吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 興趣嗜好› 閒來無事說些事.....

興趣嗜好今日: 0|主題: 124523

收藏本版

回覆發帖

返回列表

跳至頁

樓主: cforchat

[其他] 閒來無事說些事.....

[複製鏈接]

18 192021 22...43

cforchat

大宅

積分: 2724

381^#

發表於 17-12-3 10:05 |只看該作者

原來呢度早排曾經遭黑客入侵, 唔怪得慢到拉牛咁啦, 仲怪責係自己嘅電腦殘舊不中用添, 罪過罪過!!

以前, 曾有網友試過喺度開咗個留言區, 諗住與其他網友吹吓水, 點知忽然一日發現戶口被刪除, 當佢感到憤怒而怪責版主為何無故刪除, 先至得知原來因為留咗一啲粗言穢語而遭封殺. 佢感到十級無辜, 因為從來未有一言半語涉及不雅用詞, 好明顯係被人惡意入侵所致, 佢覺得呢度好唔安全, 從此浪跡天涯, 再冇出現.

族大先至會成為不法份子覬覦嘅對象, 對網民嚟講都唔知係好事定壞事, 好者多人瀏覽, 壞者分分鐘被盜用資料都唔知.

網上世界無遠弗屆, 愈方便愈容易出事, 所以免得過都唔好講太多深入事, 風花雪月一下就算嘞.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

382^#

發表於 17-12-5 18:07 |只看該作者

對上一次睇無線劇, 係撒嬌女人, 最近溏心3都有興趣想追.

點知睇咗頭兩集之後, 就冇意欲繼續睇落去.

可能唔夠生活化啦, 唔係大集團就係上市公司, 餐餐大魚大肉, 咁離地, 身為平民百姓嘅我完全冇代入感, 費事得個恨字, 唔睇好過睇.

而劇情亦好牽強, 例如夏雨被誤會殺人嗰幕, 少少事就喊打喊殺, 致使被認為有動機, 跟住無情情入屋探死者, 然後又無啦啦被一位茶客撞見...... 雖然橋唔怕舊, 但都唔好咁老套嘛, 所以我唔多受.

當家開初都話我唔睇佢都唔睇, 不過又好想知到底發生咗咩事, 搞到黃宗澤與王浩信兩甥舅本來老友鬼鬼, 最後卻對薄公堂.

我叫佢照睇, 最多佢睇時我喺側邊間中望兩眼當陪佢囉.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

383^#

發表於 17-12-6 11:24 |只看該作者

焗咗個栗子蛋糕, 唔只蛋糕內有栗子粒, 連圍邊都用栗子蓉, 食到當家嘴舔舔, 話吃完後齒頰仍留有栗子餘香, 回味無窮.

佢問我, 用咁多栗子, 肯定剝得好辛苦, 仲問我做乜唔叫佢剝栗子殼喎.

唉, 我呢啲坐言起行兼且急性子嘅人, 想做嘅就即刻做嘛, 等佢剝得殼嚟, 蛋糕都焗起咯.

以前剝栗子的確好痛苦, 剝完外層嘅硬皮, 仲要處理栗子衣, 唔只費時, 雙手仲痛到死, 就係咁難搞, 所以明明鍾意食栗子, 都因而卻步, 唔想搞咁多嘢.

最近無意中發現一個方便快捷嘅方法, 所以三不五時就買兩磅栗子嚟大快朵頤.

話說呢, 由於栗子外殼極厚, 但係又要先剝開先至去到衣喎, 於是我就諗如果先用水浸軟啲殼, 可能易剝啲, 唔駛對手因用力剝而又紅又痛嘛, 可是浸咗成日, 外殼一樣硬過我條頸.

嘥咗成日時間都冇幫助, 把鬼火就煲一煲水, 水滾後將栗子一嘢倒晒落去, 我唔信咁熱嘅水都淥你唔軟......

趁熱將栗子撈起, 驚一攤凍殼又變硬, 原本諗住只剝皮, 點知居然連衣都一次過剝埋喎, 就係咁, 一磅栗子, 唔駛一分鐘就變得青靚白淨, 簡直係意外驚喜, 以後就唔怕買多啲嚟滿足口腹之慾嘞.

其實我講過畀當家聽而家剝栗子再冇難度, 但係人到中年, 硬係冇乜記性. (我係指當家)

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

384^#

發表於 17-12-7 11:29 |只看該作者

習慣使然, 狗狗通常都要等到落街至會大小便, 除非佢唔舒服或者急到不得了, 先至會因等唔切就已經喺電梯或大堂瀨咗出嚟.

每當佢失禁, 我哋就忙個不停, 因為喺公眾地方便溺本已唔啱, 更何況尿液嘅氣味特別強, 所以要爭取時間, 盡量喺未騷擾到人嘅時候, 趕快以漂白水清洗現場, 以免阻礙街坊出入.

