔呀? 此柔唔同彼柔喎, 我幾乎交白卷咁滯, 冇可能考得好㗎, 你愚弄我咋係咪呀老師?

結果考卷派發落嚟, 完全切合事實, 難有零的突破.

細個時, 母親曾經告誡好吃魚春嘅我, 喺計數方面會較差, 唔知係咪與愚蠢嘅諧音相似, 所以至有此說法呢. 我的確數口唔精, 除咗好簡單好簡單嘅加減乘除, 只要稍為複雜少少, 我就當堂企喺度, 腦筋完全轉不過來. 不過冇所謂啦, 魚春真係好好食, 唔識計數咪唔識計數囉, 對生活又冇乜大影響.

一般男仔天生對數學嘅觸覺較敏銳, 計數叻係正常, 入讀理科亦理所當然. 所以我好羨慕讀理科嘅女生, 覺得佢哋能與男生看齊好了不起.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

243^#

發表於 17-7-29 11:04 |只看該作者

當家接連收到幾家曾經往面試嘅公司通知佢獲聘, 第一間來電嘅仲係佢面試時差啲拂袖而去, 原以為名落孫山從不寄予厚望, 誰知竟然請佢. 唔通真係咁等人用? 抑或以陰謀論諗會唔會請佢返去然後慢慢玩弄佢於股掌中以報當日一窒之仇呢? (我承認我哋都諗多咗!)

由於當期時大部份冇回音, 所以佢就有殺錯冇放過大包圍式寄履歷, 跟住被約往面試. 好嘞, 而家陸續幾間話請佢, 輪到佢頭疼, 唔知揀邊間好.

人就係咁㗎嘞, 冇得選擇好地地, 一旦有得揀反而仲煩, 因為怕揀錯就冇得回頭, 兩頭唔到岸. 佢覺得呢幾間公司, 冇一間完美, 總係有一樣冇第二樣, 如能夠將幾家結合為一家, 咁就係一份筍工. (佢想得美!)

我嘗試幫佢分析, 以佢而家嘅情況, 已經唔係搏殺期, 做工, 純粹過吓日辰之時亦可幫補吓燈油火蠟而已, 唔駛坐喺屋企咁悶, 所以人工高卻辛苦嘅工就留畀啲年輕人, 叫佢安安份份喺附近嗰間做吓幾個鐘就算嘞.

但係佢總係心心不忿, 成日與當日高薪厚職作比較. 唉, 你咁比較就死啦, 人要向前望㗎嘛, 你以前幾歲而家幾歲, 當年嘅前輩被我哋取代嘅時候咪又係唔慣, 新一代頂上, 舊一代就要退下㗎啦, 呢啲係自然定律, 雖然可悲, 卻無可奈何, 你唔肯放下身段, 盞自己痛苦, 面對現實啦朋友, 往事只能回味.

觀乎佢嘅反應, 似乎並未被我勸服, 依然日日在搵工, 期望喺新工入職前能搵到另一份更好嘅工, 惟有祝佢從心所願啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

244^#

發表於 17-7-30 09:44 |只看該作者

本帖最後由 cforchat 於 17-7-31 08:36 編輯

每逢台灣有颱風, 香港多數都會受影響, 空氣翳焗, 四周被煙霞籠罩, 就咁睇已經覺得呼吸困難唞唔到氣.

以昨日又悶又熱又一滴風都冇嘅高溫, 我已經唔可以講得口響唔駛開風扇, 真係唔開嘅話恐怕命都冇.

日頭固之然風扇長開, 本應夜涼如水嘅晚上, 酷熱天氣警告依然生效, 所以唔只成晚要開住風扇, 更要比平時調高度數, 而且仲要定住, 連左右搖擺都嫌擺得慢有排未搖到過嚟.

本來吾兒仲堅持寧願打大赤肋都唔開風扇, 結果今朝見佢間房嘅風扇開住, 可見酷熱難耐.

既然明知全晚會開風扇, 於是翻當家嘅牌子, 恩准佢入房, 費事一間屋同時開三把風扇咁嘥電.

天氣預告明天會落雨, 希望冇錯啦, 到時就可較涼快, 唔駛咁翳熱.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

245^#

發表於 17-7-31 09:09 |只看該作者

每次月事到來前, 肚總係谷住谷住陰陰痛, 好唔舒服.

