間中都會上求職欄搜尋一下有乜筍工, 假如啱嘅話, 我唔介意出山.
見到一份無論時間地點都幾啱心水, 於是打電話查詢, 負責人以一種未瞓醒嘅聲音叫我以電郵傳資料畀佢. 唓, 既然要求電郵, 點解要留電話唔直接留電郵呢, 多此一舉.
過咗幾個鐘, 負責人回電畀我, 問我想做全職定兼職, 因登咗兩個職位. 我心諗, 到底佢有冇真正睇過我嘅電郵㗎, 我除咗喺主旨寫上應徵兼職之外, 內文亦重複寫明兼職, 點解仲要問呢, 當下我對呢個人嘅工作能力與上心程度開始有點懷疑. (以前工作時, 自問工作認真事事上心, 所以好怕與呢種人合作, 因為多數都會有拗撬.)
當佢講完大概有咩要求同埋稍為問吓我一啲基本嘅常識之後, 就約我往面試. 原以為會即日約見, 就算唔得, 頂多都係一兩日之內嘅事, 點知居然要一星期咁耐, 如果係大公司唔出奇, 但係只得小貓三四隻嘅蚊型公司, 要咁耐咩? 我有理由相信, 應該已經請咗人, 只係在試工期, 唔知雙方能否合作下去, 所以搵定後備.
當時答應會如期往面試, 但期間一直在猶疑到期時好唔好失約, 因為覺得佢奇奇怪怪.
最後都依約定時間前去, 一來想睇睇條友係乜料, 二來亦想測試吓自己有冇市場.
開初一切都進行得好順利, 見佢幾次欲言又止咁嘅款, 我仲以為佢諗緊叫我幾時開工, 點知佢係想問我可唔可以做全職, 我反問時間與金錢點計, 佢話比兼職嘅時間多兩個鐘, 價錢照兼職嘅時薪計, 我心一沉, 臉上亦露出不快, 決絕地告知我想做兼職, 全職嘅時間唔啱我. 既然雙方達唔成協議, 當然就終止咗是次面試啦.
之所以覺得不爽, 係有種被騙嘅感覺, 假如佢事先聲明想請全職, 我連見都費事見, 去到先至話想請全職, 分明嘥我時間.
本來已經略嫌佢兼職嘅時間比一般嘅長, 不過見交通便利, 所以至去應徵. 我都奇怪點解同一個職位會又請全職又請兼職, 原來係想以兼職嘅價錢做全職嘅員工, 咁呢間公司都好縮骨啫, 全職放假都有錢, 兼職就做幾多個鐘計幾多個鐘嘅錢, 而且乜福利都冇, 唔怪得佢話而家請全職難, 所以游說我轉全職啦.
講嚟講去都係錢作怪啫, 你肯出高價, 我唔信冇人做囉, 問題係你咁度縮, 搵鬼做咩.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