由於狗狗年紀漸長, 忍功難免已不復當年勇, 加上天氣凍, 便便嘅次數亦會增加, 所以每到冬天, 帶佢落街嘅次數會多少少.

每次見到狗狗大便時嘅姿勢, 都覺得搞笑得嚟又猥瑣, 表情似享受又似聚精會神, 次次見佢如此狀況都忍唔住笑.

遇着佢喺一啲唔適合嘅地方大小便就麻煩, 例如馬路中央, 試想像人來人往正在過緊馬路, 而馬路中央卻有一人一狗停滯不前, 狗正在大便, 而人正無奈地睇住狗在大便, 情景是如何地尷尬? 又例如喺斜路上, 無論當時係上斜定落斜, 佢便便嘅去向都係向下碌, 於是就要與便便競賽, 睇吓佢碌得快定你接得快, 及時接住就唔駛落咁大段斜, 若然追唔切, 咁執拾過後就有排至行得上嚟. 當然, 如當時正值要落斜就好啲, 間接快人一步到達囉.

又, 狗狗開大之後, 會習慣性地近距離聞一聞佢堆傑作, 唔知係咪可以藉此知道便便是否正常呢.

與此同時, 我亦蹲下準備執拾, 而當佢聞完佢坨糞之後, 就會嚟我跟前, 個鼻幾乎貼近我塊面係咁聞係咁索.....

難道在牠眼中, 我也是一坨糞嗎?

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

385^#

發表於 17-12-8 10:49 |只看該作者

本帖最後由 cforchat 於 17-12-8 10:51 編輯

間中會到國內一日遊飲飲食食, 好多朋友係專程去揼骨, 由於我唔好呢味, 所以就趁此空檔到處逛, 最鍾意去睇衫.

通常我睇衫一定唔會入嗰啲裝修企理價錢高檔嘅商店, 多數專揀普通店或檔口仔, 甚至連予人凌亂不堪感覺嘅攤檔都唔放過, 因為根㯫過往經驗, 呢啲先至有平嘢執.

喺國內買衫有個好處, 就係除咗襪同內褲之外, 幾乎全部都可以試上身. 對我嚟講可以話歡迎之至, 因為喺香港一般小商店係不設試身. 衫多數唔駛試, 但係褲或裙就多數要試, 因為我試過好多次, 明明度啱尺寸, 返到屋企着上身先知尺碼唔對, 過闊還好, 鬆少少無所謂, 過窄就濕滯, 連大脾都上唔到, 又點可能拉到上腰呢, 於是就要專程攞去換. 試多幾次之後就學精, 先買首選, 再睇定第二個選擇, 然後畀錢, 買完就到附近搵洗手間試, 唔啱就攞回去換碼, 冇碼就補錢換第二個選擇, 因為商店係唔會回水. 而家為咗唔想煩, 如不設試身的話, 我只買衫唔會買褲或裙.

講返國內買衫, 商店內多數存貨唔多, 只一件起兩件止, 全部掛上架, 又因為人人可試身, 所以要預件衫已被多人試穿過, 有潔癖嘅人一定唔會試. 我就冇所謂, 反正買咗之後都會洗咗先著㗎啦, 只要合我心水, 我就照試如儀.

夏天試衫較容易, 一除一著好快趣, 冬天就會論盡啲, 除非試外套就會較快, 如果係較內裡嘅衫, 就要先剝下自身多件衫才能試. 所以當店員在更衣室外問件衫啱唔啱身時, 我只能尷尬地答 : 我仲未除完我自己嘅衫呀......

又由於啲衫全部掛喺架上而冇價錢牌, 所以每當睇啱款時就要問價. 有一次見到一件啱心意嘅就問店員件褸幾錢, 店員答 : 件褸係我㗎..... 哈, 自己嘅就放埋一二邊嘛, 做乜鬼混喺賣嘅衫群裡啫.

另外有一樣唔好嘅就係, 因為冇標價, 佢哋報價前會先將顧客由頭到腳掃視一番, 然後報出個天價...... 呢啲咁嘅招數我見得太多嘞, 唔理三七廿一先殺佢半價, 跟住睇吓佢再由咩價還上嚟, 覺得值嘅就畀錢, 覺得唔值就走人, 而通常都會被叫返去, 用一種算啦遇着你當倒楣就賣畀你啦嘅口吻做成呢單生意.

有時都慚愧自己殺價也未免太狠咗啲, 所以有次本來已被叫回頭, 但係對方諗諗吓好似唔抵嘅情況下食言, 寧願退返錢畀我都唔做生意, 有見啲衫我確係幾鍾意, 於是就自動加多少少, 先至成交到.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

386^#

發表於 17-12-9 09:53 |只看該作者

本帖最後由 cforchat 於 17-12-9 09:55 編輯

前幾日至講緊狗狗失禁, 言猶在耳, 又再一次失禁, 不過今次算好嘞, 唔係喺公眾場所, 而係喺家中, 咁就可以慢慢善後.

