吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 興趣嗜好› 閒來無事說些事.....

興趣嗜好今日: 2|主題: 123969

收藏本版

回覆發帖

返回列表

跳至頁

樓主: cforchat

[其他] 閒來無事說些事.....

[複製鏈接]

13 141516 17...43

cforchat

大宅

積分: 2720

281^#

發表於 17-9-4 20:28 |只看該作者

哎呀! 原來尋晚係七月十四正日喎, 居然喺不知不覺中渡過.

所以話, 有時啲嘢唔知好過知, 假如知嘅話, 可能又會亂諗嘢嚟自己嚇自己.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

282^#

發表於 17-9-5 20:21 |只看該作者

朋友公司請兼職, 問我做唔做, 我話唔駛用腦嘅工就做, 要用腦就咪搞嘞.

其實我都係想推搪至咁講㗎啫, 試問而家有邊份工冇壓力㗎, 莫講話打工仔啦, 就算身為煮婦嘅我都充滿壓力㗎, 每餐又要平又要好食, 仲要成日轉款, 今日煮飯聽日炒麵後日煲粥, 淨係諗煮法都有排諗, 目的就係為咗讓三位大帝日日可嚐新, 唔駛隔幾日就重複咁悶.

唔好以為壓力只有平民百姓才能專享, 我估首富李超人一樣會有壓力, 不過平民嘅壓力基本係來自搵食, 而佢嘅壓力係點樣錢滾錢生財, 讓王國更強力.

或者人始終要有點壓力, 才能令腦筋更靈活, 冇咁易退化.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

283^#

發表於 17-9-6 21:25 |只看該作者

近年來, 好似成日發生開學冇幾耐, 就有學生自殺嘅新聞, 點解會咁呢?

以前年代, 雖然我哋都唔鍾意讀書, 臨到暑假結束前, 總係唔多樂意. 不過唔開心還唔開心, 一到開學日就自自然然會揹起書包上學去.

但朋友嘅女就唔一樣, 年年開學頭幾日總會逃學, 一時話未適應, 一時又話冇心情.

講起佢個女, 換轉係我個女, 我實行扼死佢. 都已經成年啦, 仲成日激到父母紥紥跳, 行事任性妄為, 未化行妝又話唔返學, 心情唔靚又唔返學, 面色唔好又唔返學..... 日日總有萬千理由.

朋友兩公婆呢幾年嚟畀個女玩到謝一謝, 心力交瘁, 佢向我訴苦時, 我除咗借出耳朵一對, 其他都愛莫能助.

以佢信佛嘅角度嚟睇, 佢相信個女係嚟討債, 但佢話討時討, 都想早啲還晒, 畀佢臨老過得吓人世, 自問對個女呵護順從到不得了, 諗唔通何以自己竟落得如此下場.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

284^#

發表於 17-9-7 20:47 |只看該作者

當家平時會追劇, 最近佢在追"同盟".

我瞄過幾眼, 只係一陣就出現殺人爆炸搶屍靈堂對峙, 嗰刻我以為自己回到從前睇緊家變.

我較鍾意睇輕鬆小品, 最好全劇都係風趣幽默, 不帶任何爾虞我詐嘅成份, 咁先至唔會覺得沉重, 所以我睇咗一陣就睇唔落去.

鮑起靜喺亞視做親嘅角色唔係窮師奶就係被欺負嘅女人, 講真都睇得幾悶㗎, 今次飾演一位霸氣嘅貴婦人, 我諗對佢嚟講都算係新嘗試.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

285^#

發表於 17-9-8 21:36 |只看該作者

每隔一段時候, 皮膚唔知點解會好痕癢, 一向覺得痕癢最為難頂, 如果有得揀, 我寧願痛好過痕.

所以每當痕起上嚟, 我就會狂抓癢, 嗰種抓着癢處嘅感覺好舒服, 就好似吸毒者毒癮發作, 如能及時補給, 即刻露出一臉滿足嘅神情一樣.

為咗更滿足, 用手抓完全唔夠勁, 總會搵一啲較硬嘅物件例如衣夾之類, 先至覺得能止到癢.

可是, 滿足過後跟住嚟嘅就係痛, 因為經過一輪大力狂抓狂刮之後, 皮膚表面已遍體鱗傷, 有啲甚至已因刮損而在滲血絲.

