Baby Kingdom - 親子王國 香港 討論區 › 首頁 › 興趣嗜好› 閒來無事說些事.....

興趣嗜好

收藏本版
回覆 發帖
返回列表
跳至頁

首頁
1415161718...43

尾頁
   7
bluerain_baby


大宅

積分: 1059


301#
發表於 17-9-20 14:54 |只看該作者
cforchat 發表於 17-9-16 08:48
有時都幾討厭自己立場唔夠堅定嘅性格.....

例如本應當初對某個價值感到滿意, 卻因為旁人在一邊加油添醋, ...
呢個好認同, 我都係立場唔夠定架, 成日都要問fd意見, 其實係人認同自己, 搵多d人認同自己, 不過如果朋友多數唔贊成呢, 咁就c啦, 我真係唔敢去做架, 但又好唔開心!
我係一個樣樣顧及人感受嘅人, 好憎d我行我素人, 但當有時自己真係好唔想, 又會成為一個唔顧及人感受嘅人!"做人最開心唔係得得多, 而係計較得少" 我都好想, 但做唔多, 超計較.
私人傳訊回覆 引用

cforchat


大宅

積分: 2720


302#
發表於 17-9-21 20:05 |只看該作者
回覆 bluerain_baby 的帖子

係呀, 諗到乜就胡謅一通.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


303#
發表於 17-9-21 20:33 |只看該作者
本帖最後由 cforchat 於 17-9-21 20:35 編輯

朋友嘅朋友, 一知道佢失業, 紛紛介紹幾份工畀佢, 有烹飪助理, 幼稚園嬸嬸.....

最終朋友揀咗幼稚園.

我以欽羨口吻同佢講, 你就好啦, 呢頭一失業, 嗰頭就接上, 有朋友真係好嘞.

但係佢做得幾日就劈炮唔撈, 因乜解究呀?

佢話喎, 幫啲幼稚園小朋友抹屎拭尿佢唔怕, 亦唔怕要煮嘢畀佢哋食, 但係一講到力的表現, 佢就投晒降.

原來小朋友有午睡時間, 所以佢每日定時定候要砌床, 由於床嘅配件好重, 所以體力勞動極大, 而且唔係求其砌好就算, 而係每張床都需要喺同一個固定位置, 每次要搬到指定所在處都嘥咗唔少氣力.

連日來不斷砌砌拆拆, 搞到佢腰痠背痛手腳疲累不堪, 長此落去, 佢怕老命不保, 所以就辭職不幹.

以前我睇招聘欄, 都見到有類似嘅工種, 由於喺屋企附近, 時薪又吸引, 最重要係工時只得一兩小時.

但係吾兒唔畀我做, 佢話會好辛苦喎, 因為啲小朋友仲細, 好多時大小便都會失禁, 咁我就會好唔得閒.

開頭仲諗住貪小朋友得意至想做幼稚園, 可以玩吓人哋個仔/女嘛, 但係觀乎朋友嘅工作性質, 唔只冇得玩, 仲有可能畀佢哋玩返轉頭㖭.

睇嚟我有必要打消喺幼稚園打工嘅念頭.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


304#
發表於 17-9-22 16:58 |只看該作者
塵世間最飲恨之事, 莫過於衣衫襤褸披頭散髮, 卻偏偏遇上前度, 想匿都嚟唔切, 一副爛身爛勢盡收對方眼底.

本來諗住落街買少少嘢, 加上又有啲雨, 於是為求快, 求其執齊眼耳口鼻就出門, 反正都唔會有人刻意望我㗎啦.

點知買完嘢準備踏入屋苑, 迎面來人熟口熟面仲對住我笑, 愈行愈近時, 才猛然認出係前度.

當堂晴天霹靂, 居然喺我咁嘅身勢之下玩偶遇? 天呀! 可唔可以令佢時運高見我唔到呢?

我唔敢多逗留, 匆匆點吓頭就逃之夭夭, 見佢似乎想上前攀談, 不過我冇面目同佢面對面.

返到屋企對鏡輕嘆, 唉, 明明執吓嗰樣都仲嗒得杯落㗎嘛, 就係因為貪方便, 搞到本應話佢知我活得比你好, 結果變成好似怨婦咁嘅款, 真係該煨!

um..... 不如搵日專登扮到靚一靚, 跟住撥個輪畀佢, 約佢出嚟見面, 等佢知道其實我仲秀色可餐.....

