興趣嗜好 今日: 3 | 主題: 124523

積分: 2724

421^#

發表於 18-1-20 10:26 |只看該作者

如果我去學法, 最想最想學嘅就係可以擁有看穿前世今生嘅能力.

其實任何法科我都好有興趣, 例如捉鬼驅邪算命占卜六壬神功紫微斗數等等..... 不過又覺得呢啲對我嚟講會較為吃力, 怕自己嘅功力未到家, 話晒人哋搵得你, 都係想你指點迷津或化解劫難嘛, 萬一因為自己功夫未到家而搞到人家唔湯唔水就大鑊, 即係信你又唔準, 唔信你即係幫唔到人, 結果就搞到一鑊粥.

仲有一點就係, 好多時有人被邪靈入侵, 皆因種種因果而致, 陣間你唔知頭唔知路走去做架兩, 無形中就間接破壞咗人家嘅好事, 到時容乜易嚟搵我尋仇㗎, 一心想幫人卻自找麻煩, 盞搞!

相反如能看穿人家嘅前世今生, 藉着透視前生嘅情景, 幫人解決呢生為何對某樣事感到莫名恐懼或疑惑, 從而瞭解前因後果而使之釋懷放開, 都係一種修為.

況且整個過程只牽涉當事人, 純以自己角度去看自己前生, 完全冇任何干預成份, 亦唔存在準與唔準, 最壞打算都係乜都睇唔到啫, 反正如果我有咁嘅能力, 都係以義務性質幫助人, 冇諗過用以賺取金錢, 所以就算一無所得, 亦都唔會有損失.

曾經去過一個關於前世催眠嘅講座, 課堂上其中一節係老師帶領我哋去睇前世.
當時全場好寧靜, 幾近鴉雀無聲, 加上老師如夢似幻嘅聲線, 照計如果係有靈力, 應該好快就可以進入被催眠狀態.

可惜恁地我已經好努力地想保持心無雜念, 卻未能如願, 當要想像進入森林, 跟住越過山越過海去看前世, 我卻滿腦子都係陣間要食啲乜嘅畫面..... 結果梗係乜都見唔到啦.

唉, 成日掛住食食食, 真係前世!

雖然我唔成功, 但卻有幾位同學話見到某啲景象, 至於係乜嘢景象, 我都好好奇想知. 可惜老師叫呢啲同學留下再詳談, 其餘一干人等就要離開, 所以冇得讓我八卦一下.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

422^#

發表於 18-1-25 11:40 |只看該作者

本帖最後由 cforchat 於 18-1-25 11:44 編輯

喺街上準備等過馬路, 見到路邊停泊咗一架私家車, 有幾個路人仲喺車身後舉起手機拍照.

只係一架普通私家車啫, 有乜咁特別, 致使過路人將之作為背景影相呢?

於是八卦地走到車後一探究竟......

原來特別之處, 只因車牌夠特別, 簡簡單單PK兩個字母.

通常噏得PK, 大多都係取其諧音, 費事講正字正音咁粗俗啦, 估唔到車主會將其作為車牌號, 都幾別出心裁.

難怪啲路人影完相之後, 聽到佢哋話一定要post上群組呃like啦.

見到呢個車牌, 我腦中第一個念頭就係假如遇着警察載查呢架車, 當佢call上台嘅情形......

A : over! over! 唔該幫我查吓個車牌PK.......

B : 你做乜話我PK呀?

A : 唔係呀, 係車牌PK.....

B : 仲話唔係話我?

A : 真係唔係呀.....

B : 咁無啦啦做乜嗌我PK先?

A : 係個車牌號碼叫PK呀大佬! (吹鬚碌眼中....)

哈, 以上只係我想像緊電視台趣劇節目嘅情節, 現實當中應該唔會出現呢啲對話, 萬一如有雷同, 實屬搞笑.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

423^#

發表於 18-1-26 17:38 |只看該作者

尋晚對住鏡刷刷吓牙, 忽然聽到有物件跌下, 未嚟得切反應就眼前一黑, 然後呯嘭一聲, 跟住玻璃碎裂聲隨即響起.

未等我驚魂甫定, 當家已一支箭衝入嚟問咩事.

唔駛問, 一定係盞燈跌咗落嚟啦.

因為早兩日個燈罩先至跌咗一半, 卻又未跌得晒, 所以搞到半天吊, 當家見狀已即刻安返上去, 估唔到事隔兩日又來了.

我好自然就埋怨係當家馬虎, 未檢查清楚就求其安上了事, 簡直想草菅人命.

經佢一輪檢查後, 發現係夾住光管嘅配件熔化咗, 因而冇咗連接駁位, 令光管喺失去承托力而跌咗落嚟.

經過當家一番忙進忙出努力搶修後, 終於都回復光明.