其實每次佢急時都會預警, 喺喉際發出響聲, 但由於出現太多次狼來了, 所以佢叫一次半次時, 多數唔多理會, 到佢不斷發聲甚至吠叫, 先知道來真的, 呢個時候就會帶佢落街解決.

今次佢如常又吠叫, 但礙於當時有嘢做緊, 而且與佢平時落街嘅鐘數尚有一段距離, 再加上當家正在聽歌, 於是全世界都一廂情願以為狗狗吠叫, 只係喺度和唱, 所以就冇乜點理佢.

而家諗返至留意到, 其實當時佢已經周身唔聚財, 除咗冤身冤勢亦步亦趨之外, 又全屋周圍騰, 當時以為佢係聞歌起舞情緒高漲至坐唔定, 原來係因為太急而通處竄, 而且可能係想搵一個適合嘅地方便溺.

最終就喺我哋全不為意下, 眼白白睇住佢喺廳中撒下一大泡尿.....

除咗即刻做清潔工作之外, 別無他法, 亦沒責怪佢半分, 畢竟佢已向我哋作出最後通牒, 鬼叫我哋完全冇諗過天氣一下子變凍, 會加速佢內急咩.

通常喺咁嘅情況下, 我就會好後悔當初扔咗佢嘅狗籠.

狗籠陪伴佢成長, 由於曾經喺度大小便過, 留有佢氣味, 假如仍舊留喺度, 相信佢一急時, 一定會自動自覺入籠解決, 唔駛次次要死忍爛忍到我哋帶落街至可以舒服晒.

之前佢大病時行動唔方便落街, 都想買過新狗籠, 但係職員話如果狗狗已習慣咗落街大小便, 未必會再肯喺狗籠內解決, 咁有可能買返嚟都係得個擺字, 所以就打消咗再買嘅念頭, 繼續帶佢落街.

唉, 當初大安旨意日日會帶佢落街, 根本無需要個狗籠阻地方, 所以至扔掉啫嘛, 如果識得諗長遠, 就會顧慮到佢年老時有可能會用得著而收埋先, 而家咪可以大派用場囉.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

387^#

發表於 17-12-10 08:29 |只看該作者

早起的鳥兒有蟲吃.....

當然, 我並不是鳥兒為吃蟲才早起啦, 而是為我心愛嘅早餐才唔懶床而已.

好多人以為早餐可有可無, 所以都食得好少好清淡, 有啲甚至唔食㖭.

但係根據營養學嘅角度計, 一日之計在於晨, 早餐先至係最重要嘅一餐.

曾聽過一個比喻 : 早餐係皇帝餐, 午餐係平民餐, 晚餐係乞丐餐..... 從字面睇不難理解, 由於日出而作, 所以早餐要吃得飽才有氣力應付繁忙工作, 午餐只為補充下午繼續工作, 較為次要, 而晚上基本上係用嚟休息, 雖則未至於要如乞丐般冇啖好食, 但只純粹填肚, 唔駛講究.

不過現實啱啱相反, 大部份人認為由朝忙到黑, 難得晚餐才有時間好好享受, 應該較注重, 因而吃得比早午餐更豐富.

雖然明知早餐重要, 但往往因為時間關係, 有啲趕出門, 有啲未開胃, 所以要吃一頓豐富早餐並唔容易, 就算煮嗰個可以一早起床預備, 可是卻有可能被吃嘅人辜負而一蹶不起(床)了.

好似我咁, 早期為咗快, 早餐只能煮麥皮, 曾經試過為換花樣一時通粉一時麵包, 但係當家與吾兒卻唔多受, 又話過飽又話食唔切..... 奄尖聲悶嘅說話, 無疑對煮嘅人嚟講係一種打擊, 所以久而久之就獨沽一味麥皮算數, 佢哋易落喉之時, 我亦唔駛為煮乜而大費周章.

而家雖然多咗時間, 不過依然係以麥皮為主, 不過間中都會以自己為主, 弄啲自己鍾意嘅早餐, 至於是否合當家與吾兒嘅胃口就唔理得咁多, 吃多吃少悉隨佢哋, 我就肯定多多無拘.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

388^#

發表於 17-12-11 11:33 |只看該作者

有啲商店已陸續佈置聖誕燈飾, 令到行街時心情都瀰漫住節日氣氛.

一年到尾咁多節日當中, 我最鍾意就係聖誕, 因為凍凍哋, 好切合噴在櫥窗上漫天飄雪, 聖誕老人駕駛鹿車在雪中滑翔嘅意境.

讀書時, 每到聖誕, 每班都要忙於為課室佈置, 個個同學都全力以赴, 因為佈置嘅同時, 老師亦會到來評分, 從而選出邊班較有特色, 得獎班別有額外獎品, 所以各人都花心思絞腦汁, 務求能脫穎而出.