春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


305#
發表於 17-9-23 12:50 |只看該作者
有時忽發奇想, 諗住學吓人哋開個頻道教煮嘢食. (我都知自己本身仲不斷向人取經學習, 何來有料教人煮吖, 所以咪話咗係奇想天開囉)

好嘞, 假如真係不知天高地厚教煮餸, 可是以我一貫隨意求其嘅煮法, 並無實際份量可以提供, 樣樣材料調味只會以酌量呀差不多呀少許呀視乎個人口味而定呀呢啲不負責任嘅說法作為台詞, 咁點算係教呢, 極其量只能叫做煮畀人睇.

其實並唔係自己懶唔肯講, 而係平時煮嘢, 真係跟自己嘅判斷而行, 好多食物第一次煮仲會跟足食譜, 但係煮第二次就唔會跟咯. 就好似初學煮嘢食, 每次都要試味, 久而久之, 而家煮一餐, 經已冇乜點試味, 總之樣樣調味料都落啲啲, 斷估唔會難食得去邊, 而又好好彩, 次次都可以符碌過關.

嗱, 我有諗過去做陪月㗎, 可以玩bb嘛, 但係一諗到陪月要兼任廚師, 負責為坐月嘅媽媽進補, 我又只好卻步.

鬼咩! 話明補身, 即係要涉及好多名貴食材啦, 試問我呢啲三腳貓煮食知識兼夾不依食譜煮法嘅人, 點擔當得起呢個重任呢, 煮壞食材事少, 弄壞媽媽嘅身子事大嘛, 所以又少咗一份行業選擇.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


306#
發表於 17-9-24 16:48 |只看該作者
平時自恃唔怕熱氣, 盡食啲熱氣嘢, 薯片花生果仁煎炸辛辣樣樣齊..... 好嘞, 食埋食埋, 若然撞正有啲作感冒嘅話, 就會將之前積喺體內嘅熱氣一嘢爆發晒出嚟.

之前狂食咗好多熱氣食物, 遇上呢幾日有啲作病, 就算已經醒水, 一見勢色唔對即時啪藥, 但都阻止唔到如狂風掃落葉般到來嘅氣管不適引致嘅喉嚨痛咳嗽. 完全應咗母親所講嘅病來如山倒般快, 病除如抽絲般慢.

之前返工, 與上司往返來地多次後, 都試過咁嘅情況, 又係小小作病唔多理, 仲要食勻山珍海味, 羊煲鹿湯盡是補燥之食物, 加上舟車疲勞又嚴重睡眠不足, 日積月累下, 一日起身發現唔只出唔到聲, 而且咳到飛起, 更感到肺中極多濃痰, 咳唔出吞唔落, 結果睇勻晒所有認識嘅中西醫, 又打針又食藥又針灸, 足足兩個月先至慢慢痊癒, 嗰次係咁大個女第一次病得咁嚴重, 差啲死咁滯.

病之中最怕就係咳, 因為咳起上嚟真係會失控, 尤其是喺一啲安靜嘅地方, 係咁咳嘅話, 人人嘅目光都會注視你, 除咗驚你唔知有咩病之外, 聲浪亦會影響人哋. 所以當發現自己準備又要咳好耐嘅話, 我就會盡量忍住一下, 匆匆走入廁所閂埋門先至肆無忌憚咁咳餐飽, 一日未肯定咳完, 一日都唔敢出嚟住. 好在呢啲多數都係陣咳, 只要咳咗一陣就會回復正常, 假如隔咗一陣又嚟過嘅話, 先至再入廁所.

老人家成日話小病是福, 其實不無道理, 一來等體內嘅抵抗力間中可以活動吓筋骨, 以免一係唔病一係就大大鑊咁極端. 二來偶然少許傷風感冒, 服完藥可以好好瞓返一覺, 當乘機讓身體充吓電, 唔駛成日處於作戰狀態咁疲倦.

我而家有少許醞釀緊想咳想咳, 氣管亦有啲抽住抽住, 喉嚨亦有點乾涸, 已經服咗兩日藥, 希望能夠㩒得住, 唔好發出嚟啦, 否則勢將又要經歷一頓咳餐死至肯罷休.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


307#
發表於 17-9-25 20:26 |只看該作者
初聽麥當娜原唱嘅"La lsla bonita"就好鍾意, 跟住葉蒨文改咗"海旁獨唱"亦唔錯, 不過後來聽過Alizee嘅版本之後, 我就捨棄原唱, 改為專注聽Alizee.

除咗因為Alizee較靚女又後生之外, 主要係佢把聲有少少沙, 所以較磁性, 而且笑起上嚟嘴角微微歪, 當家話咁嘅樣最煞食喎.

