興趣嗜好 今日: 3 | 主題: 124524

積分: 2724

401^#

發表於 17-12-26 08:53 |只看該作者

早前姨媽到, 流量比起以前任何一次都超多, 幾乎一次等如過往三個月相加嘅流量, 搞到我甚為擔心, 唔知有乜事.

將隱憂話畀當家聽, 佢嘅反應係 : 吓?! 咁會唔會過底㗎?.....啊! 不過唔怕, 你最近至入咗咁多巾, 有排用!

條友簡直五行欠打, 所擔心嘅並唔係我會唔會失血過多, 居然係驚唔夠巾用, 佢真係對我好好囉.

好在勁流咗幾日就止咗回復正常, 咁都冇咁驚.

不斷思考呢幾日食咗啲咩, 搞到血長流, 唯一有嫌疑就係進食咗含有人參成份嘅薯片, 因為人參有行氣活血之功能, 可能因而令血流量運行過快所致.

平時進食咗所謂行氣活血嘅食品, 唔覺有乜效用, 偏偏喺唔適當嘅時候, 佢就發揮功能, 想點呢?

記得好多年前某一日, 適逢又係來經日, 身體並無任何不適, 於是與當家出外去逛街. 行經一間百貨商店, 見好多產品正在做特價, 其中包括一款紅外線按摩眼罩, 賣點係戴上之後可按摩眼球消除疲勞, 我見可以試戴, 所以就戴上感受一下咩感覺, 睇吓如何消除疲勞咁神奇.

戴咗唔夠一分鐘, 正好奇在研究當中嘅紅光係乜東東之際, 忽然覺得腹部勁痛, 係平時偶一為之親戚到訪時或便急時嗰種絞痛, 於是急急去洗手間解決, 希望完事後會稍為舒緩痛楚, 可惜一啲幫助都冇.

唯有急急召喚當家到來會合, 並主動提出飛的回家.

平時盡可能都會選擇徒步當車, 今次居然連巴士都嫌慢而搭的士, 可想而知真係痛楚難當, 想盡快返屋企瞓覺, 因為根據過往, 瞓醒之後會冇咁痛.

事後不無疑問, 係唔係紅外線會令血液循環, 又遇啱我來經, 所以至令我忽然之間痛到冒冷汗呢? 到底當中有乜千絲萬縷嘅關係會導致腹痛呢?

此後, 我唔敢再貿然觸碰一些標明對人體穴位有按摩功能嘅產品, 因為驚不知就裡又中伏.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

402^#

發表於 17-12-27 08:11 |只看該作者

當家生日時, 我好有誠意邀請佢出去吃飯慶祝, 佢喜出望外之餘, 又扮晒嘢地推卻一番, 係人都睇得出佢欲拒還迎啦.

佢狀甚客氣兼喜孜孜地話 : 唔駛啦, 生日啫, 冇乜大不了, 你一向都唔慶祝㗎?

我依然一臉真切誠懇 : 要嘅要嘅!! 慶祝我又對少你一年吖嘛.

佢即時洩晒氣.

結果講講吓就不了了之.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

403^#

發表於 17-12-28 09:33 |只看該作者

住宅有三部電梯, 分別係單數停, 雙數停, 同埋層層停.

每次無論上樓落樓, 就算幾趕時間, 我都只會按自己所屬樓層嗰部電梯.

但係好多住戶唔理三七廿一, 好順手地就按兩部. 明明其中一部已經到達, 佢依然要按另一部, 就係因為有呢啲人, 搞到有時要額外花時間等候電梯到達.

次次喺大堂等電梯, 當見到指示燈嘅訊號係上同一層, 跟住一部停喺度, 另一部就落緊嚟, 好明顯又係一次過按晒兩部啦. 所以當門開處, 我會望吓咩人咁冇公德心, 然後藐爆佢. (唔排除咁啱有人搭上去同一層, 但係既然見到指示有電梯上緊嚟就等吓啦, 居然仲要按另一部, 所以一樣要被藐.)

每部升降機嘅耗電量都唔細, 無情情被按上按下又唔係載客, 唔單只浪費電力唔環保, 而且亦會加速鋼纜勞損耗竭縮短壽命, 到時電費/維修保養/更換嘅使費, 全部都係轉嫁畀住戶, 一個二個又牙痛咁聲.

愛惜公物, 人人有責!

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

404^#

發表於 17-12-30 10:50 |只看該作者

小友問我, 而家借錢駛唔駛要滿18歲?

