青青河邊草 發表於 21-2-18 21:47 
本帖最後由 青青河邊草 於 21-2-19 13:48 編輯
我剛剛睇到佢發現鄭麼麼害bb, 居然果下完全俾人食住，無 ...
我都唔只一次講改編原著弱化咗男女主，男嘅唔夠野心唔夠霸道，無錯蕭綦係好錫王儇，但唔係縱容，佢講過佢嘅女人可以驕傲，但唔可以驕縱，佢一步一步咁等王儇長大，面對殘酷嘅現實，只有當權嘅至可以話事，要走上權力最高位不得不狠心，無數人嘅犧牲成就小數人嘅野心；而王儇幫助蕭綦清除障礙，一個在外，一個在內，蕭綦走上朝堂權力最高峰，同樣地王儇亦走上後宮權力最高峰。
王儇絕對唔係白蓮花，蕭綦更應該係有野心如王藺，但劇就要編到佢兩個心地太善良，佢地有令天下人安居樂業嘅良心，蕭綦亦非真係寒門，但佢體驗過最低下階層蟻民嘅苦，佢想天下太平就必須要人人可以安居安業，而佢完全明白只有佢至可以做到呢點，所以佢除咗私心之外，佢都有懷抱天下黎民嘅善良，但佢絕對唔係白痴，佢冇唔信懷恩黑化，根本佢一早有遠見佢班兄弟有機會腐化，邊個面對權力金錢女人各種物慾可以把持到，而且佢地幾個將軍都係同蕭綦一路走來，冇一個係會比蕭綦差好多，只係佢地冇蕭綦咁通透，而又有遠見。
王儇唔只唔係白蓮花，因為佢自小被寵到無法無天，佢心高氣傲，不知天高地厚，嫁蕭綦被涼咗三年，令佢明白人嘅力量太小，就如佢萬千寵愛在一身，最後都淪為一顆棋子，經歷一次又一次變故，王儇慢慢成長，慢慢學會要狠要保護自己，所以劇改編佢當初守城，一下將佢推得太高，後面又加強奸角嘅殺傷力，令王儇變得冇晒戰鬥力，實為敗筆。書入面王倩根本稍為表露對蕭綦嘅心思，王儇已經即刻截佢後路，王儇有份決定揀佢去和親，只是後來王倩用咗一D小手段置身事外，改由顧采薇補上。
大王夫婦成個爬上權力核心過程係有推進有舖排，有情非得意，有無可奈何，有人心算計，前半部劇改編還可以，後半實在太多反覆，無端端王儇又要蕭綦去忽蘭救佢，前半部已經玩咗一次咁嘅戲碼，後半部又再嚟多次，本身王儇個角色係一個弱質纖纖嘅女人，佢真係靚，又因為養在宮中，自帶貴氣傲骨，所以吸引唔少男人，但佢唔識功夫，何必要佢出現喺戰場，呢D係男人戲，由班男人去演好過整場英雄救美出嚟，搞到大王有勇冇謀咁，小說本身後來嘅權謀幾精彩，懷恩逼宮都好緊張，而家不倫不類咁。
花旗太太生活在花旗國，留意時差，你問我未必即時答到。
發表於 
唔知劇組係咪想就咁代表左懷恩黑化。
返回列表