因為喺學校佈置得不亦樂乎, 所以嫌唔夠喉, 返到屋企就依樣葫蘆佈置一番.

佈置嘅材料不外乎彩色縐紙同埋汽球, 呢啲係有限錢, 所以喺父親畀我嘅伙食費內打吓小斧頭應該唔多覺, 於是話做就做, 即刻去文具店買齊材料.

為防止家人進出會阻礙工作, 亦想畀佢哋入屋耳目一新眼前一亮, 所以我就要同時間競賽, 希望喺佢哋歸家時可以完成.

喺我開行油又諗又剪又裁又貼又吹之下, 終於令到間屋予人煥然一新嘅感覺..... 致令各人入門第一件事唔係讚嘆, 而係溜後睇吓門牌, 確認一下有冇入錯屋.

其實我根本冇乜諗頭, 都係以學校嘅佈置作為藍本, 然後視乎距離嘅長短稍為修改, 好在家中同樣都有一把吊扇, 可以作為中心點, 容易有個依據, 否則東一條紙西一個汽球肯定顯得雜亂無章.

忙完佈置, 順手掃走地下嘅紙屑, 見反正都掃開地, 唔爭在洗埋啦. 於是一如既往, 每次洗地想快啲乾就開風扇......

一開掣, 圍繞風扇而貼嘅縐紙被風葉捲入軸中旋轉, 令貼在牆另一邊亦被扯斷, 落在我頭頂處, 汽球有啲受壓在半空中爆破, 有啲就慢慢跌下在地上飄浮...... 眼前景象, 令我欲哭無淚, 怪只怪自己糊塗大意.

忙咗大半天, 原本諗住維持聖誕氣氛至少十天八天, 點知半天唔夠就打回原形, 仲要收拾殘局, 簡直係自討苦吃.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

389^#

發表於 17-12-12 11:17 |只看該作者

有朋友做職業司機, 佢話最怕做著學童車, 因怕會導致職業性失聰.

我問佢既然唔想做, 咁同老闆講唔接載學童咪得囉, 佢話冇得揀, 接載學童係受聘條件之一.

唉, 咁為兩餐只得頂硬上咯.

有時都唔明, 點解人仔細細, 加埋嘅音量可以無限大, 置身其中, 猶如孫悟空被唸緊箍咒一樣, 吵到頭痛欲裂.

而家嘅小朋友, 可能好多都係家中嘅掌上寶, 所以大部份都係嬌生慣養嘅王子公主, 男孩子還好, 最怕遇上嗰啲刁蠻任性嘅女仔, 恕我粗魯, 見到佢哋藐口藐舌聲大大一副唯我獨尊視死如歸倔強任性寸貢貢一言九頂嘅嘴臉, 我真係恨不得可以一巴車埋去, 打到佢哋金星亂冒.

好似之前做客串保姆時, 又係遇着一個咁嘅牛王妹, 叫唔聽話唔睬, 咁啱又碰上我呢個對佢早有偏見嘅人, 即時火都嚟埋, 企圖將佢與其他乖嘅一群隔離, 以為佢會乖乖就範, 點知居然同我鬥力, 由於我本意只係純粹靠嚇, 並冇出盡力, 因而被佢嘅蠻力震回頭, 搞到仆倒在地, 即時膝頭疼痛不已.

痛完之後無耐, 隻腳開始變得痠軟無力, 嚇到我快快搽跌打酒, 過咗一排先至無事.

事後諗起, 其實不無悔意, 替工啫, 何須咁上心呢, 佢唔聽話咪無視佢囉, 駛乜幫人哋教女吖.

自此之後, 總之喺我眼底下係安全嘅, 其他我一概唔會理.

聽朋友講, 佢喺車學童期間, 見到好多怪獸學生, 佢慨嘆而家嘅世道, 唔知係有怪獸家長先吖, 抑或係因為怪獸孩子, 才會產生怪獸家長.

無論邊個因邊個果, 總之變成怪獸都唔好啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

390^#

發表於 17-12-13 11:41 |只看該作者

聽說外國有個1111學會, 好多名人都係會員, 唔知點樣至可以入會㗎呢.

呢個學會相信當你睇到1111時, 代表有守護天使正在身邊, 只要誠心向佢許願, 話唔定會心想事成.

何謂之睇到1111呢? 其實喺生活當中, 好多時都有機會見到呢組數字, 例如時間, 例如門牌, 例如一切與號碼有關嘅數字, 譬如電話號碼, 發票/收條號碼等等...... 而且一定要相連, 中間唔能夠隔住其他數字, 即是假如係110011, 雖然同樣有四條1, 但卻唔啱規矩. 仲有就係要喺無意之中瞥見先至作得準, 刻意去望去搵去等嘅話亦都係唔算數的.