我一知半解答, 應該要啩, 因為預期18歲後算係獨立, 借錢畀你預計你有能力還. (我一路答一路都抱住懷疑態度, 而且覺得理由好牽強)

小友再問, 乜唔係而家借錢連身份證都唔駛出示㗎咩?

我答, 你千祈咪信呀, 昆你落搭咋, 假如你信以為真, 呢頭借完, 嗰頭你好預備定着草嘞.

而家打開電視, 借錢嘅廣告多如天上繁星, 乜證明都唔駛就有錢落袋, 每次當家見到呢啲廣告就會諸多批評, 話年中都唔知害死幾多人.

都係嘅, 如果係救命應急之用就話予人方便啫, 如果借錢只為享樂購物就真係多得佢唔少, 尤其是對於一啲冇節制能力冇還錢能力冇思考能力嘅人士, 借錢畀佢即係害咗佢, 玩吓手可能有借冇還添.

呢啲公司, 一心只想收取高息就係咁放數, 到底連本帶利可以收得返嘅有幾多呢? 而要聘請專人上門追數嘅成本又幾多呢?

雖然而家喺廣告末加咗一句警告 : 還得到先好借! 但係當你滿腦子已被借錢返嚟會點使嘅畫面充斥住, 還唔還到已是後話, 根本唔會諗得咁長遠.

況且借嘅時候一定會有成盤還款期計劃㗎, 點樣節衣縮食點樣開源節流, 但最後能否如期清還, 仲係未知數.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

405^#

發表於 17-12-31 08:21 |只看該作者

當家一邊卸下舊月曆, 一邊感慨地自言自語 : 唉! 好似冇幾耐之前先至掛2017年嘅月曆, 眨吓眼又要换2018, 咁就一年, 時間過得真係快!

咪就係! 日復日真係唔多覺, 驀然回首, 才驚覺原來時間已在不知不覺中飛快地溜走.

回看整年, 除咗當家搵工時令全家起哄過一陣子之外, 托賴一家人包括狗狗皆平平安安健健康康快快樂樂地渡過, 非常感謝上天!

期望來年, 家人依然健康快樂, 生活依然平淡如水, 就係我最基本亦最重要嘅願望.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

406^#

發表於 18-1-1 09:00 |只看該作者

今早起床, 當家問我昨晚聽唔聽到條街好嘈, 好多人喺度喧嘩叫囂, 仲夾雜住煙花嘭嘭聲?.......

我話完全聽唔到!

近年來, 未等倒數我已經進入夢鄉, 而且瞓到死豬咁, 所以每當踏入新一年當下, 街上傳來人們歡呼喝采聲, 汽車響咹聲..... 我統統無知無覺, 事後被告知才得悉原來咁熱鬧.

讀書時, 大多數除夕夜都係聽住收音機渡過, 通常倒數完, 就係新聞時間, 每聽到報導員讀出 : 踏入元旦, 首宗嘅乜乜案物物案發生喺邊度邊度..... 我就會諗, 才新年就發生事故, 事主真係慘..... 聽吓諗吓不知不覺就瞓着咗.

年年如是悶, 年年如是過.

咁多年來, 只有一次出外見證倒數, 就係與當家初相識嘅時候, 兩條友無所事事, 就去維園逛, 逛幾逛忽聞人聲鼎沸人群聚集, 原來正準備倒數.

身處其中, 受到周遭氣氛感染, 不期然心情亦好興奮, 跟住熱鬧過後, 人群散去, 我同當家就乘船打道回府, 去到碼頭卻冷冷清清, 與之前嘅環境大相逕庭.

由細到大, 可能冇乜幾可有機會慶祝呢啲萬眾同歡嘅活動, 因而漸漸已成為習慣, 如果而家叫我參與, 我仲邊得嚟有衝勁吖, 見到咁多人嘅場面都驚驚啦, 不如安在家中平靜地迎接新一年仲來得寧靜舒適愜意.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

407^#

發表於 18-1-3 11:03 |只看該作者

換咗個電水煲只係好短時間, 但係已經開始壞壞地.

本來一插電就應該煲水, 但係佢就保溫, 於是就人手按煲水掣, 點知冇耐又跳去保溫, 如是者按按跳跳, 一煲兩公升唔夠嘅水, 居然要煲成半個鐘, 如果等住飲水嘅話, 肯定渴死.