不過我算好彩, 唔舒服嘅程度只係小菜一碟, 有朋友次次痛到休克咁滯, 要煎熬幾十年, 都咪話唔淒涼.

所以話做女人一啲都唔着數, 除咗每月嚟緊幾日悶悶哋, 來前幾日要醞釀, 來後幾日又要等佢慢慢走, 一個月下來, 真真正正have a nice day嘅日子根本冇乜.

有時親戚到訪好鬼陰濕, 完全唔跟日子, 想佢早嚟又遲遲未至, 想佢遲嚟就提早殺你一個措手不及, 搞到有時防不勝防漏咗底都唔知.

我諗好多女生應該經歷過漏底嘅尷尬場面, 尤其是初期日子唔穩定, 有同學試過沾濕校裙不自知而被年少無知嘅男同學驚為天人, 我見過考場有女生條牛仔褲沾污, 本想上前告知, 點知人來人往轉吓頭就唔見人. 我自己亦唔例外, 完全無知無覺地招搖過市, 後面仲要有幾個男同事尾隨, 要不是有師奶好心告之, 睇怕全條裙染晒色仲戇居居. 事後當面對嗰班男同事時, 總有啲唔自在, 一諗起佢哋曾經見到我血染的風采, 就希望個天令佢哋過目即忘.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

246^#

發表於 17-8-1 08:47 |只看該作者

本帖最後由 cforchat 於 17-8-1 08:52 編輯

睇過一本書, 當中內容引述印度一位大師嘅四句話......

1. 無論你遇見誰, 他/她都是對的人
這意味着, 沒有人是因為偶然而進入我們的生命, 每個在我們周圍, 和我們有互動的人, 都代表一些事, 也許要教曉我們甚麽, 也許要協助我們改善眼前的一個情況, 他/她的出現是為我們而來的.

2. 無論發生甚麽, 都是唯一會發生的事
我們注定要經歷的事, 不可能以其他方式發生, 即使是不重要的細節. 所以並不存在要是早知這樣就不選這個的說法, 因為在那刻所選的, 正正就是唯一要發生的, 這樣才能讓我們從中學習汲取經驗, 以便向前邁進. 生命中, 我們所經歷的每一個細節情境, 都是因應我們的定數而作出完美的配合, 即使它完全不符合邏輯與常理.

3. 不管事情開始於哪個時刻, 都是對的時刻
每一件事情發生, 都是在對的時刻, 不早也不晚. 姑勿論你有否預備, 只要一到生命中要經歷某些事的時候, 它就準備開始. 所以在對的時間內遇到的人和事也是對的, 至於這些人和事是否對你的心, 則視乎命數而定.

4. 已經結束的, 已經結束了
生命中遇上一些人一些事, 而後離你而去, 是為了幫助你進化至另一更高境界, 所以擁有時要珍惜, 失去時要放手, 已然結束了的就該放下.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

247^#

發表於 17-8-2 09:31 |只看該作者

上次講到經過學校憶起嘅校內片段, 另有一段亦較為深刻......

話說呢, 有一日又係上數學堂, 唔知係咪樣衰呢, 次次都會被老師叫中起身答問題, 雖然次次隔籬位嘅同學都會提水, 但係有時佢提唔切時我又唔識答就要罰企, 與其被老師問到口啞啞, 不如詐肚痛走堂.

我都知避得一堂避唔到第二堂, 不過過得一堂得一堂, 下堂等下堂至算啦.

其實我大可直接打道回府, 不過跟住嘅學科我唔想錯過, 費事啦, 數學科肯定已經凍過水, 如果其他科都滿江紅實畢唔到業, 到時又要再輪迴上數學課, 不如殺咗我好過. 所以只好咬實牙關捱埋去, 爭取其他科高分數, 望能拉上補下, 但求平均分嘅水平未至於要留級就阿彌吉帝.

攞住幾本書到附近一個休憩處, 話就話溫書, 其實邊有咁勤力吖, 手中有書心中無書, 對眼周圍望, 鮮有聚焦喺書本中, 一啲都唔專心.

望吓望吓, 見到同班一位男同學行緊過嚟, 咦咦!! 唔通佢又好似我咁走堂過嚟蛇王, 不過做乜鬼人嚟呢度佢又嚟呢度㗎, 可唔可以去第二度呀佢.

我唔想畀佢知我望到佢, 所以就耷低頭埋首書本中, 外人唔知以為我正聚精會神睇緊書, 其實我根本睇唔入腦, 因為一副心思正在暗暗唸 : 唔好過嚟呢邊唔好過嚟呢邊唔好過嚟呢邊.........

