原來白天上網冇咁擠塞......
一向好鍾意食大樹菠蘿, 但係街市販賣嘅價錢唔便宜, 所以就算見到都未必買, 因為一磅得幾嚿, 盛惠幾拾蚊, 轉眼就食晒, 感覺好似冇食過, 既然食咗等如冇食, 不如慳返好過.
我知道新界好多地方都有種大樹菠蘿, 可惜每次去到都唔係當造, 否則可以即場查詢有冇得散賣, 假如價錢相宜, 就算要買一個都冇所謂, 反正經我一番狂風掃落葉嘅狂擦, 唔駛好耐就可以食晒.
當家有一次去新界, 見到一個人踏住單車, 車後放咗幾個大樹菠蘿, 沿途向經過嘅人問要唔要, 由於當家當時有要事在身, 冇可能攞住一個大菠蘿周街走, 只能婉拒好意, 眼白白睇住幾個菠蘿喺佢眼前消失. 佢返嚟話我知嘅時候, 我連連跺腳嘆走寶.
後來與一位朋友閒聊, 佢話本地產嘅大樹菠蘿完全唔好食, 因為佢有次喺人哋嘅田園裡, 見到一大堆, 於是不惜負重攞咗個返屋企, 為咗驚唔熟, 仲特登焗咗十幾日至開嚟食, 點知完全唔食得, 結果去咗堆填區.
我問佢, 到底係因為園主知道呢批係失敗之作, 所以扔在一邊, 卻被朋友以為執到寶? 定係佢拾嘅一個咁啱係壞嘅? 抑或係因為焗咗咁多日所以至唔好食呢? 朋友都講唔出一個所以然來, 只係主觀地認為本地出產唔及街市從外地入口所賣嘅咁好食.
如果正如佢所講, 咁我真係又悲又喜咯, 悲嘅係街市賣咁貴, 即係叫我唔駛食嘅啫. 喜嘅係, 之前以為走寶, 原來唔攞好過攞, 否則辛辛苦苦托嚿石頭咁重嘅菠蘿返嚟, 滿心歡喜打開之後至發現唔食得, 得而復失嘅心情肯定抓狂.
雖然可以退而求其次買價錢較平嘅大樹菠蘿乾解饞, 不過話晒經過加工, 點都唔及新鮮嘅口感.
而家回味起嗰種果香與咬感, 口水開始流.....
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