忍咗一頭半個月, 當家就決定買過一部, 起初我反對, 因為只係跳掣啫, 最終都會煲滾㗎嘛, 只係時間問題啫, 又唔係完全唔識煲.

不過當家堅持, 話雖然仲用得啫, 但吓吓要睇水, 以便一跳掣就按都煩啦, 索性買過部冇咁嬲.

既然佢咁講, 換就換啦.

都係嘅, 明明係電水煲自動煲至滾㗎嘛, 要人手操作, 不如用普通水煲放喺爐上煲好過啦.

我哋講緊呢番話嘅時候, 正在煲緊水, 出奇地, 全程冇跳過掣, 由頭煲到尾都唔駛手動, 煲滾後自動跳至保溫掣.

我同當家講, 似乎水煲有靈性, 知道快將被遺棄, 所以乖乖地冇扭計喎, 不如唔好換住咯.

自從決定唔換, 佢又故態復萌, 每次煲水總要跳十幾廿次掣, 有時唔記得煲緊水, 冇去理佢, 就原煲不動, 啲水熱都唔熱吓, 好明顯係呢頭煲嗰頭就跳啦.

當家又舊事重提想換, 我話算啦, 費事佢又賣乖, 又玩一煲到尾畀我哋睇, 話晒而家佢仲識煲水, 等佢壽終正寢完全冇反應先至換啦.

其實以前嗰部已經用咗好多年, 只不過因為接駁蓋與機身穿住針嗰個膠嘅位置因用得耐接合得多而磨蝕, 搞到個蓋有時好難合上, 要人手將支針推入凹槽先至冚到蓋, 其他操作都好正常.

後來見反正用咗咁耐, 而且膠位不斷被磨蝕而產生嘅碎屑, 不時會跌入水中被不知不覺飲下, 有見及此, 先至換咗而家呢部, 點知唔夠一年就有問題, 真係新不如舊.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

408^#

發表於 18-1-7 10:08 |只看該作者

我覺得政府咁多基建設施, 最有用嘅就係公共圖書館, 除咗可免費借閱書籍, 亦有座位供市民歇息一下, 環境安靜舒適, 夏天時更成為好多人嘆冷氣嘅地方, 簡直係最佳消暑同消閒嘅勝地.

以前仲未電腦化, 借書證只係三張自己寫上姓名地址嘅小巧型硬咭紙, 每張咭紙只能借一本書, 所以每人每次只能外借三本.

借書嘅程序係職員會將夾附喺每本書嘅資料紙抽起與咭紙放埋一齊, 跟住佢哋就收起, 直至還書時才歸還咭紙畀返你, 資料紙就夾回書內, 所以只能呢間借呢間還, 除非館內增加新書, 否則一直只得嗰啲書.

由於當年冇乜娛樂節目(嘻嘻, 雖則而家都係), 所以課餘時間總會到圖書館流連, 礙於藏書種類唔多, 書架上只得疏疏落落寥寥無幾, 有興趣睇嗰啲較出名作者嘅著作來去只得幾本, 一早已經借嚟睇晒, 有時揀無可揀, 連不知名作者都照殺, 甚至借無可借時, 翻譯小說都唔放過.

所以好多時會特登去一啲較大間嘅圖書館, 感覺上種類會較多, 而事實上, 每次去到都收獲甚豐, 借咗好多書.(用埋家人嘅借書證)

後來逐漸電腦化, 借書證已由咭紙變成只需"嘟"一"嘟"就可到港九新界嘅圖書館借書, 亦可於任何一間圖書館還書, 因而令書籍嘅流通性大好多, 所以而家就算去較細間, 一樣有機會借到想睇嘅書.

而家每次入到圖書館真係花多眼亂琳琅滿目, 無論種類啦作者啦數量啦都多咗好多好多, 雖然一張證可借八本, 但都唔夠, 要用埋家人嗰啲證先至借得晒, 所以而家逢親去圖書館, 都會帶定一個特大環保袋用嚟裝書.

有時會同以前常一起結伴往圖書館嘅同學慨嘆, 唉, 當期時有時間有精神有眼力卻無書可借, 而家冇乜時間冇乜精神冇乜眼力, 啲書卻多如天上繁星, 如果今時藏書嘅數量與種類, 能放於當時嘅圖書館就好咯.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

409^#

發表於 18-1-8 11:55 |只看該作者

逢親天氣轉冷, 狗狗就唔妥.....

有時腳震震, 有時冇食慾, 有時懶洋洋, 有時冇精神..... 總之同平日會有分別啦.