雖然冇人可以證明呢個說法是否真的靈驗, 不過既然人哋有咁嘅研究, 就姑妄信之跟之.

所以剛才入嚟時, 咁啱就見到時間係11:11, 於是就急急向住空氣默念願望, 希望守護天使能夠聽到.

以前成日會無意之中望到1111, 但近年來已經鮮有地遇上, 唔知係唔係守護天使本已離我而去, 今日只係無意中經過卻被我碰過正着, 只好駐足聽吓我心聲呢.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

391^#

發表於 17-12-14 17:55 |只看該作者

有時睇電影, 本來劇情平平無奇, 但如果當中有首動聽歌曲配合畫面, 就會令我不斷追看.

講緊嘅係上世紀一齣電影"義蓋雲天", 其實內容幾老套吓, 不過有喜愛嘅周潤發與王祖賢, 齋睇人都好愜意.

差唔多接近三份二時, 講述二人日久生情, 喺一次夜遊時幕後播出呂方主唱嘅"再見悲哀", 加上二人情意綿綿相樂喁喁細語嘅片斷, 倍覺溫馨, 恨不得能化身王祖賢, 依偎在發哥肩膀上.....

由於唔鍾意尾聲嗰場令人好沉重嘅一段, 所以好少重睇套戲, 不過就會成日睇首歌嘅mv, 因為mv內已包含咗我最鍾意嘅幾幕, 所以時不時會重溫, 藉以懷念一下當年與某位入場睇呢齣戲時嘅點滴.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

392^#

發表於 17-12-15 16:47 |只看該作者

逛街時人有三急, 於是到就近商場借廁所一用.

如廁時, 聽見旁邊廁格傳來用力運勁聲, 而且聲音顯得好吃力, 我已經慢吞吞㗎啦, 直至離開時, 對方依然仲運緊功, 我心諗, 九成九係便秘, 真係戥佢辛苦.

我諗好多人都會試過便秘, 我亦唔例外, 尤其是對於我呢啲好吃煎炸香口無辣不歡嘅人嚟講, 算係便秘嘅高危一族.

一次最嚴重嘅經驗, 兩三日都冇所出, 明明感覺便便已到出口, 卻好似被石塊阻塞通道咁, 無論點用力都冇辦法將石塊推出, 結果只得暫時放棄, 因為已經冇氣.

由於個肚谷住嘅感覺非常難受, 所以稍為休息後, 又要再嘗試, 希望試多幾次, 能將頑石排放而出, 相信只要先處理佢殺出一條血路, 隨後嗰啲就可輕鬆舒暢.

如是者一日試好多次, 無奈就算已拚埋吃奶之力, 依然徒勞無功, 一到嗰刻就會閃出奇怪念頭, 希望有仙人打救, 將積存嘅便便全數挖出, 咁我就唔駛咁痛苦.

突然福至心靈, 諗起每逢飲完鹹柑桔, 未幾就會有便意, 有時仲誇張到明明只諗住開細, 誰知大嘅亦瀉住咁出, 不能自控, 我估鹹柑桔可能有軟化便便嘅功效.

於是就拎出母親多年前醃製畀我嘅鹹柑桔, 原本用嚟沖水飲, 我都略嫌成效慢, 索性全顆就咁咬嚟食, 鹹到眼都睜唔開....

果然冇耐就來了, 感覺腹部開始微微絞痛, 根據當家所講, 絞痛會伴隨一股推動力, 就好似婦女分娩時, 每一次陣痛, BB就會被一步步推出子宮一樣.

佢冇講錯, 之前除咗肚谷谷就冇乜感覺, 所以無論點運功都毫無幫助, 經過絞一絞, 雖然痛到休克咁滯, 但就係因為痛, 至令唔出唔入嘅頑石經過稍為用力之後就衝出, 跟住嗰啲就如排山倒海般傾瀉而出, 核突啲講, 多到屙突.

試咗呢次慘痛經歷之後, 戒口就冇可能㗎嘞, 不過日常會飲多啲水滋潤腸道, 以防萬一又嚟多次, 未至於去到堅硬石頭阻塞通道嘅程度.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

393^#

發表於 17-12-16 08:21 |只看該作者

以前返工時間緊絀, 早餐反而較多款式, 中式有白粥腸粉炒粉炒麵蒸包, 西式就火腿通粉公仔麵三文治烘多士..... 又可以從呢啲食物中互相配搭出更多花款, 所以每日煮/吃早餐都係一種樂趣.

而家唔趕時間, 卻變得馬馬虎虎, 一星期總有幾日係獨沽一味以麥皮為主, 只係間中至會換吓口味.