當時雖然一額汗, 不過卻感到似有守護天使喺身邊.......

首先係遲唔遲早唔早, 等我入去唔夠兩分鐘先至發生, 而且仲係企定定刷牙, 而唔係行嚟行去或如廁中, 亦好彩只得我一人在內, 狗狗冇跟喺身邊.

其次係身處狹窄廁所, 燈位喺中間, 我企喺右邊, 正常情況下, 光管應該筆直跌下, 碎片四散飛濺, 我肯定會被砸中, 奇就奇在光管竟然跌落去左邊嘅浴缸內, 而剛巧又盛咗一盆水喺度, 光管於是不偏不倚跌咗落水中先至碎裂, 有水嘅阻力, 碎片就唔會飛濺. 假如當時浴缸門係閂住, 假如冇嗰盆水, 咁我真係好難倖免唔中頭獎.

當家解釋係反彈力先至彈咗去浴缸嗰邊, 但係燈罩半天吊喺左邊, 就算真係反彈力, 左邊已阻咗大半空間, 有乜理由仲可以越過燈罩嘅障礙而向左邊彈吖, 而且望勻現場環境, 橫睇豎睇都唔應該向左跌囉, 所以我深信一定係守護天使幫我化解, 免我受傷.

當家話咁佢都有守護天使幫喎, 因為佢後來至發現, 喺佢修弄光管期間, 居然全程唔記得熄燈掣, 我問佢唔熄有咩後果, 佢話萬一誤觸電線就會電瓜囉.

所以我哋就齊齊向住空氣感謝守護天使救命大恩.

多謝守護天使!

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

424^#

發表於 18-1-28 09:45 |只看該作者

今早起身, 發現朋友於凌晨傳來短訊 : 今日遇見他, 憶起從前舊事, 思潮起伏, 輾轉難眠.

朋友口中嘅他, 即係佢嘅前度, 間中聽佢提起呢位舊情人時, 總係淚眼漣漣....

朋友與前度嘅故事, 雖未至於可歌可泣蕩氣迴腸, 甚至仲幾老套添, 但作為旁聽者, 亦不免為佢哋感到無奈.

話說本來一對小情人, 讀書時已互生情愫, 此後形影不離, 有男方嘅地方, 必定見到女方身影, 二人甚至私訂終生, 男嘅非卿不娶, 女嘅非君不嫁.

可是好事每每多磨, 雙方父母完全唔接受, 女家嫌男方冇出色, 男家嫌女方唔係同鄉人.

基於雙方嘅關係不被祝福, 又基於年紀少冇話事能力, 結果小鴛鴦遭到拆散, 女嘅被送往外地升學, 男嘅被強行安排與同鄉相睇.

雖未能開花結果, 但大家依然心繫對方, 總係想方設法透過其他同學得知對方狀況, 直至男方被逼盲婚, 女方被家人日夜緊盯, 雙方才正式失去聯絡.

要不是男方愚孝, 要不是女方懦弱, 或者佢哋可衝破重重障礙而有情人終成眷屬, 可惜當時佢哋沒此勇氣, 心志亦唔夠堅定.

今日, 雙方各有家室, 有兒有女, 姑勿論生活是否如魚得水, 至少大家都無意破壞多年經營嘅一切, 所以就算對對方依然有情, 亦只能默默藏於心深處, 留待夜闌人靜時才偶然回味.

唉, 每次聽到呢啲故事, 我不期然就會諗起發哥嗰首"舊情人"其中兩句歌詞 :

舊情人是個做到最好偏錯失的結局.....

舊情人是個在腦海中飄過的感嘆號.....

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 4387

425^#

發表於 18-1-29 15:44 |只看該作者

回覆樓主：

本帖最後由 yuenmeimei 於 18-1-29 15:47 編輯

你好嗎
保暖
你的文筆好好

私人傳訊回覆引用

積分: 2724

426^#

發表於 18-1-30 13:46 |只看該作者

回覆 yuenmeimei 的帖子

我很好! 多謝你讚賞!

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

427^#

發表於 18-1-30 14:08 |只看該作者

唔知係唔係一早已預咗會好凍好凍呢, 到真正凍天來臨時, 似乎又冇想像中咁凍喎.

不過唔理咁多, 電氈暖爐統統喺倉底摷出來禦寒, 話晒年紀大唔凍得㗎嘛.

唔只我, 連狗狗落街方便, 都同佢披返件衫仔, 可能對佢嚟講披唔披分別唔大, 因為衫仔薄薄, 可能冇料到, 不過起碼心理上覺得為佢做咗啲嘢, 好過冇嘛.

每逢大冷天, 我就恨不得全家進入冬眠狀態, 佢哋唔駛食, 我就唔駛煮, 因為啲水喉水刺骨般凍.