耳邊傳來一聲hi, 我只好無奈地抬起頭望住佢回聲hi, 跟住就繼續睇書. 我以為佢因為撞到熟人而過嚟打招呼, 打完招呼應該會行開, 點知佢直頭坐正我隔籬, 想點呢佢? 我又應該點呢? 即走顯得冇禮貌, 唔走又唔自在......

正在十五十六間, 突然佢嘅聲音細細響起 : 不如畀我喺度陪你睇書吖!

吓!? 陪.... 我.... ? ...... 我上上下下左左右右前前後後望勻晒, 都係得我同佢, 即係佢想陪嗰個人係我, 唔係我表錯情.

我禮貌地回答我唔慣有人喺側邊陪讀, 唔駛喇唔該! 跟住就忙不迭地收拾書本離開現場, 留下佢痴痴地望住我背影走遠. (我又冇後眼, 點知佢痴痴地望呢, 其實唔知㗎, 不過做戲嗰啲係咁, 我咪當佢都係咁囉)

平時喺課室偶然與呢位同學四目交投, 都發現佢正在望我, 我只以為咁啱㗎啫, 而家咁嘅情況, 睇嚟唔係咁啱, 係無時無刻嘅眼光都向住我轉, 難怪佢會追蹤而至啦.

當佢返入課室, 我偷望吓佢, 佢顯得冇厘心機一路望住我一路返埋位.

我喺心裡慨嘆, 唉, 我都想有人陪讀, 但嗰個人唔係你囉, 所以唔好怪我拒絕你.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

248^#

發表於 17-8-3 11:18 |只看該作者

本帖最後由 cforchat 於 17-8-3 11:23 編輯

作為一位打工仔, 當家係屬於盡忠職守嘅員工, 從不遲到早退, 就算傷風感冒亦從未攞過病假, 盡心盡力做好本份, 全情投入工作中至忘我境界. 所以成日被我揶揄, 如果佢肯將工作中嘅熱誠同樣放喺屋企, 我應該會好幸福. (言下之意, 即係我日日身處水深火熱之中.)

就係知道工作可為佢帶來滿足感, 所以自從佢因結業而整日賦閒在家無所事事百無聊賴, 見佢將近變成一位孤獨老人, 我就勸佢快啲搵嘢做, 一來既唔駛浪費好員工嘅人材, 二來有工作寄託就冇咁易鬱出病.

事實上, 佢由一開始就已經搵緊, 不過見冇乜回音所以無癮至稍為冇咁戮力, 聽見我咁講, 佢又活躍起來每日到求職欄搜尋合適工作.

知佢心頭高, 一定會專攻人工高嘅工, 雖然錢冇人嫌多, 但係今時今日, 人工高嘅又點會唔辛苦吖, 所以我定咗條件畀佢 : 工作地點不能太遠, 工時不能太長, 工作性質不可太辛苦...... 只要符合呢幾點, 人工幾多都冇所謂.

話就話列咗條件, 但睇佢嘅款依然心繫人工高, 仲話只要人工高就唔怕辛苦喎. 唉, 有時都唔知佢個腦諗乜, 呢刻就話只要他條人工少啲唔計較, 轉吓頭又話趁仲有氣有力搵多幾個錢, 今日話想搵啲輕鬆啲嘅工種, 聽日又嫌輕鬆嘅工人工相對少...... 一時一樣, 佢就嚟思覺失調.

好嘞, 喺前路茫茫之時, 忽然露出曙光, 幾間公司都請佢. 正常情況下, 都應該感到欣慰, 話晒終可告別搵工嘅日子嘛. 但係佢並唔係咁諗, 喺佢角度, 請佢嘅都係豬頭骨公司, 唔係好想做.

見佢可能係處於魚與熊掌之間而難以取捨, 所以我同吾兒都一齊幫佢分析, 等佢易於喺豬頭骨中揀一間易啃啲嘅, 當時佢都聽我哋嘅意見, 不過轉吓頭又諗咗去第二度, 真係唔得佢死.

一日兩日後, 人家要確認你係咪返工嘅日子愈嚟愈近, 喺佢依然搵工, 但全部冇下文嘅情況下, 佢唯有接受我同吾兒嘅意見, 揀咗一間我哋認為較好又較近嘅公司.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

249^#

發表於 17-8-4 09:41 |只看該作者

如果我話減肥係女人畢生嘅事業, 相信應該唔會有太多人反對.