不過佢後來改咗髮型, 直髮加留海, 個樣好似削咗, 冇咁靚咯.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

bluerain_baby


大宅

積分: 1059


308#
發表於 17-9-26 16:21 |只看該作者
cforchat 發表於 17-9-24 16:48
平時自恃唔怕熱氣, 盡食啲熱氣嘢, 薯片花生果仁煎炸辛辣樣樣齊..... 好嘞, 食埋食埋, 若然撞正有啲作感冒嘅 ...
我一唔妥就拍定寶丸先架啦, 不過頭痛係我嘅家常便飯事一樣
私人傳訊回覆 引用

cforchat


大宅

積分: 2720


309#
發表於 17-9-26 17:56 |只看該作者
早兩日作感冒, 為防未斷尾會復發, 就算已經服咗兩日藥, 表面看似已痊癒, 都唔敢輕視, 一於啪多一日藥, 諗住將病菌斬草除根.

到咗第二日, 起身發覺仲係唔多妥, 心諗可能係服藥過量加上話晒都算係病嘛, 有後遺症唔出奇喎, 之前每次食完藥都係咁上下狀況㗎啦.

於是就大安旨意等藥力過後就會冇事, 但係點解不適嘅症狀好似有增無減嘅, 搞乜呀?

到咗夜晚, 連打幾個噴嚏後, 鼻水開始狂流, 唔係呀嘛? 咪已經食多咗一日藥打底囉, 點解唔只打唔死啲菌, 反而令佢哋進攻? 幾時瀨嘢㗎?

唉, 本來呢, 如果一早醒水即刻啪藥, 話唔定可以㩒得住, 就係錯失咗黃金數小時, 搞到而家嘅病況仲衰過作病又未服藥嘅時候.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


310#
發表於 17-9-27 19:13 |只看該作者
做乜呢兩日又熱到咁交關呢, 搞到本來唔駛開風扇嘅晚上, 瞓瞓吓都熱到出晒汗, 焗住要起身開風扇先至瞓到覺.

到底幾時至可以唔駛咁熱呀?
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


311#
發表於 17-9-28 10:56 |只看該作者
我見識少, 唔知只係得香港人吖, 定係全世界每個地方嘅人都鍾意投訴, 一啲雞毛蒜皮嘅事都可以投訴一餐, 癡鬼線!

其實人與人之間相處, 最緊要係互相遷就, 今次你就吓我, 下次輪到我就吓你, 大家和睦共處, 係幾咁開心嘅事呢.

偏偏有啲人食飽飯冇得去, 一見到啲佢認為有問題嘅事就投訴投訴, 有啲甚至動輒報警求助. 唉, 雖說係人民公僕啫, 都要視乎事件嘅輕重緩急㗎嘛, 唔好大安旨意以為專為你一人服務至得㗎嘛, 一啲芝麻綠豆嘅小事就自行四四六六拆掂佢啦, 就算警察上門都幫唔到啲乜㗎啦, 浪費警力之餘, 亦令到人哋要作無謂嘅調停, 萬一影響一啲更嚴重嘅案件又有乜謂呢.

當然亦有啲冇報警咁嚴重啦, 不過就會成日向有關方面舉報投訴, 搞到人家受牽連甚至飯碗不保.

每次遇到呢啲將小事化到大一大嘅人, 都會咬牙切齒暗罵一樣米養百樣人, 希望終其一生都唔會被人投訴至好.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


312#
發表於 17-9-29 17:56 |只看該作者
幾時至話開學了, 幾時話咁快又到咗月尾, 真係光陰飛逝日月如梭......

之前話幫朋友做替工保姆, 總算大功告成, 由於幾個小朋友嘅性格各異, 年紀又唔相若, 智商又參差, 搞到我顧得個大又顧唔掂個細, 攰到我呢.

身體疲勞都算嘞, 最多就早啲瞓㗎啫, 最弊就係精神上都差啲頂唔住, 呢樣至係關鍵.

唔好以為睇小朋友容易, 係, 未識行, 每日只係餵奶換片沖涼呢種的確唔算難嘅, 反正佢成日瞓咁滯. 最難搞係嗰啲讀緊小四小五嘅小朋友, 識少少就吔文吔武, 講又唔聽, 又駁嘴駁舌, 一言九頂, 有時激氣起上嚟真係想兜巴星佢兩嘢, 好在都忍住.