就係咁, 搞到半夜痛到瞓唔着.

或者呢啲就叫做置諸死地而後生啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

286^#

發表於 17-9-9 11:15 |只看該作者

曾經引起全城熱話嘅劇集"天與地", 我冇正式睇晒全劇, 只係不間斷地睇過吓, 同埋只睇咗大結局嗰集, 其中一段佘詩曼獨白 : 和諧唔係係一百個人講同一說話, 係一百個人講一百句唔同說話, 而又互相尊重. 仲有一句Joe Junior 嘅對白 : This city is dying...... 呢兩句正正反映而家嘅香港.

幾時開始, 港人會變得如此麻木不仁, 唔再雪中送炭, 反而雪上加霜, 喺人家嘅傷口上洒鹽.

幾時開始, 社會已失去和諧與包容, 處處充斥反對呢樣投訴嗰樣嘅聲音.

幾時開始, 人與人之間不僅難和平共處互相體諒, 更甚至係不斷人身攻擊, 完全唔顧人家感受.

幾時開始, 人們變得自私自利淡漠涼薄, 只以自己利益行先, 無視對方嘅難處.....

雖說以上人種只佔少數, 可是不知怎地, 周遭卻總有呢啲人圍繞.

舊時代嘅和諧, 舊時代嘅守望相助, 舊時代嘅太平盛世去晒邊, 何以科技愈發達, 人們思想愈腐敗, 距離亦愈拉愈遠.

唉, 難怪而家愈嚟愈多情緒病嘅人, 我唔多接觸都偶有被佢哋影響情緒, 更何況如果身處呢班人群當中, 每日要面對冷嘲熱諷尖酸刻薄嘅臉孔, 導致病情加重而走上絕路, 亦唔係冇可能嘅事.

有時人言可畏, 就如利刃般殺人於無形.

在此奉勸嗰班好舌之徒, 唯恐天下不亂之人, 為免添孽障, 都係積吓口德, 冇惻隱之心就算嘞, 拜托唔好再踹多一腳.

易地而處, 假如事件發生喺閣下身上, 感覺會如何呢?

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

287^#

發表於 17-9-10 11:38 |只看該作者

當家間中會背起相機周圍去獵影, 有時興之所至, 更會不惜負重而拎埋相機去返工, 佢話有時喺途中見到一啲特別嘅花草樹木小鳥咇咇等等, 可以影低返嚟慢慢欣賞喎.

呢日, 佢如常又揸部相機出去影影影, 返嚟喜孜孜話影咗好多新奇嘅景物, 待要放上電腦與我一齊欣賞傑作時, 先至發現先前掹起張記憶咭冇入返去.....

結果係白拍一場, 嘥料!

以前仲係用菲林嘅年代, 我偷拎父親嘅相機與同學去公園影相, 仲帶幾套衣服更換, 諗住仿傚"姊妹"雜誌內頁嘅模特兒, 拍返一兩幀沙龍相.

歡天喜地拍到不亦樂乎, 菲林亦滿咗, 於是就自行開相機取出菲林去沖印. 等咗半日, 揸住張單據去取相, 見到店主搖吓頭, 以一副可惜嘅語氣話我知, 菲林走晒光, 所以只收我沖曬費. 我望吓啲底片, 全部灰濛濛一片. 我諗係自己取出菲林前未完全將底片捲入所致, 諗起上嚟, 當時的確見到仲有少許突出在外, 我仲以為係正常㖭, 估唔到只係突出嗰啲啲咁多, 足以令所有照片泡湯.

自此之後, 我冇再去影相, 一來嗰次只係一時興起又咁啱有同學仔陪, 二來一向覺得自己一啲都唔上鏡, 無謂嘥菲林.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

288^#

發表於 17-9-11 20:36 |只看該作者

狗狗愈老愈頑皮, 唔通呢啲叫做返老還童?

之前都講咗, 佢近來無情情鍾意周圍刮, 一時梳化一時牀, 呢頭阻止佢刮床, 嗰頭就即刻走去刮梳發, 好嘞, 去梳化趕走佢, 轉吓頭又跳上床, 沒完沒了.