自問自己屬於中等偏肥, 但個個朋友就話我係中等偏瘦, 呢啲觀點與角度問題就無謂爭拗. 嘻嘻, 反正無論偏肥或偏瘦, 最緊要係一字記之曰靚就得嘞.

打從被稱呼肥妹仔開始, 我就積極進行減肥, 天堂式或地獄式都試過. 何謂天堂式呢, 即係一路食一路話食埋今次就減, 結果梗係得個吉啦, 體重只有更重沒有輕些, 未發育已滿身肥膏. 至於地獄式就係狂做運動加節食, 不過對於一個發緊育嘅人嚟講係一件非常折磨嘅事, 肚餓好難忍, 尤其是我要負責煮飯, 美食當前如何頂得住, 況且運動又辛苦, 結果又係減得幾減就半途而廢.

然後, 又聽朋友推介試食營養奶粉, 佢嘅論點係雖然量少但足夠令我有飽肚感, 結果因為飲極都唔飽就自行加倍, 計算下來, 原先一餐只需數元, 因為我加碼變相變十數元, 肥未減荷包已縮水, 實在唔划算, 於是又不了了之.

又試過跟美容書嘅食肉減肥法, 每日不沾澱粉質只食肉類, 只係一小段日子, 卻不時出現頭暈眼花金星亂冒眼前一黑心跳忽然加速嘅現象, 嚇到我急急回復正常飲食, 唔敢亂節食.

所謂減肥, 對我嚟講卻愈減愈肥, 令原本所穿著嘅大碼衫全部要扔掉換晒加大碼, 好有挫敗感.

坊間有好多減肥餐單, 就算講到幾有效又冇副作用, 我都未試過跟從, 唔係信唔過, 只係覺得餐單嘅食物過於清淡, 似吊命多過減肥, 人生苦短, 就算未能嚐盡珍饈百味, 都唔好過於難為自己.

千帆過盡, 最後我決定唔再減, 肥瘦轉頭一場空, 如果命格使然係肥嘅就由它順其自然吧.

可能係抱住豁出去嘅態度, 心理上再無任何顧慮, 隨意地飲飲食食, 咁樣反而令體重一直保持穩定 (嗱! 千方百計減極都唔瘦嘅人唔好打我呀吓!), 實在始料不及.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

PanCecilia

大宅

積分: 1291

250^#

發表於 17-8-4 15:39 |只看該作者

已開抽濕機

私人傳訊回覆引用

cforchat

大宅

積分: 2720

251^#

發表於 17-8-5 11:00 |只看該作者

本帖最後由 cforchat 於 17-8-6 17:06 編輯

一個九歲女孩歌聲驚四座, 本來應該為佢喝采, 但係念及過於早熟嘅行為, 又似乎應該為佢慨嘆, 惋惜失去九歲應有嘅童真.

唔排除小女孩本身都係鍾意唱歌, 而咁啱又有位老師爸爸可從旁指導並加以重點培訓, 致使天賦好嗓音能展現於世繞樑三日.

不過夢想歸夢想, 都要顧及女孩嘅身心發展, 本應在學過住無憂無慮嘅學生生活, 卻要因頻頻出賽而奔波勞碌, 到底係為咗滿足大人嘅虛榮心, 抑或係為實現小孩嘅少年夢?

未成熟嘅小朋友猶如一張白紙, 要染上咩色, 好視乎身邊人嘅諗法, 尤其是生身之父母, 偶一失去方寸, 就會令呢張白紙塗上污點.

本來, 成件事其實如果大家都處理得好好安排妥當, 冇影響女孩嘅作息時間, 根本唔關身為局外人嘅我哋事. 不過有時見到幾歲人仔又濃妝又高跟鞋對答又老積, 唔多唔少會感到不忍觀之.

幾歲就要出嚟行走江湖見識世面籠罩於鎂光燈下, 究竟十年八年之後, 會更上一層樓, 定係一切歸於平靜, 只有拭目以待.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

252^#

發表於 17-8-6 17:47 |只看該作者

本帖最後由 cforchat 於 17-8-6 17:49 編輯

* 大姨媽明明到咗門口都唔入, 只係探吓個頭望吓就走, 等我仲預備咗啲茶點招待佢㖭, 嘥晒! 佢之所以過門而不入, 一定係受更年期先生嘅指示, 先過嚟同我打聲招呼, 好快就會過嚟長期居留, 要我好好準備迎接.