所謂換口味, 都只不過係各款撻類蛋糕西餅類西包類等等粗製濫造嘅食品, 無論賣相與口味都無法與外出媲美, 所以自家製只限於對自家人獻醜, 亦只有自家人至肯逆來順受煮到嚟就食, 以一副慷慨就義嘅胸襟嚟成就我自以為嘅成就. (佢哋好多時係喺淫威下被逼的!)

而呢啲口味, 大多都係西式, 又大多都係一般人只會喺下午茶時段至會享用嘅食物. 鍾意食當然係最大原因啦, 亦覺得呢啲食物, 一定要配以咖啡奶茶才適合, 即如喺茶樓吃包點, 多數飲中式茶, 喺餐廳吃餐包, 多數飲西茶一樣.

但礙於我每次如喺下午時份才飲咖啡奶茶, 當晚多數眼光光等天光, 後來聽人講, 飲咗咖啡奶茶, 至少要十二小時先至能將內裡引致亢奮嘅咖啡因消掉, 所以我就將下午茶時段搬到早上, 咁就唔怕瞓唔着.

對當家嚟講, 只要有咖啡, 就算早餐係中式蒸包都無所謂. 我就唔同, 會覺得一定要係蛋糕西餅先至與咖啡奶茶匹配, 就算西包類都唔太夾, 所以西包多數飲其他飲品, 只有蛋糕至會配咖啡, 而且只落奶唔落糖, 否則雙重甜味就過多嘞.

由此就衍生出, 假如翌日想嘆咖啡奶茶, 前一日就要做定蛋糕西餅, 咁第二朝就可以慢慢享受一頓自己心愛嘅早餐嘞.

而每次有心愛早餐嘅當日, 都會早早起身, 急不及待想快快享用.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

394^#

發表於 17-12-17 10:59 |只看該作者

天氣凍成咁, 對於浴室冇安裝任何發熱工具嘅人嚟講, 每到沖涼時間簡直係受罪, 所以除衫著衫時就要快手快腳, 以免着涼.

全個過程最暢快當然就係沐浴期間啦, 熱水淋身舒服無比, 雖然明知水太熱對皮膚唔好, 雖然淋身期間一定無可避免地會用多好多水, 無奈實在太凍, 都唔顧得咁多, 最緊要先爽而後快.

細個時, 冬天比而家仲凍仲漫長, 氣溫只得幾度係等閒事, 加上當時住嘅地方好闊落空曠, 人又唔太多, 更顯得冷清清凍冰冰, 所以而家回望過去, 都覺得怕凍如命嘅我能夠熬過來係一種奇蹟.

最吊詭嘅係, 讀初中時, 偶然睇過一位日本偶像嘅專訪, 當中佢話自己喺冬天依然會沖凍水涼, 強調可以防止傷風感冒增強抵抗力, 仲話各方好友對佢羨慕不已, 紛紛讚佢夠勇.....

我為咗想感受一下被讚被羨慕嘅滋味, 於是就有樣學樣, 學佢沖凍水涼, 然後就有意無意向同學炫耀, 咁凍天時仲沖凍水涼喎, 邊個得呀? 見到同學們聽到目瞪口呆嘅表情, 我就有種滿足感.

其實我大可照沖熱水, 然後老作話沖凍水, 同學又唔係一齊住, 鬼知你真定假咩, 一樣可得到如期效果啫. 但係我覺得唔係親身感受, 作到天花亂墜嚟自欺欺人又有乜意思呢, 要真正嘗試過, 被讚時才受之無愧嘛.

講真, 寒冷天時要沖凍水涼係十級極刑, 所以每到沖涼時間, 一諗到又要受刑就好愁, 內心好抗拒, 但又要硬住頭皮去行刑喎.

終於有一日, 自行終止受此酷刑, 反正讚又被讚過, 虛榮感亦達到過, 於是就結束咗一段唔算太長嘅過冷河日子.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

395^#

發表於 17-12-18 11:46 |只看該作者

家族成員傳來侄仔剛榮升爸爸嘅訊息, 附埋幾張初生嬰兒照片, 照片中有幾張與侄仔幼兒時一模一樣.

收到訊息時, 第一反應係 : 連仔都生埋, 居然都唔知佢幾時幾咗婚.

自從佢父母離異後, 家族成員嘅聚會, 佢哋已經好少參與, 所以好耐好耐都冇聯絡.

回想起侄仔年幼時, 由於佢父母得此子不易, 所以特別疼惜愛錫, 將所有好嘢都畀晒佢, 不惜大洒金錢為佢置衣裝身, 又買好多營養食品補身, 養到佢肥肥白白, 因而一經悉心打扮後, 份外得意可愛.

曾經我同佢相處過一段唔算長亦不算短嘅日子, 所以嗰陣時佢幾黐我, 我亦好錫佢, 有咩節目都會預埋佢.

有一次公司去渡假村玩, 我帶埋佢一齊參加, 最初佢都跟住我, 後來就顧住同同事嘅仔女玩, 完全唔理我. 連食飯都係坐喺同事嗰枱, 我見反正係食自助餐, 唔駛我照顧, 就吩咐佢玩時玩, 都要出去攞嘢食.