好啦, 小朋友更難搞, 都唔及大人嘅一半. 前者無論幾頑皮都好, 只要稍為大聲喝吓佢, 至少嗰刻都仲可以駕馭得住, 但係大人就唔同, 尤其是虎爸虎媽, 成日以為自己高高在上, 郁啲就聯合幾個家長指手劃腳將所有唔滿意嘅人數落一番, 可以圍埋講足幾個鐘都唔攰, 真係好精力. 我心諗, 好在我只係客串㗎啫, 難為日日幫佢工作嘅人, 日子唔知點過.

其實期間我多次打長途畀朋友, 叫佢另外搵人頂, 我唔想撈嘞, 但係每次打畀佢之前所下定嘅決心, 總被佢三言兩語就說服我繼續做落去, 被佢昆咗咁耐, 而家叫做可以鬆一口氣.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


313#
發表於 17-9-30 10:24 |只看該作者
人嘅貪念真係無窮無盡, 得一想二, 得二想三.....

好似一位做會計嘅朋友, 成日嫌自己人工少, 由於佢嘅職責要計人工, 所以會知道同事嘅人工幾多錢, 佢好羨慕嗰啲人工比佢高嘅同事.

隨住佢每年嘅工資增長, 期間亦升職加薪, 人工已經超越當年佢羨慕嘅一班同事, 本應感到欣慰才是, 點知佢話已經再不屑於與嗰班人比較, 轉而將目標向比佢更高層, 人工比佢更高嘅同事.

就係因為佢仲係喺嗰班高層之下, 所以佢從未開心過.

我同佢講, 人望高處係好, 但都要知足㗎嘛, 就算畀你自己做老闆, 人工係全公司最高, 你咪一樣會與同行比較, 始終一定有人賺得多過你㗎喎, 咁一日到黑個腦就只有比較比較, 你永遠都唔會覺得滿足.

睇見佢成日愁眉不展, 我同自己講, 一定要警惕自己切莫步佢後塵.

自問都係屬於計較之人, 總羨慕阿甲比我多, 卻唔識感恩我已比阿乙好, 所謂人比人氣死人, 各有前因莫羨人.

朋友嘅情況, 令我有所啟發 : 要求多煩惱就多, 心境如陽光者, 任何事都覺得坦然, 反之內心晦暗者, 滿腦子只會充斥着傷感. 日常中遇到的事情, 不在於幾多, 而在於裝着幾多, 簡單一些, 豁達一些, 開朗一些, 內心嘅陰霾自然就會少一些. 心淨才能無染, 無染才能舒心, 無欲則剛, 太多欲望渴求, 只會不斷徒增壓力.

成敗轉頭一場空, 人生苦短, 如若還整日花時間追逐名利, 做人又有何意義呢?
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


314#
發表於 17-10-1 10:22 |只看該作者
本帖最後由 cforchat 於 17-10-1 10:29 編輯

時不時就會有一啲涉及外籍傭工嘅新聞, 有時係僱主嘅問題, 有時係傭工嘅問題, 誰是誰非, 就要由法官來評定嘞.

樹大有枯枝, 族大有乞兒, 無可否認, 傭工中確係存在住害群之馬, 在外珠胎暗結, 借錢, 偷竊, 躲懶, 虐待小主人..... 令僱主頭疼不已.

當然, 亦有唔少外傭遭僱主待薄嘅個案, 例如超時工作, 剋扣工資, 毒打..... 令外傭身心受創.

身邊有朋友屋企都聘有外傭, 據我觀察所得, 佢哋大多都唔太善待外傭. 有人唔准外傭同檯吃飯, 有人成日計算外傭偷懶多過做嘢, 有人只闢出家中一小角樓梯底位畀外傭瞓覺.....

看在我眼中, 除咗戥外傭感到淒涼, 亦覺得朋友嘅做法唔人道. 不過一家唔知一家事, 我身為外人, 無謂咁多事.

將心比己, 假如我係外傭, 為咗賺錢養家, 不惜告別家鄉與親人, 千里迢迢到異地打工, 人生地不熟, 本來已經徬徨不安, 若然得到僱主一家視如親人般對待, 還可稍稍減思鄉之情. 若是得到嘅係每日做不停, 兼而被頤指氣使, 諸多挑剔留難, 肯定日日以淚洗面, 亦可能會抑鬱.

當然, 亦有傭工恩將仇報得寸進尺不負責任, 恁地僱主已待之不薄, 依然在挑戰僱主嘅底線, 不知進退, 聯合同鄉坑自己僱主, 呢啲就真係幫唔落, 早解約早安樂.