* 繼早前中咗鳥糞, 最近又被砸中, 今次真係離奇, 位置居然喺肚臍對上少許, 搞到件衫留下污跡. 點可以越過頭部直落至肚臍處? 唔通係橫向發射, 但我完全見唔到鳥影喺我面前飛過喎.

* 聞名已久嘅梳乎厘第一次跟老師做, 唓, 出到嚟嘅外型咪即係熱香餅, 梳咩乎厘啫. 當家話好正, 吾兒吃後話好梳乎, 狗狗食完嘴舔舔. 食譜係一人份量, 我就x3做三人份, 不過都唔夠食, 原來漏咗計狗狗一份, 下次要x4至得.

* 中午滾湯送葱油餅, 煎至最後一塊時, 掛住將餅平鋪覆蓋油面而冇留意手指已觸及熱油中, 結果由大腦傳來一陣劇痛而連忙縮手, 好在旁邊有一盆水, 即刻將手放入水中降溫, 不然一定起水泡. 而家被灼嘅部位變咗白色, 仲好痛.

* 冇見好耐嘅一位朋友, 臉上長咗一顆大孖瘡, 食緊嘢時千祈唔好望, 會令人倒胃口. (明明得一顆, 為何叫孖瘡? 自言自語中......)

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

253^#

發表於 17-8-7 10:43 |只看該作者

讀書嘅時候, 好多同學都鍾意蔡楓華, 成日芹菜(Ken Choi)前芹菜後, 又會將佢嘅相片放入銀包, 一有時間就攞出嚟望, 真係少女情懷總是痴.

我就從來未鍾意過佢, 雖然佢後生時嘅樣唔係差, 但係唔知點解由始至終對佢冇乜好感. um...... 真係要夾硬搵理由, 應該係唔鍾意佢個嘴, 望落去予人一種唔開心嘅感覺, 就算笑都認為係苦笑, 一啲陽光氣息都冇, 加上覺得佢嘅髮型嬲休, 所以就唔鍾意.

不過就勁勁勁鍾意佢嗰首"青春三重奏", 熟到能背誦如流......

彼此算是朋友
總有訣別時候
許多苦惱在我心
最恨回首
即使你未留意
只見世事如舊
可惜只有是我苦
決在場中退後
火中抽出鐵棒
我知道燒傷了一對手
你莫憐憫
使我自覺悲和憂
今天燒傷卻是我
也不要他朝各自難受
我自離去
苦楚我願隻身承受
不必再度懷念我
不要再度懷舊
今天的我夢已醒
向著回路走

呢套劇我只係斷斷續續睇過吓, 冇正式由頭到尾睇晒, 聽講劇中蔡楓華嘅角色係鄭丹瑞嘅寫照, 對心儀嘅女仔愛在心裡口難開, 比起主動出擊嘅對手兼老友, 的確較輸蝕, 所以最終只好選擇離場.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

254^#

發表於 17-8-8 11:18 |只看該作者

由吾兒對周圍嘅事物開始有反應開始, 我哋就不斷同佢傾偈, 尤以晚上最多, 因為要陪瞓, 所以就爭取喺呢段時間同佢溝通, 藉此增進親子互動. 有時唱歌, 有時講故事, 有時則純粹講吓嘢. 雖然佢仲未識回答, 但見佢每次都好專心聽, 眼仔碌碌手舞足蹈, 應該幾享受呢段相處時光.

唔知係咪日子有功潛移默化, 致令佢長大後口齒伶俐轉數快呢, 如果係, 我都算功不可抹.

初初佢未有咁大反應時, 多數播放兒歌畀佢聽.

到開始牙牙學語, 我就真人唱歌畀佢聽, 一來當催眠曲二來又可讓我一展歌喉.

多數得一曲走天涯, 只識唱"在森林和原野".

開頭佢只係聽, 聽得一排之後, 我嘗試唱一段睇吓佢識唔識得接落去, 好小子, 居然記得.

例如我唱 : 在森林和原.... 跟住停喺度等佢接, 佢接完個野字之後, 我又繼續唱 : 是多麽的..... 佢就接逍遙...... 喺我唱吓佢接吓之下就唱完首歌, 熟咗之後二人就大合唱.

此舉既可訓練佢記憶力, 又可同佢更親近, 我自創呢個方法算幾成功.