記得狗狗生平第一次經歷冬天嘅時候, 又係出現以上徵狀, 令致我哋擔心不已, 因為佢平時唔係咁㗎嘛, 忽然靜下來, 唔驚就奇嘞.

後來猜測佢可能太凍, 一時間身體未能適應, 所以至會有咁嘅情況發生, 於是就去買衫仔畀佢著, 可能喺保暖兼漸漸適應咗溫度之後, 冇幾耐之就恢復活潑好動.

其後每到咁上下時節, 又會再重複以上步驟, 不過而家已經冇得同佢著衫, 因為佢唔慣披住外來物, 一披上就如觸電般唔自然, 跟住就千方百計要揮走.

諗住呢兩日較凍, 所以畀多咗肉佢食, 唔知係咪虛不受補呢, 無啦啦上吐下瀉, 而且仲聽到佢個肚攪腸沙咕咕聲, 然後係咁放屁, 跟住仲有少許失禁..... 又搞到我哋憂心忡忡, 當家甚至全晚要陪喺佢身邊, 以便狗狗一叫時就立即帶佢落街解決.

還幸而家總算稍為好轉, 正逐漸止嘔瀉亦冇乜再聽到攪肚聲.

不過我想講嘅係, 冇病冇痛就皆大歡喜啦, 假如大吉利是有乜唔舒服, 可唔可以唔好喺一啲天氣寒冷兼夾落住雨嘅日子至嚟發作呢, 因為咁嘅環境之下, 會令整件事整個場面添上一種愁雲慘霧嘅氣氛, 無形中令致心情非常非常沉重.

想像一下, 如果外面烈日當空藍天白雲天朗氣清天氣炎熱, 若然遇着人或狗不幸抱恙, 雖然都會擔心, 但未至於去到愁雲慘霧神色凝重嘅地步嘛, 話唔定仲會樂觀開朗地相信好快會冇事㖭.

難怪有人話天氣會影響心情啦, 其實唔只心情, 連病情一樣會受到影響, 所以天冷時特別多人病可能就係咁嘅原因.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

michellelam369

別墅

積分: 816

410^#

發表於 18-1-10 18:29 |只看該作者

已經開始濕要開抽濕機

私人傳訊回覆引用

luckybaby2011

水晶宮

積分: 72641

411^#

發表於 18-1-11 09:32 |只看該作者

cforchat 發表於 18-1-7 10:08
我覺得政府咁多基建設施, 最有用嘅就係公共圖書館, 除咗可免費借閱書籍, 亦有座位供市民歇息一下, 環境安靜 ...

圖書館大了、可惜愛閱讀既人少左、書展最受歡迎係旅遊書

私人傳訊回覆引用

積分: 2724

412^#

發表於 18-1-14 10:16 |只看該作者

回覆 luckybaby2011 的帖子

因為網上資訊好方便, 變成安在家中都可以搜尋好多資料, 毋須動輒去圖書館摷書, 所以而家流連圖書館嘅人, 大多數都係前往避靜避暑, 真正閱讀嘅人唔係咁多.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

男爵府

積分: 8058

413^#

發表於 18-1-14 11:38 |只看該作者

回覆樓主:

樓主好似寫日記咁。XD

私人傳訊回覆引用

男爵府

積分: 8058

414^#

發表於 18-1-14 11:39 |只看該作者

cforchat 發表於 18-1-3 11:03
換咗個電水煲只係好短時間, 但係已經開始壞壞地.

本來一插電就應該煲水, 但係佢就保溫, 於是就人手按煲水 ...

請問乜野牌子？

私人傳訊回覆引用

積分: 2724

415^#

發表於 18-1-14 12:03 |只看該作者

本帖最後由 cforchat 於 18-1-14 12:06 編輯

朋友介紹喺新界區街市樓上, 某位過氣男歌手所開嘅食店水準唔錯, 於是就拉大隊去捧場.

之前朋友們係打算自行買海鮮, 然後請食店代為烹煮, 其實我個人完全唔贊成呢種做法, 一來一場去到, 當然係食人哋嘅食物啦, 二來人哋開門做生意, 唔會免費幫你煮㗎嘛, 一定會收加工費, 咁圍起上嚟條數咪貴好多囉.

不過既然跟得大隊, 我就費事出聲, 由得佢哋鍾意點就點啦.

好在佢哋喺買海鮮前, 都先到食店查詢一下收費, 想知道到底是否划算才決定.