當時我覺得, 話晒係我帶你出嚟, 無論你玩成點, 間中過吓嚟我身邊都得啩, 但係佢係見我攞住重嘢, 都唔會過嚟幫吓手囉, 令我有少少唔高興. 不過回心一諗, 平時得佢一個人, 難得而家有伴陪佢玩, 由得佢啦.

後來同事因有要事, 就舉家先離開咗渡假村, 原以為唯一同佢年紀相若嘅小朋友都走咗, 斷估佢會自動自覺回到我身邊啦. 但係錯嘞, 佢轉向另一對男女為目標, 無論人哋去邊, 佢都跟到實, 例如人哋開咗房門, 佢就去人哋間房玩啤牌, 人哋喺大廳睇電視, 佢又坐喺度睇電視, 人哋兩口子喺廚房玩煮飯仔兼調情, 佢就離遠望住人哋...... 其實佢每跟一次, 我就叫佢返嚟一次, 但係呢頭返嚟, 嗰頭就藉口去斟水去睇電視去行吓..... 次次見佢久久未回就去查看, 一睇就見到佢喺人哋身邊團團轉.

最後我要用強硬嘅語氣與態度, 先至將佢揪返嚟我間房.

之所以咁嬲, 一來本身與嗰對男女同事唔多咬弦, 侄仔係我嘅人卻倒戈相向, 即係落我面啦. 二來佢已經十歲, 年紀唔算細, 就算幾鍾意黐住人哋, 都唔好當我冇到吖, 而且仲要叫唔聽, 人哋唔知仲以為我同佢唔識㗎添.

喺我角度, 佢完全係一個養唔熟嘅人, 我承認我係小氣, 所以呢次之後, 我收回對佢嘅愛錫, 同佢嘅關係亦變得好冷淡.

而家佢已為人父, 我除咗感慨時間過得快之外, 並冇戥人喜悅嘅感覺.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

396^#

發表於 17-12-19 11:29 |只看該作者

經過九龍東一個屋邨, 舉目望去, 發現有好幾個空置單位, 而且唔係近期, 係已經有好一段時間嘞.

淨係眼所見一個屋邨同坐向嘅已經有好幾個, 都未計見唔到嗰啲.

究竟房署做緊乜呢, 既然連凶宅都可以攞出嚟輪候, 何以又會讓呢啲市區單位一直空置咗咁多年呢.

難怪輪候冊嘅年期愈排愈長啦, 除咗申請人愈來愈多之外, 對空置單位一直丟空卻不聞不問, 亦係一個主要原因.

喺市民求屋若渴嘅情況下, 假使房署職員稍為攞出少少心, 出多少少力, 基本上呢頭有人遷出, 嗰頭就應該安排有人入住, 交接期頂多一頭半個月, 而唔應該超過年逾依舊人去樓空囉.

除非另有內情啦, 如果只係人為疏於職守, 咁對嗰啲真正有需要卻要捱貴租而遲遲未獲編配上樓嘅市民嚟講, 無疑就變成有人冇樓上, 有樓冇得上, 實在諷刺.

希望下次再經過時, 所有單位已有人居位啦, 咁就表示輪候冊上嘅人龍又可以縮短少少, 稍為紓解一下民困.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

397^#

發表於 17-12-20 14:21 |只看該作者

入冬以來, 天氣稍為凍少少, 當家就提議打邊爐, 通常都會揀周末, 因為第二日唔駛早起, 咁就可以盡情食, 假如飽得滯瞓唔着都唔駛擔心唔夠瞓.

話晒係今年首次打, 所以個個都贊成.

第二個星期又係凍, 於是又打, 但係仲有少許餘興, 所以就順佢意.

跟住第三個星期又比前兩個星期凍, 當家又話要打, 好, 反正仲有啲食剩嘅火鍋配料, 打就打啦.

打至中途, 我已經聲明暫時唔再打, 個個星期買同樣配料食同樣食物, 佢食唔悶我都買到悶.

點知緊跟其後嘅周末, 凍到要發出寒冷警告, 見當家欲言又止, 已經知佢想點, 所以未等佢開口, 我已經拒絕.

次次凍都話打邊爐, 咁食法仲得掂嘅, 隔耐啲先啦.

佢問如果唔打邊爐, 可否煮糯米飯, 因為一樣有驅寒暖胃嘅作用喎.

好啦, 見咁耐冇煮, 佢又鍾意食, 今晚就炮製臘味糯米飯啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

398^#

發表於 17-12-21 10:57 |只看該作者

臨近聖誕, 朋友去做負離子, 將及肩嘅頭髮拉直, 原以為清湯掛麵易打理, 點知煩多兩錢重, 因為髮尾位置成日翘起.