當佢再大少少講嘢有紋有路, 我開始灌輸生活上一啲知識畀佢, 同佢講邊啲啱邊啲錯, 讓佢可早日銘記於心.

例如有次嘅話題係講吸毒, 我同佢講, 萬一將來有損友以激將法話佢唔敢吸毒, 千祈唔好中計逞英雄去吸, 無論人哋點勸點激都要意志堅定不為所動, 因為一旦吸上第一口就會上癮, 後患無窮.

為咗令佢更易明白, 於是我同佢玩角色扮演, 我扮佢, 佢扮損友.....

佢以童稚聲音講 : 喂! 朋友, 試吓呢啲吖.
我就扮低b聲音 : 咩嚟㗎?
佢一本正經答 : 毒品!
我 : 哈~ 哈~ 哈~ 冇人會咁直接講係毒品㗎, 你應該講好嘢嚟㗎, 咁先至會引人上當吖嘛..... (跟住就take two再嚟過)

每次提起呢段回憶, 我同吾兒依然忍唔住笑.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

255^#

發表於 17-8-9 11:23 |只看該作者

身邊好多朋友都係無肉不歡之輩, 又多夜生活, 涉足得夜場自然煙酒少不了, 加上夜瞓, 所以年紀輕輕身體就多病痛, 痛風症高血壓糖尿病比比皆是, 實在令人擔心.

其實食咁多"屍體"有乜好吖, 既無益又殺生, 不過又唔能夠完全唔食肉, 始終人體都需要某啲素食缺少嘅動物蛋白質, 所以食少少足夠補充所需營養就算, 唔駛餐餐大魚大肉.

或者我本身鍾意食豆類製品, 又抗拒肥肉嘅咬感, 所以周不時以豆腐枝竹腐皮豆卜等素材做餸, 亦由於係我全權掌控每一餐, 所以當家與吾兒就算嫌清淡都不得有任何異議.

好在佢哋都認同多菜少肉呢個概念, 有時反而係我落重咗手煮多咗肉, 吾兒就會投訴肉過多, 我叫佢嫌多就益狗狗.

近年來, 除咗偶一為之出外用膳才較為放肆會點幾款肉類, 又或者間中會買份量稍為多嘅肉嚟特別炮製, 平日基本上一日三餐只得一餐有肉, 仲要十零蚊幾個人分, 其餘就大部份都係以素菜為主.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

256^#

發表於 17-8-10 09:22 |只看該作者

公司臨結業前, 上司成日帶我回國內分公司公幹, 話讓我長見識喎.

我直問 : 對我咁好, 呢啲係咪所謂嘅人之將死其言/行也善? 佢呸口水叫我講過.

一向只坐鎮於公司內, 好少有機會外出, 自從上司上任之後, 除咗國內, 亦周時叫我陪佢遊走於各區見客, 但明明我嘅工作範圍唔需要見客㗎嘛, 不過佢係上司, 我冇可能逆旨, 所以就算老大不情願, 都只能跟從.

向好處諗, 當乘機出去唞唞氣, 同埋有機會飲飲食食, 都未嘗唔好嘅. (當我喺閒話家常時向父母親提起, 父親緊張問, 上司係咪對我有意思, 我話唔會啩, 人哋幾十歲人, 咩世面未見過吖, 豈會睇上我呢啲姿色平庸之流吖, 應該係純粹想搵人陪, 唔駛一個人在途上咁悶啫)

一次, 上司話國內公司開評估會, 主要係評估員工嘅工作, 有功則勉之, 有過則訓之, 從中考量加薪幅度. 佢知我未見過呢啲場面, 所以又要我同行. 我當然求之不得啦, 比起每次上到去唔係飲就係食, 呢件顯得更為有意義.

評估會由國內幾位主管與上司主持, 開始時, 我正襟危坐, 肅穆地坐於一邊旁聽, 話晒場面咁莊嚴, 我一定要作出配合, 唔可以似之前咁談笑風生.

只見有幾位員工入內接受上級循循善導, 傾談一輪後就陸續打發佢哋出去, 跟住就冇再見人入來, 只得幾位主持人密密斟細細酌, 根本聽唔到佢哋講乜.

唔係所有員工評估㗎咩, 點解得幾個嘅? 係咪其他人唔駛評, 由得主持人自行推斷就算? 咁點叫評估, 應該叫斷估先啱喎.