之前會喺佢刮床時大力拍打門, 企圖用聲音阻嚇佢, 但發覺冇用, 我有我拍, 佢有佢刮, 結果嘈上加嘈, 冇符.

後來我就喺佢刮時索性閂咗度門, 困佢喺房內, 哈, 佢就停止刮, 即刻跳落床企喺門口吠, 聽佢已離開張床就開門畀佢.

唔知係咪佢諗住一吠就開門, 所以冇有怕呢, 好快故態復萌. 好, 既然教而不善, 唯有逼我將行動升級, 就係閂門嘅時間耐啲, 由得佢吠餐飽至開門, 呢招暫時都算湊效.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

289^#

發表於 17-9-12 21:12 |只看該作者

近排無事忙, 成日騰來騰去, 又唔知忙啲乜喎, 一眨眼間又天黑.

咁搞法, 容乜易轉過頭就踏入棺材㗎.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

290^#

發表於 17-9-13 13:11 |只看該作者

朋友最近都加入失業一族, 大家都待字閨中, 得閒就撥個輪傾幾句.

問佢仲做唔做嘢, 佢話兩睇, 跟住問返我, 我話遇啱有興趣嘅工種都會試吓嘅. 佢問例如做邊行我會有興趣, 我話冇諗過, 一切視乎當時心情.

佢問我有冇考慮過做便利店, 我話諗就諗過吓嘅, 不過真係要我做, 我應該唔會嘞.

鬼咩, 始終便利店係拋頭露面嘅工作, 我唔想撞到一個半個老相好囉, 話晒大家認識嘅時候正值青春年華, 試問當年嘅玉女, 變成而家嘅肉婆企喺佢面前, 仲要禮貎周周問佢先生有咩幫到你, 情何以堪呢?

其實我幾鍾意做Cafe, 即係店內只售西餅蛋糕同埋奶茶咖啡嗰種, 乾乾淨淨冇油煙, 唔駛捧住大個碗大隻碟滿手油污忙碌地周圍走招呼客人, 輕輕巧巧衞生企理, 心情都好啲. 可惜呢啲新潮Cafe, 大部份只請年輕一代, 我呢啲阿嬋, 極其量只能去Cafe de coral 做清潔工.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

291^#

發表於 17-9-14 10:23 |只看該作者

偶然行經九龍城一間士多, 駐足等燈位過馬路時, 無意中望吓士多外出擺賣嘅生果, 首先映入眼簾嘅係一梳梳香蕉, 較新鮮嘅就掛起, 已呈黑斑幾乎熟到爛嘅就攤喺度, 每梳蕉都寫上價錢.

我最關注嘅係嗰批熟到爛嘅香蕉, 因為以一般超市嘅做法, 價錢都會較為便宜, 以眼前呢啲嚟計, 一梳大約五六隻, 放喺超市嘅價錢不外乎4-5蚊而已, 但係呢間店標嘅價卻要12個大洋, 令我不禁咋舌.

爛成咁, 有人肯買都偷笑啦, 但求攞返個成本咪算囉, 仲諗住賺, 搵鬼買咩? 12蚊夠我喺超市買到一大梳新鮮㗎嘞.

至於稍為熟但又未熟得晒嗰啲, 中等身材, 三隻都要賣8蚊. 仲有木瓜, 街市大大份一份四個, 每份只係賣十蚊, 而且尚算新鮮. 但呢間店呢, 身材矮小唔在講, 而且又係熟到爛, 好多表面已呈凹洞兼有發霉跡象, 都要賣四蚊一個. 嗱, 超市就話大集團唔夠競爭力啫, 連街市都不如, 難怪呢啲店買少見少啦.

如果因小本經營, 入貨成本貴, 所以要貴買貴賣, 咁不如唔好賣好過啦, 始終生果唔擺得耐, 尤其是天氣咁熱, 一兩日足以令一般生果好似木瓜香蕉加速熟透, 熟咗就更難賣出, 仲要以正價出售, 假如賣唔出, 下一站就係堆填區, 連本錢都蝕埋.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

292^#

發表於 17-9-15 20:45 |只看該作者

朋友做開保姆, 呢排去旅行, 搵我頂更, 幫佢湊住幾個小朋友.

年紀由小一至小五, 開頭我以為好好玩, 所以佢一開口, 我即刻應承.