不嬲頭髮長至膊頭位係最尷尬嘅時刻㗎啦, 克服咗呢一段時期, 跟住先至可以留幾長都得.

每逢我短髮想變長髮時, 又係去到樽頸位就煩不勝煩, 要嘛就引剪一快繼續短髮, 否則就一定要電曲, 因為曲髮本身就有凌亂感, 就算翹起得嚟都較自然. 直髮就唔同, 頭頂至耳下都係直, 唯獨是髮尾彎起, 畀着我一定會覺得核突, 除非唔介意亞米茄髮型啦.

聽完我咁講, 佢就話想去電曲, 我話短時間之內連電兩鑊, 頭髮/銀包會好傷㗎, 反正都諗住曲咯, 不如日日紮起, 直至過咗尷尬期再睇吓點啦.

呢啲算唔算係貼錢買難受呢?

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

399^#

發表於 17-12-23 09:38 |只看該作者

被邀往參加幾個聖誕派對, 本來普天同慶, 難得與家人朋友聚聚舊, 好應該一口答應赴約, 但係一諗到搞手們係愛熱鬧兼情緒高漲之輩, 席間一定會諗頭多多以達到賓至如歸, 我就不得不卻步, 打起退堂鼓來也.....

嚟到一把年紀嘅今日, 壓根兒提唔起任何興致與眾同樂打成一片, 想參加聚會, 全因想與家人朋友一邊吃飯一邊閒話家常, 而唔係要玩甚麽遊戲, 輸咗要怎樣罰, 贏咗又可得到甚麽獎品等等..... 呢種鬧哄哄嘅節目已距離我好遙遠, 為免喺當中唔投入會掃主人家興, 倒不如一律以唔得閒作為藉口敬謝不敏.

其次就係無可厚非地, 呢啲派對總有交換禮物環節, 雖然金錢有限制, 但始終都要花吓心思, 唔想求其買啲毫不實際嘅禮物, 於是又要到商店絞一輪腦汁先至勉強過到自己嗰關.

雖然交換禮物, 旨在搞吓氣氛, 禮物本身並唔重要, 來來去去都係日用品居多, 但就係因為係日用品, 家家戶戶幾乎已擁有, 所以抽到呢啲禮物的話, 就要搵地方收起或索性束之高閣, 無形中就令豆腐膶嘅居所囤積不少雜物.

試過將之捐畀慈善機構, 但原來人哋嘅地方已被呢啲大同小異嘅物品放到無處容身, 送去等如令佢哋嘅空間更擠逼得水洩不通. 可想而知禮物雖實際, 但就係太實際, 幾乎人人已有, 於是就一概往外送, 眼不見為淨, 原以為借花敬佛做善事, 卻冇諗過此舉竟會帶來他人不便.

況且唔係人人會花心思構想買實際禮物㗎嘛, 隨隨便便買件所定金額以內嘅物品, 抽到後除咗得啖笑, 根本得物無所用, 扔之浪費, 留之眼冤, 嘥錢又無謂.

朋友曾經抱怨過, 好難請到我肯出席嘅飯局, 其實一啲都唔難, 只要冇遊戲項目, 只要冇禮物環節, 純粹普通吃餐飯的話, 我係樂於赴呢啲飯局的.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

400^#

發表於 17-12-24 10:06 |只看該作者

每次聽陳百強嘅"凝望", 不期然就會諗起朋友話呢首歌如果喺平安夜聽, 又身處於孤男寡女共處一室時, 會好容易失身.

其實單單一首歌未必咁容易起到催情作用嘅, 好多純/輕音樂都有呢個效果, 但係如配合當時嘅環境氣氛, 再加埋輕攬纖腰臉貼臉跳慢舞嘅環節, 則可以寫包單肯定十之其九一定失身. (第十個可能有苦衷所以無奈要剎掣)

當我將以上論點與其他人分享, 一半人會認同, 一半包拗頸之輩就不以為然, 認會有心失身隨時都會失, 駛乜等到平安夜至嚟失啫.

無錯係幾時失身都可以, 但係相比起其他節日, 平安夜更容易嘛.

因為翌日係假期, 當晚就可放鬆心情玩至通宵達旦, 而且因被周邊熱鬧氣氛感染, 自不然亦帶動自己進入亢奮狀態, 加上無可避免會飲酒狂歡, 結果藉着幾分酒意, 就容易情不自禁情竇初開情意綿綿情深款款..... 地發生關係.

君不見好多事後避孕大多係喺聖誕後才有需求嗎? 當然, 唔排除清明重陽復活呢啲節日都有求助個案嘅, 但應該唔多囉.

有口痕友話, 唔怪得一年當中, 九至十月嘅出生率較其他月份高啦, 原來係喺聖誕播種, 九至十月收成.

哈, 講到真嘅一樣, 難道佢有做過統計?

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用