我亦見過吾兒同學嘅傭工好多都好好, 人又開朗, 又將少主人照顧得無微不至, 無可否認, 請着呢啲好傭工, 儼如中六合彩般難.

不過我相信, 人本善良, 壞份子只佔少數, 作為僱主, 有時都要體諒一個女子離鄉別井遠赴他方搵食嘅難辛, 有好多雖身為媽媽, 卻未能在家中照顧自己嘅孩兒, 而要到來你家照顧你嘅孩兒, 當中嘅心情可想而知係幾咁淒酸無奈, 所以可以的話, 盡量好好善待之. 相信喺你對人好人對你好嘅情況下, 賓主關係和睦, 就唔會衍生出咁多控訴, 達至雙贏局面.

嗱, 以上我提到嗰啲朋友嘅傭工, 後來陸續生出好多事端, 搞到朋友們為咗佢哋要疲於奔波於警局僱傭中心移民局..... 我覺得就係因為佢哋之間欠缺咗互相尊重對方嘅心態, 所以就以你不仁我不義作為報復嘅藉口.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


315#
發表於 17-10-2 09:51 |只看該作者
中秋將至, 月餅燈籠成行成市, 計計手指, 我都起碼有十幾年冇食過傳統月餅, 而都有幾年冇食過冰皮月餅.

細個家貧, 要食月餅唔容易, 所以當有得食時, 都會有幾多食幾多. 後來試過冰皮之後, 可能本身鍾意食豆蓉多過蓮蓉, 所以就放棄咗傳統, 轉而食冰皮.

無論咩月餅, 售價都好貴, 每盒百幾二百蚊點都走唔甩, 所以好少掏腰包自己買, 因為公司本身會送畀員工, 有時又有客戶送贈, 根本唔駛買.

可惜客戶送嘅多數都係傳統嘅雙黃白蓮蓉, 基於我已轉吃冰皮, 而當家與吾兒又唔係太好月餅, 所以每年收到嘅月餅, 多數都轉送畀家人與朋友.

出於私心, 試過同公司提議, 反正都要送畀員工, 不如問卷調查, 睇吓邊個鍾意傳統, 邊個鍾意冰皮, 咁就可以各取所好. 我以為實係好多人鍾意新嘢啦, 點知大部份都選擇傳統, 好在最終都跟從各人嘅選擇.

可能吾兒太耐冇食過月餅, 所以近一兩年, 佢忽然話想食, 之前有人送嘅時候又唔食, 而家叫我特登去買我又唔想呀, 所以要睇吓有冇朋友唔要轉送畀我, 否則佢就冇口福咯.

本來我話不如我做阿茂, 自己整餅啦, 但係佢用非常懷疑嘅口吻問我得唔得, 我話都係試吓㗎咋, 佢話呢啲食品, 始終都係買返來較穩陣喎.

唔理咁多, 一於自己試吓做, 成功嘅話, 以後就可以不假外求, 唔駛等到中秋都有月餅食.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


316#
發表於 17-10-3 21:15 |只看該作者
仲有唔夠三個月就過一年嘞, 唔知係唔係我錯覺呢, 總覺得今年好似死得人多.

隔三差五就傳來邊個名人過身, 邊度又發生恐襲, 邊處有天災.....

難怪有好多人都唔想睇新聞, 因為大多都係唔好嘅消息.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

luckybaby2011


水晶宮

積分: 72641


317#
發表於 17-10-3 21:21 |只看該作者
cforchat 發表於 17-10-2 09:51
中秋將至, 月餅燈籠成行成市, 計計手指, 我都起碼有十幾年冇食過傳統月餅, 而都有幾年冇食過冰皮月餅.

細 ...

你好厲害、文筆又好又有恆心、仲好睇過報紙既所謂作家
祝你一家中秋節快樂！
私人傳訊回覆 引用

cforchat


大宅

積分: 2720


318#
發表於 17-10-4 20:45 |只看該作者
回覆 luckybaby2011 的帖子

多謝讚賞, 我都祝你中秋節快樂!
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


319#
發表於 17-10-4 21:25 |只看該作者
每逢過節前夕, 遇上公司會放早, 交通總係特別擠塞, 因為人人趕住回家吃飯團圓.

好似今日, 未到放工時間, 極目遠望, 馬路已被車輛擠得水洩不通. 究其原因, 原來好多架車都發生意外碰撞, 幾乎每隔幾條街就有一單, 致使車龍愈排愈長, 搞到行車非常緩慢.