點知做落完全唔係嗰回事, 可惜朋友已身在外地, 我想打退堂鼓都唔得, 唯有硬住頭皮繼續頂.

可能小一仲細個, 始終年頭仲係幼稚園學生, 所以尚算聽教聽話, 加上仲係幾得意, 所以都有興趣湊.

最攞命就係小三與小五, 細又唔係細, 大又大唔晒呢啲先最難搞. 尤其是呢種年紀, 正值反叛期, 知少少就以為好叻, 如果仲患上公主王子病, 難搞嘅程度加倍.

記得吾兒都係呢個年紀時, 都係激到我嘔血, 自己親生尚且被激, 更何況係人哋嘅仔女, 激都冇仇報.

我問吾兒, 佢讀小三小五時, 係唔係啲女同學都好反叛, 老師點對付, 吾兒話老師除咗唔理, 甚至採取放棄態度之外, 根本乜都做唔到.

又係嘅, 而家個個細路都係父母嘅金叵蘿, 你估仲好似舊陣時咁, 老師嘅地位連家長都怕, 有時被逼由得子女被老師體罰都不得異議.

吾兒同我講, 只要循例話咗佢哋, 盡咗本份就算, 聽唔聽係佢哋嘅事, 與我無關.

既然連為人師表面對滋事份子都避之則吉, 咁我呢個替工又駛乜咁上心幫人教仔呢, 求其喺佢哋被照顧期間冇穿冇爛我就阿彌吉帝, 其他就話之佢哋.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

293^#

發表於 17-9-16 08:48 |只看該作者

有時都幾討厭自己立場唔夠堅定嘅性格.....

例如本應當初對某個價值感到滿意, 卻因為旁人在一邊加油添醋, 一個話咁樣唔抵, 一個話咁樣會蝕底...... 聽埋聽埋, 連自己都動搖, 認為物不超所值, 因而感到唔開心, 令本來高漲興奮嘅情緒跌至谷底.

懷住低落情緒與人訴說, 自己嘅價值觀是否偏低? 得到嘅安慰係, 別理會旁人嘅說話, 人永遠都唔會知足, 得一想再, 得再就想三.... 欲望貪念永無止境, 恁地旁人如何替你不值, 教你如何爭取, 如果自己認為值得, 就唔好耳仔軟.

所以咪話自己衰唔夠堅定囉, 假如冇旁人諸多意見, 我唔只唔覺唔值, 而且仲會認為係執到寶而喜孜孜㖭.

其實嚟到呢個差不多頤養天年嘅年紀, 本來就唔應該有任何爭名逐利嘅思想, 更何況亦無名利可爭, 唔明自己竟會被一啲蠅頭小利纏擾至耿耿於懷, 完全違背咗當初口口聲聲唔計較嘅想法, 實在感到汗顏!!

有智者講過, 做人最開心唔係得得多, 而係計較得少.

將呢兩句套喺我身上最適合不過, 我就係太過計較, 所以搞到自己唔開心, 假如能夠堅守當初嘅價值觀, 就唔會令體內嘅細胞平白無辜犧牲掉.

今後一定要引以為鑑, 別又被長舌之徒影響情緒.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

294^#

發表於 17-9-17 10:08 |只看該作者

前幾日感覺早晚特別涼, 有種秋意來臨嘅意境, 仲以為開始踏入秋天, 可以唔駛再咁熱, 點知舒服得一日咁大把, 呢兩日又熱到出汁.

N年前, 未到中秋已經有涼意, 記得嗰陣時仲諗定, 如果男朋友仔約去街, 一定要扮凍, 藉以投懷送抱, 畀個機會佢摟住我. (可惜佢貴人事忙, 最終我嘅美人計未能得逞, 飲恨!)

一年四季, 最舒服就係秋天, 唔太熱又未凍得晒, 唔駛抹汗又未至於冷到瑟縮, 只需一件長袖薄衫就足夠. 唔知係咪眼見落葉片片, 特別容易令人傷春悲秋呢, 如果咁啱呢個季節遇着啲唔開心嘅事, 好似倍感淒涼.

所以如果唔開心, 千祈唔好喺秋季聽一啲傷感嘅歌, 好似"秋去秋來", "紅葉斜落我心寂寞時"..... 聽住呢啲歌寧舍應景, 加上又一個人走在孤清嘅街道上, 仲要腦海不斷浮現對方嘅一顰一笑, 我真係會聽到哭㗎.