本來可以用熱水, 但係每當開熱水時, 總要浪費好多水先至有熱水出, 所以每次話要用熱水洗滌, 最後都不了了之, 無謂浪費食水.

曾經試過一次好冷好冷, 適逢假期唔駛返工, 我就全天候窩喺被竇內, 除咗三餐與去洗手間才會離一離床之外, 幾乎足不踏地, 以為可以保暖, 但卻覺得好似仲凍.

所以而家好少可會再咁窩囊, 寧願郁動吓, 反而更暖身.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

428^#

發表於 18-1-31 11:27 |只看該作者

朋友最近與情人鬧意見, 聽講正醞釀緊分手.

話晒我都係見證佢哋結合嘅其中一員, 忽聞分手, 梗係嗱嗱臨向當事人求證啦.

朋友話分手一說未免過於嚴重, 不過兩口子正處於冷戰中就確有其事.

平時見佢哋都係糖黐豆你濃情我厚意㗎, 咩事無端端變咗冤家呢?

聽完事主一番自辯後, 我都唔知好嬲定好笑.

原來最近有人唔知食咗咩藥, 唔只苛索無度, 仲持久力特別強, 搞到另一方吃不消, 因而每次被邀共赴巫山時都諸多藉口推卻, 一時姨媽到一時工作攰一時好困倦, 搞到對方多次未能如願翻雲覆雨, 因而拂袖而去.

哈, 呢個朋友口中困惱嘅理由, 如果畀呢方面未能滿足嘅人聽到, 係咪會揍佢一頓以懲佢居然暴殄天物呢?

我叫佢小心行雷閃電嘅日子, 以免因為曲線曬命而天怒人怨, 佢猛咁喊冤枉, 話真係頂唔順, 而唔係曬緊命喎.

點都好啦, 總之唔想激起民憤, 以後就唔好再講呢啲.

而家佢已經唔敢再提, 當有口痕友問佢嘅感情生活, 佢只草草答不過不失, 但從佢表情得知, 應該仲存在住之前嘅問題.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

椰子油

積分: 2206

429^#

發表於 18-2-3 16:46 |只看該作者

回覆樓主

偶然會入黎睇下，十卜

私人傳訊回覆引用

積分: 2724

430^#

發表於 18-2-4 09:42 |只看該作者

回覆椰子油的帖子

多謝支持!

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

431^#

發表於 18-2-4 10:42 |只看該作者

跟網上示範整咗個香蕉班㦸作為早餐, 材料份量依足晒, 人哋就整得好靚好完整, 但我嘅卻煎到一嚿嚿, 外型似足麥記嘅早餐炒蛋, 完全成唔到型, 所以極其量只可以叫炒班㦸, 與正式嘅班㦸半點也沾不上關係.

唉, 唔明點解樣樣跟到足都竟然會搞成咁, 唔通真係要次次自創先至能有意外驚喜?

雖然唔成功, 但既然整咗咯, 都要食㗎嘛, 唔通掉咗咁嘥咩.

對於我諸多唔成功嘅例子, 當家實在經歷得太多太多, 所以已經習以為常, 更難啃嘅都照單全收.

但係對於入世未深兼嘴刁嘅吾兒就唔係咁講嘞, 唔只對賣相有要求, 而且味道最好能與食肆媲美.

不過經過我多年來洗腦式灌輸咗佢老媽我只係一個普通主婦, 能煮出幾味食唔死嘅餸菜, 已經算佢哋大命, 唔好期望珍饈百味會出自我手, 求其裹到腹餬到口就應該好感恩了, 再加上不時地證明差勁嘅廚藝, 因此久而久之, 佢亦都慢慢接受咗呢個咁殘酷嘅事實.

當吾兒被喚醒起身吃早餐, 本來仲係睡眼惺未瞓醒, 甫坐下餐桌前, 見到眼前嘅炒班㦸, 即時精神為之一振當堂醒晒, 與嗰碟食物對望咗好耐, 見佢表情甚發愁, 我急不及待上前打圓場 : 嘻嘻, 係就係樣衰啲, 不過味道唔差㗎, 快啲試吓啦......

基於久經訓練見慣場面, 聽我講完後, 佢就手起叉落, 除除將食物放入口. 睇佢嘅表情, 證明我所言非虛, 不過礙於賣相不堪入目, 所以佢全程閤埋眼只嘴郁郁.

哈, 如果睇住嚟食, 又確係幾倒胃口嘅, 閉起眼睛, 起碼有無限想像空間, 就可令味道與賣相掛勾.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

432^#

發表於 18-2-6 13:55 |只看該作者

朋友呢幾日分別到幾間銀行撲新銀紙, 準備用嚟派利是, 但唔知係已一早被人換晒吖, 定係今年所印嘅新銀紙唔多, 居然冇得換喎, 搞到佢要到處問人有冇門路.