雖然滿腦子問號, 但礙於幾位主人家在場, 我唔方便問上司, 所以就忍一忍好奇, 等與上司獨處時再發問.

終於有機會將心中疑問向上司表明, 仲附贈幾句潤一潤佢 : 你話帶我嚟見識咩叫做評估, 原來係你哋評, 我喺度估..... 佢哈哈大笑, 解釋因為其他部門好多同事出咗去做嘢, 要每個部門齊人至可以評, 否則對外出者唔公平.

第二日正式由頭到尾睇足全程, 老實講, 其實唔覺有乜咁特別, 可能同佢哋唔太熟, 好多甚至連姓甚名誰都唔知, 根本冇共鳴, 所以令坐喺一邊嘅我暗地裡呵欠連連.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

257^#

發表於 17-8-11 09:21 |只看該作者

當家嘅幾個同學, 無獨有偶全部嘅職業都係警察, 我問佢點解又唔當差呢, 佢霎時間都講唔到一個所以然來.

前幾個月佢哋至出嚟聚舊, 好多年冇見, 大家已經變咗好多, 明明之前仲看似後生遙遙, 再見面卻白髮滄滄, 唔通早前嘅警民衝突對佢哋影響咁深, 搞到身心疲憊, 有諸內而形諸外?

當家話當中有幾個又爛滾又爛賭, 唔係咁想同佢哋為伍, 加上對佢哋嘅話題又答唔到嘴, 例如守邊個橫頭舒服, 邊個老頂好人, 邊個更數忙到冇停手, 行咇時遇到嘅趣事等等..... 佢得個聽字, 完全冇代入感, 所以身份似搭檯多過同檯吃飯, 好冇癮咁話喎.

其實係佢唔識把握當下發掘箇中樂趣啫, 畀着我在場, 一定不斷追問佢哋在職時嘅苦與樂, 幾個人幾個個案, 講都有排講, 對於行外人嘅我嚟講, 一定津津樂聽, 點會有冷場啫.

因為嫌悶, 所以此後佢哋又搞飯局, 當家都盡量避席, 推多幾次, 佢又驚人哋會詐型, 問我點算.

我話你驚人講咪推幾次出席一次囉, 佢又話唔想貼錢買難受. 我就以講笑性質提議佢表明自己係黃絲, 喺敵我對立各為其主之下, 唔適宜出席呢啲場合, 以後人哋就唔會預你.

雖然當家讚好計, 不過由於喺朋友多次邀情下而感到盛情難卻, 所以最終都係前往相聚.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

258^#

發表於 17-8-12 09:37 |只看該作者

有一位親戚, 本身有幾個兄弟姊妹, 唔知點解, 佢對其中一個兄弟嘅女兒特別讚賞, 每次飯聚, 只要有佢與女孩同場, 佢就會當眾誇奬女孩點叻點醒, 一時又去參加電視台兒童節目, 一時又參加學校乜乜比賽..... 欣賞疼愛之情表露無遺.

喺在座其他人眼中, 人哋父母都未出聲, 唔明你會講到眉飛色舞, 另外, 你自己嘅仔女唔讚, 卻落足嘴頭讚人哋嘅女, 究竟當中有啲咩利害關係, 只有當事人至知. 計我話, 可能人哋嘅父母唔方便出面, 咪要藉由第三者把口誇自己個女囉, 咁先至唔會落得賣花讚花香嘅話柄吖嘛.

其實女孩本身冇乜嘢, 性格文靜又乖巧, 不過可能因為不斷被吹捧, 搞到親戚們個個都想睇佢點巴閉, 係咪好似親戚口中嘅入水能游出水能跳天下無敵, 係嘅話都算言不過其實, 唔係的話, 肯定會被嘲笑不外如是.

文憑試成績揭盅當日, 聽講女孩嘅分數只係不過不失, 距離心儀嘅學科連門檻都冇得入, 於是就自行到某間自資院校報讀, 據八卦者調查所得, 所報嘅院校並冇佢心儀嘅學科, 所以佢最終係咪退而求其次報咗其他科就不得而知, 反正冇人有興趣想知, 自然就冇必要求證.