昏暗街燈掩映下, 一個妙齡少女淚眼漣漣, 實會引來奇異目光, 所以偶然一兩個迎面而來嘅路人以好奇眼光望向我時, 我就輕拭眼角淚痕, 當被沙吹入眼.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

295^#

發表於 17-9-18 11:14 |只看該作者

本帖最後由 cforchat 於 17-9-18 11:15 編輯

我嘅皮膚係極度敏感, 可能本身白, 所以唔曬得, 一曬就起紅疹, 㾗癢不已.

有時懶, 見已黃昏, 又或落雨天, 所以冇搽防曬, 諗住太陽伯伯都返咗屋企, 應該冇有怕啦, 點知一樣曬到紅卜卜, 仲痕到飛起.

天氣酷氣, 盡量都匿喺屋企唞暑, 非必要都唔會出街. 但係有時避無可避, 就要撐起傘走在烈日下, 汗流浹背就固之然啦, 估唔到臉頰都可以因被汗浸過而紅腫一片, 唔只痕, 仲好痛㖭.

搞到呢幾日都唔敢出街, 一來唔想令紅腫加劇, 二來更加唔想影響市容.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

296^#

發表於 17-9-19 09:59 |只看該作者

平時睇新聞報導, 當報及某某名人過身, 首先會放映生前片段, 然後片末會揀選一張相片, 跟住畫面變為黑白, 同時會寫上出生年份及逝世年份, 有時旁白會講埋終年幾多歲.....

前幾日報導某熊貓病故, 又係以一貫報導手法述說佢嘅生平點滴, 尾後又係有旁白報終年幾多歲, 但係畫面就冇變黑白.

我當時諗, 係唔係熊貓本來就係黑白色, 所以畫面變唔變黑白都冇乜分別呢?

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2720

297^#

發表於 17-9-20 10:27 |只看該作者

第一次聽到傳銷呢個名詞, 係讀完書初初出嚟做嘢嘅時候, 當時有啲喺暑假工識嘅工友仔, 話帶我去見識一下喎, 咁咪去囉.

講座喺尖沙咀某酒店會議廳內, 眼見女嘅套裝高跟鞋, 男嘅西裝結領呔, 個個衣著光鮮, 反觀我只係普通衣裙, 身處喺如此隆重場合, 顯得格格不入.

講座歷時個幾兩個鐘, 內容講乜唔多記得, 因為當其時身邊包圍好多說客, 全部落足嘴頭不斷向我游說加入成為會員.

雖然一個二個都官仔骨骨容貎俊俏, 雖然美(男)色當前, 但我卻一啲反應都冇, 唔係因為自己頭腦清晰, 而係根本莫財, 何來可掏出會費呢.

可能佢哋見過世面, 知道喺一個灰姑娘身上無金可淘, 所以一次之後就再無下文.

前一排, 一位好耐冇聯絡嘅所謂老死, 話見我冇做嘢, 所以有嘢益我, 仲約我見面至傾. 講到好似有大茶飯咁款, 搞到我好好奇往赴約.

甫見面, 廢話完一輪入正題, 講幾講, 原來又係傳銷. 頂! 知道係傳銷, 我就連出都費事出啦, 嘥我時間.

任佢講到天花龍鳳, 我都不為所動, 今次唔係冇錢, 而係假如好似佢話齋, 只要搵到下線, 下線又搵到下線, 就會幫我開枝散葉延伸下去, 我就可以印印腳唔駛做之餘仲有佣收.

佢哋嘅理念係無錯, 問題係我根本識得人少, 點搵下線呀, 去到我呢條線就已經斷咗, 咪即係賠了會費又折佣, 玩吓手仲要買落一大堆產品㖭呀.

莫講話識得人少冇人脈, 就算識得人多, 我都唔會拖朋友落水啦. 為咗收下線幫自己承擔部份費用而利用友情, 呢啲錢袋咗都唔安樂.

哼! 仲話係老死喎, 好日都唔搵, 搵親原來係搵笨, 仲講到話明益我呢個老友, 大家拍住搵食, 查實就係想我做下線搵畀佢食.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用