聽啲街坊講, 因為好多假日司機都會乘機揸架車出遊, 呢個亦係導致發生碰撞嘅原因之一, 始終技術會有少許生疏, 點都唔夠日揸夜揸嘅司機純熟, 尤其是面對咁多車輛, 偶一判斷稍有差池, 就好容易發生意外.

好似我之前試過喺平安夜當晚揸車經過尖沙咀, 未到已經開始塞, 我就知瀨嘢, 寸步難移之餘, 自己嘅技術又水皮, 睇位又唔準, 當龜速移吓位又偷吓位前進時, 差啲與隔離架車接吻, 我仲懵盛盛唔知, 但人哋揸車嗰個就經驗豐富, 睇咗一眼就知我貼得佢架車好近, 搞到佢一路向我眼厲厲, 一路將架車移開, 以免我再向前移多一寸, 佢架車就多一分危險.

後來見過咗大半小時, 架車都只係移動得少少, 所以就當機立斷改道, 一離開尖沙咀嘅範圍, 即時路路暢通. 我諗隔離車嗰位仁兄, 見我抽頭, 一定鬆咗一口氣, 因為唔駛再步步驚心.

其實歸心似箭都無可厚非嘅, 不過都要顧及安全, 以免團圓變全完..... 架車要報銷.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用

cforchat


大宅

積分: 2720


320#
發表於 17-10-5 15:09 |只看該作者
本帖最後由 cforchat 於 17-10-5 15:11 編輯

未到中秋, 吾兒問今年有冇月餅食, 我話除非好似往年一樣, 有飛來蜢送, 否則只好寄望來年, 因為我一定唔會買.

話口未完, 當家嘅舊同事話有月餅券, 佢唔食, 問當家要唔要, 我話梗係要啦, 咁吾兒咪有得食囉.

本來約好咗搵日去舊同事嘅住處攞餅券, 順便請佢飲茶, 卻撞啱當家唔舒服, 服咗藥邊度都唔想去, 眼見距離到期日愈嚟愈近, 為咗唔想人哋浪費張餅券, 於是就通知舊同事都係唔要嘞, 叫佢轉贈畀人.

開頭舊同事仲好熱心, 話不如攞出嚟畀佢, 我叫當家索性推咗去, 邊好意思要人哋千里迢迢又搭車又轉車攞出嚟至得㗎.

早知一日未攞在手就唔好同吾兒講住啦, 搞到佢一時以為有得食, 最後卻一場歡喜一場空.

其實之前都睇咗幾個有關教做月餅嘅視頻, 不過諗住有現成就費事整, 反正點整都唔及人哋咁好食, 既然最終冇得食, 即係想懶都唔得啦, 唯有自己動手做.

由於唔知係唔係一次貨仔, 加上又唔就腳, 所以就唔專登去買月餅模具嘞, 但靠我一雙笨拙嘅手, 肯定無法捏出月餅造型, 冇理由出嚟嘅效果係三尖八角㗎嘛, 於是靈機一觸, 就攞蛋撻模嚟塑型啦, 雖然都係怪怪的, 不過點都比參差不齊嘅形狀美觀.

幾經折騰, 首次自製嘅冰皮月餅終於面世, 不過由於冇正式嘅模具, 表面就要沾較多粉, 否則會黏住, 所以嚴格嚟講外型似糯米糍多過似月餅, 不過食落之後, 其實與市售嘅相差不遠, 整體嚟講都算成功.

意想不到嘅係, 當吾兒返家, 我正準備喺雪櫃攞出月餅, 想畀個驚喜佢, 點知佢先我一步, 喺袋中攞出兩個迷你月餅, 話係同學所贈喎, 亦已經喺學校食咗幾個. 唓! 知佢有得食, 我就唔駛為籌謀整餅與否而傷透腦筋啦.

開初吾兒戰戰兢兢攞起個月餅遲遲唔敢放入口, 我與當家異口同聲同佢講, 好好食㗎, 快啲試吓啦, 佢咬咗一口之後就猛力點頭讚賞, 食後評係味道與街外嘅相若, 係略嫌粉多咗啲. 可能我平時鍾意食糯米糍, 所以對外層所沾嘅粉多寡冇所謂, 假如佢唔欣賞嘅話, 我樂於自作自受.
春有百花秋有月, 夏有涼風冬有雪, 若無煩事掛心頭, 便是人間好時節.
私人傳訊回覆 引用


首頁
1415161718...43

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊

© 2025 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見