少年成長 今日: 0|主題: 16133

Sandra 你好！可能較長，希望你可以比D意見我，不好意思！

囡囡快兩歲半，性格慢熱、細膽、善觀察、脾氣都很好。最近開始成日SAY NO，乜都話唔好，無端端喊，話唔要邊個，仲會打人，對象多數係工人姐姐。我發現通常人地唔明白佢、佢想自己做時就會咁。亦試過姐姐同佢玩緊時，當我過去佢就會話唔要姐姐要媽媽陪。我解釋過姐姐同媽媽同佢係可以一齊玩，同埋通常了解到佢心意，都可以SETTLE DOWN，唔發脾氣。

可怕的事由星期日開始…..囡囡瞓醒晏覺，玩爸爸飲完的紙包飲品，爸爸叫玩一陣就掉左佢啦佢話好。跟住FING左盒裡所剩的奶出來，整濕左，爸爸就叫唔好玩掉左佢。囡囡行左去垃圾桶繼續玩，爸爸比時限佢要掉，當然時限過都未掉，爸爸再問你自己掉定爸爸掉佢話自己，爸爸話最後數三聲唔掉就爸爸掉，當然最終爸爸搶去掉了。阿囡大哭，仲係垃圾桶執返出來話自己掉，爸爸再鬧，囡囡前所未有嚎哭、尖叫、唔要爸爸、打爸爸、仲打自己咀、LUR地、期間撞到個頭，情緒完全失控。我叫老公唔好再鬧住，同佢鬥氣同要脅佢無意思。我攬住阿囡問阿囡係咪想玩完先自己掉而你未玩完，佢話係。跟住我都被老公鬧，佢話我成日就佢搞到宜家唔服從、越來越頑皮。聽完我都火火地話點解要佢服從，阿囡的性格仲要乜都阻止咪越來越無exposure，跟住我果下都好似唔想理咁自己行左入房。阿囡喊住要搵我，我抱起佢等佢冷靜，期間佢都用手表示打爸爸，差不多一個鐘頭後停止。我就同囡囡傾返，佢話嬲爸爸。我表示明白佢未玩夠玩完就會自己掉，咁宜家同佢掉就成功掉了。再解釋爸爸都有比佢玩，但你應承左爸爸掉但無做到仲打爸爸，爸爸都嬲，我地去睇下爸爸好無。跟住兩父女hughug又無野咁啦。

但自從呢日開始，囡囡好似性情大變咁，一日約有一至兩次同樣咁樣大喊大叫，邊個去理佢就唔要果個又打人，譬如起身話要飲奶，開左奶又話唔要，譬如我話你唔飲會肚餓佢就會話好呀肚餓。鬧情緒期間就係一味喊但好嬲好憫憎咁，你理佢佢仲憫，所以我會陪佢但完全唔比反應佢至佢冷靜。通常如果眼瞓就仲易咁。前日周圍study先睇到你的post都教ignore，咁我地就成家人照跟，通常一個鐘就會無端端安靜落黎，明顯用左ignore脾氣收的時間快左。同埋我跟埋你教的讚，係無事無幹時讚佢無大喊大叫、無打人做得好好喎，即刻獎個貼紙痴係身，我、爸爸、姐姐都分別獎過佢，獎完佢好開心仲會展示比其他人睇。我最想問的問題係至今日已經五日，佢呢幾日零晨一點左右就忽然喊醒，同樣一味喊好嬲好憫憎咁，我地繼續用ignore令佢停，第日佢都知自己喊。佢兩歲開始同我地分房瞓，佢同姐姐同房上下格床。最初要陪瞓，但我發現佢半夜會搵我搞到佢瞓唔好，所以慢慢我唔陪瞓讓佢自己瞓著，咁樣佢比較可一覺瞓天光。有時醒，姐姐殊下就瞓返。兩星期前因為佢病同我同床過接近5日，然後好返番去自己床瞓，初初都又要返我，一排後都可自己入睡。但其實間唔中都會小哭下又唔係有要求，我諗佢喊我就過去佢房又或姐姐會理佢就中左計，reinforce左佢attention seeking/半夜搵人。我唔知其實夜晚係咪搵我地，佢喊都唔緊要，呢幾日佢喊仲好嬲，好似星期日的事引爆左佢的情緒咁。我唔知究竟佢係attention seeking定佢覺得我地遺棄佢咁，究竟我夜晚要繼續ignore佢定其實佢要同返我地同房，增加返佢安全感先呢？究竟佢發生緊咩事？如果純粹trouble 2就好，我怕係我地parenting做錯了而令佢唔安全、咁嬲。希望你能分析分析，同建議我點做。謝謝！