正式派位後幾日, 有人與親戚閒談, 話題又落到女孩身上, 親戚又猛噴口水花讚女孩有學校收咗佢, 未來四年都唔駛交學費, 讀嘅科將來搵到食前途無限, 好叻女云云...... (下刪好多字)

聽到轉述後, 以我一知半解嘅人都知, 未獲八大派位, 即係已經衰咗. 至於有學校收, 只要肯交學費, 成績又唔算太差, 實有學校收㗎. 以女孩嘅分數被收唔難, 難就難在竟然可以免四年學費咁天方夜譚? 八大派位都要交學費啦, 自資院校反而唔駛交? 雖然真相有待商榷, 不過人哋咁講, 我咪咁聽囉, 話唔定當中有玄機非外人所知呢.

其實除咗女孩之外, 呢位親戚嘅其他兄弟姊妹嘅子女, 有啲都係大學生, 但係親戚會不屑地話 : 唓! 我阿女嘅男朋友夠係大學生啦!..... 表情語氣與三姑六婆無異.

輪到我唓, 你阿女嘅男朋友係大學生啫, 又唔係你個女, 有乜咁好吹噓啫.

同樣係子侄, 同樣有出色, 但係喺親戚眼中卻差天共地, 可見佢幾大細超.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

259^#

發表於 17-8-13 10:07 |只看該作者

好多朋友紛紛去完旅行返嚟, 一個二個都倦容滿面, 話辛苦過返工.

其實每次去旅行, 我最享受嘅時刻, 就係執行李嘅時候, 嗰種又可以飛嘞嘅感覺好好. 而喺旅程途中, 假如景點與景點之間嘅距離動輒要以小時為單位計算, 我不期然又會覺得自己攞苦嚟辛.

當然, 報團時已經知道大概行程與景點, 但係嗰時雖未出發卻已被興奮心情所蓋, 只要有得出外, 其他都唔成問題. 要等到正式身處當場, 先至能體會當中嘅苦況, 因此成日都中伏.

朋友成日勸我間中要去吓外遊唞唞氣, 以佢哋為例, 雖然每次返嚟都呻攰, 但係下次又會喜孜孜繼續出發. 無論佢哋點樣分享旅行嘅好處, 我都不為所動, 始終呢啲係個人感受, 佢哋覺得享受嘅事情, 對我嚟講未必有同感.

或者有人會話自遊行咪唔駛跟團嗰種趕鴨仔式咁頻撲囉, 自己安排行程時間, 彈性好多. 話雖冇錯, 但一啲語言不通嘅地方, 自遊行我會覺得冇安全感, 而語言可溝通嘅地方, 又大部份都去晒, 與其為咗出外而再去已經去過嘅地方, 不如留返配額去其他國家, 雖然都係要跟團, 但係話唔定相隔咗好耐之後, 又會重燃一顆熱熾嘅心情去報名.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

260^#

發表於 17-8-14 09:51 |只看該作者

驚聞族中長輩忽然過身, 全族人都感到無限唏噓, 亦難以相信事實, 早幾日仲有講有笑, 幾日後卻陰陽相隔.

長輩留下孤兒寡婦, 還幸素有積蓄, 不然就要發起籌款, 以助遺孀渡過困境.

平時與長輩一家鮮有聯絡, 近幾年只間中喺家族聚會中碰面, 所以對佢哋所知不多, 只從小道消息得知, 其長子性格倔強, 不時與父親發生拗撬, 長輩出事前, 正值兩父子又陷於冷戰中. 由於長子早已遷出自立, 所以每當遇上兩父子意見不合時, 閒閒地一年半載唔見面係平常事, 聽講二人已年多兩年未見面亦未交談過.

藉着協助長輩家人辦理身後事, 有機會與長子交談, 當談及未能喺父親還有知覺前與之冰釋前嫌時, 不禁流下男兒淚, 後悔自己忤逆, 令父親可能帶着憤恨長眠, 又後悔自己未能於父親有生之年承歡膝下, 令父親耿耿於懷與世長辭. 恁地知道愛要及時, 卻往往以為還有時間, 回頭才發現原來愛得太遲.

聽長子娓娓道來時, 我亦難免同聲一哭, 只有勸對方傷心過後要快快振作, 此後好好照顧母親, 彌補已錯過盡孝嘅時機, 亦當償還對父親嘅虧欠.

人就係咁, 往往要等到失去先至識得珍惜, 假若長輩能逃出鬼門關, 相信長子一定會因失而復得而好好孝順父親. 可惜長輩卻一去不返, 可見佢命中冇福份享兒孫福, 只能帶着遺憾瞌然而逝.

唉, 一切也是命, 半點不由人.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用