對於呢位男歌手, 我都有啲印象, 加上當時只係下午四五點, 食店仲未營業, 冇乜人流, 所以當佢露面時, 好容易就被認出.

記得早排佢再度出現螢幕時, 有媒體到佢食肆採訪, 見佢對顧客表現親切平易近人招呼周到, 就希望節目出街後, 能有多啲顧客往捧場, 支持人家默默耕耘嘅熱誠.

而家近在眼前, 發覺佢嘅嘴臉完全唔係嗰回事, 唔單只全程沒有一絲笑容, 而且答客人問題時, 仲表現得唔耐煩兼語帶譏諷......

例如 :

朋友問加工費幾多, 佢一邊執拾檯面望都冇望朋友一眼, 就講咗一個數, 然後補充一句, 呢個數只係基本, 要視乎你點煮法先至決定實收幾多. 朋友問, 乜有分別㗎咩? 佢大大聲答, 梗係啦, 清蒸同紅燒都唔同做法啦.

朋友又問有冇乜乜海鮮, 佢依然表現冷淡答, 我哋咩海鮮都有, 但如果你哋要食靚嘢就要自己買, 我呢度只得普通貨色.

朋友問可否坐喺某張檯時, 佢繼續一副冷冰冰面孔答, 張張檯都已經被訂晒嘞, 你哋要就呢張啦, 連蘇師傅都話係風水位嚟㗎..... (跟住帶朋友去一個偏僻角落貼住柱位旁嘅一張檯)

講完之後, 佢就唔再理我哋, 自顧自行咗去.

最初, 我哋只係商量喺度食定係自行買海鮮, 經過一輪精打細算之後, 認為如計埋加工費, 條數好襟計, 所以就打消呢個最初嘅念頭.

好啦, 咁如果喺度食呢, 卻又唔想坐喺嗰張似被隔離嘅檯呀, 而且一諗起剛才被冷待嘅情形, 個個都覺得無癮, 寧願光顧第二間, 都唔想喺度睇人面色, 況且佢啲價錢又唔係平, 無謂貼錢買難受啦, 所以一行人就頭也不回離開食店.

本來大力推介嚟呢間食店嘅朋友顯得好尷尬, 話以前嚟幫襯時, 歌手好好招呼好好笑容㗎, 可能而家多人慕名而來, 多到做唔切, 所以態度至咁寸.

打得開門口做生意, 就預咗有啲比較麻煩嘅顧客問東問西, 無疑, 朋友們多多問題又未幫襯, 確係會令已生意滔滔嘅佢唔志在, 但誰人能保證, 日後仍能其門如市呢? 我相信要令食客再度光顧, 除咗食物質素價錢實惠之外, 熱情款待都係致勝之道.

當然, 失去我哋呢幾個嘅生意, 完全無損佢嘅營業額, 但係如果自恃少一個唔少嘅心態, 咁次次都少一個, 加加埋埋就好多個. 或者佢只滿足於眼前嘅唔憂做, 而冇諗過長遠可能冇得做啦.

唉, 難怪佢出道幾年, 紅都未紅就謝啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

416^#

發表於 18-1-14 12:15 |只看該作者

回覆亮燈的帖子

可能只係我黑, 所以買冇耐就壞, 而且可能只係單一事件, 所以無謂寫牌子嘞, 費事對佢唔公平啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

男爵府

積分: 8058

417^#

發表於 18-1-14 14:05 |只看該作者

cforchat 發表於 18-1-14 12:15
回覆亮燈的帖子

可能只係我黑, 所以買冇耐就壞, 而且可能只係單一事件, 所以無謂寫牌子嘞, 費事對佢唔公 ...

明白，其實任何牌子都有機會發生，當唔好彩啦！

私人傳訊回覆引用

積分: 2724

418^#

發表於 18-1-16 17:59 |只看該作者

近來股市幾乎未停過升升升, 有買股票嘅朋友肯定賺到笑.

正想向佢道賀, 順便屈佢請飲茶時, 卻見佢愁眉不展.

搞乜呀, 又話有斬獲, 何解卻苦瓜乾咁嘅面口呢?

細問之下, 原來係放咗之後依然不斷升, 每升一格就等如賺少咗一格嘅錢, 所以就愈諗愈揼心, 後悔自己放得太早.....

唉, 呢個情況, 想當初我喺股壇嘅時候, 次次都經歷㗎啦, 買入後就跌, 賣出後就升, 從來未試過買入升賣出跌, 當其時咪又係好似朋友咁懊惱不已囉.

所以嗰陣時嘅朋友, 個個都以我作為明燈指引, 我未買前佢哋唔會買, 我未放前佢哋絕對唔會放.

哈, 衰得佢哋吖, 但係唔好話喎, 佢哋呢種做法又確係萬試萬靈喎, 所以佢哋總係賺得比我多好多.

明明有錢賺都唔係咁開心, 只因為賺少咗而搞到悶悶不樂, 咁樣有乜為呢? 所以後來就索性退隱江湖, 以後股市如何升升跌跌, 只以旁觀者嘅身份笑看風雲.

雖然唔再沾手, 但係間中都有留意市況, 尤其是好多朋友都有入市, 就成日會聽佢哋高談闊論儼如專家口吻. 但係每當又準備想為買貴賣平而大吐苦水時, 我就即時安慰並曉如大義 : 唔可以賺得咁盡嘅, 都要畀幾格空間人哋賺㗎嘛, 如果買得平時又賣得貴, 咁叫放貨畀你或承接你貨嗰啲人食穀種咩?

雖然頗為阿Q, 但係唔咁做, 又可以點呢, 我哋冇水晶球, 唔會知道最低價與最高價, 只要買賣時係自己嘅心水價, 咁無論跟住係續跌定續升, 都同我哋無關.

最多下次再買賣時, 咪重新再定個比上次更高/低嘅位囉.

但係唔好話我唔提呀吓, 有時為咗執着於一格半格嘅差距而錯失咗買賣嘅機會, 可能又係另一個揼心嘅理由.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

419^#

發表於 18-1-17 11:55 |只看該作者

同朋友傾開, 話自己好多時嘅第六感都幾靈驗, 於是佢就轉述喺網上聽過, 講關於靈力嘅題材, 當中提到如果符合以下幾點, 代表與生俱來嘅靈力甚強, 而且好有潛質學法.....

1. 對神怪/魔法呢類嘅題材好有興趣 -----> 我絕對有.

2. 間中會見到1111 -----> 以前較常見, 而家少咗.

3. 忽然會想起某個人, 冇耐之後就見到佢或佢會主動搵你 -----> 呢樣試過好多次, 有時行行吓街, 無啦啦會諗起阿邊個邊個, 跟住竟然係街口遇見佢, 我都被嚇一跳.

4. 唔精通煮嘢食, 但卻可炮製出一道道美食, 而且味道唔係差 -----> 嗱, 我對煮嘢食一向冇乜研究, 甚至可以講得上係求求其其, 無論調味或食材配搭都係隨自己喜歡而粗製濫造, 但每次嘅首次嘗試, 都出奇地得到贊賞喎, 始料不及. 可是當第二次再煮時, 效果卻強差人意, 所以吾兒成日話我, 煮第二次就唔好食, 證明我每次都係符碌卻成功.

5. 可以感受到別人嘅貓貓所思所想 -----> 點解係貓唔係狗呢? 由於我未接觸過貓, 所以唔熟悉佢哋嘅脾性, 因而無從得知佢哋諗緊乜.

6. 每當見到一啲動物時, 自己就會不期然將聲音調較至某個音頻與佢哋交談 -----> 唏! 我成日用一種諗住狗狗聽得明我講乜嘅音波同佢傾偈㗎啦.

7. 對其中一個顏色特別情有獨鍾或特別抗拒 -----> 我諗人人都會對某個顏色較偏愛, 對某個顏色唔鍾意.

8. 能夠分辨出某個人是否正在說謊 -----> um..... 如果有蛛絲馬跡, 我應該都分辨得出嘅.

9. 相信植物係有生命, 因而會與植物談話 -----> 我一向都相信天地萬物都有生命, 植物會生長又會凋謝, 仲唔係有生命? 既然有生命, 同佢哋傾偈都好正常啫.

10. 渴望赤腳走在草原上 -----> 如果肯定草原上冇蛇蟲鼠蟻的話, 赤腳行喺被陽光照射過嘅溫暖草地上, 的確係一種享受.

11. 喜歡獨自享受大自然, 多過與人結伴同遊 -----> 如果結伴同遊之人係投契嘅, 咁與人結伴又無妨, 相反如果言語無味, 咁我就寧願一個人在途上嘞.

以上除咗5.之外, 幾乎唔全中都半中, 睇嚟我係一個非常有學法潛能嘅人.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用