每年臨近過年, 銀行特別多人, 除咗基本嘅銀行服務, 最多人就係排隊換新鈔.

作為一位環保先鋒, 呢啲一定唔會有我份, 一向認為內容緊要過包裝, 雖然有人會口口聲聲話利是嘅嘢, 純粹討個意頭而已, 但係如果可以嘅話, 邊個唔想意頭得嚟份量都有番咁上下吖, 只要夠份量, 新鈔與舊鈔根本冇分別.

至於利是封, 好多人年年一定要買新, 而且會揀啲標奇立異別具一格, 希望收到嘅人能留下深印象.

我都收過好多好得意嘅利是封, 不過唔會特別留意有乜特色, 因為我市儈, 只關心內裡嘅數目, 多嘅就會對派者心存感激佢出手闊綽, 如只係一般市價, 就覺得冇驚喜..... 拆晒所有利是後, 錢就袋入銀包, 如利是封完整無缺, 就會收起留待翌年用嚟封利是. 全個拆利是過程, 都冇乜留意利是封嘅款式, 完全浪費咗派者嘅一番用心.

或者就係自己唔會在意利是封嘅設計是否精美, 所以自己派利是亦唔會講究, 對我嚟講, 呢啲所謂傳統習俗, 根本就多餘, 你派畀我時我又要派畀你, 我係非常唔樂意囉, 但礙於人在江湖, 幾唔鍾意都要隨俗, 所以我只有求其從俗就算, 換新鈔買新利是封呢啲行為, 唔會發生喺我身上.

由於有啲人會買當年生肖嘅利是封, 由於我會收起待用, 所以年年會出現利是封嘅生肖與當年不相符, 即係明明今年係狗年, 我卻有可能會用龍呀蛇呀豬呀呢啲以前嘅生肖利是封囉. 哈, 怪就係怪咗啲, 不過無所謂啦, 最緊要利是錢嘛,至於利是封, 話唔定人家拆完就扔掉, 根本唔會留意.

講真, 其實每當我收到生肖利是封都頭痕㗎, 其他設計可以全年通用, 印有當年生肖嗰啲, 冇可能保存至十一年後輪到呢個生肖先再用㗎嘛.

至於印上姓氏嘅利是封, 比起生肖更加唔環保, 因為異姓嘅話, 即係用唔着, 冇理由我姓陳, 卻派姓李嘅利是封㗎嘛, 所以收到姓氏, 就算覺得浪費都要扔.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

433^#

發表於 18-2-10 10:50 |只看該作者

呢幾日股市跌得好甘, 相信好多喺近期高追搏抄即日鮮嘅股民, 除非止蝕離場, 否則睇怕都動彈不得, 一個二個要企定定, 等個市喘定向上時才可鬆綁.

早兩日, 與一位親戚茶聚, 席間見佢不斷按手機留意股市動向, 一問之下先知道原來佢剛剛入咗貨, 所以要密切跟進股價升跌.

佢所買嘅股票, 從字面睇根本唔知間公司做乜, 問親戚, 佢一樣一無所知. 咁點解無啦啦買呢隻股票呢, 原來又係聽人講, 只要人哋同佢講買咗邊隻賺咗錢, 佢就唔理三七廿一死跟, 諗住冇死.

可是佢每次買入嘅時候, 係人哋已經賺夠放咗嘅時候, 佢跟住買入, 好彩嘅話, 隻股仲有上升水位, 咪可以執些少囉, 唔好彩嘅, 呢頭買入嗰頭就跌, 佢就被逼要坐艇. 而好多時聽佢講, 都係唔好彩居多, 所以直到目前為止, 大大話話已經壓住六位數字銀碼嘅貨在水中央載浮載沉, 唔知幾時先望見家鄉.

而呢六位數, 幾乎係佢退休金嘅全部, 有時都唔明佢點解可以瞓晒身, 完全冇諗過萬一跌嘅話, 蝕放就冇咗一筆, 唔放嘅話生活有可能陷入拮据.

講起兩日前買嗰隻股, 佢好彩, 買入冇耐就升咗幾個價位, 帳面上賺咗幾千, 以為佢會放, 點知佢話呢隻曾經帶挈過佢贏幾萬, 幾千根本睇唔上眼, 所以堅持要等至少賺過萬先至肯放.

如果佢真金白銀買, 又唔等錢使, 佢有咁嘅諗法都無可厚非, 問題係當日佢係以先買貨後找數嘅方法買股, 即係假如唔放, 兩三日後就要付款, 而佢已經冇晒流動資金, 到時就要動用另一半嘅老本.

雖然唔關我事, 但都戥佢着緊, 曾經不下數次勸佢, 如果個市係升緊嘅, 佢望高放嘅心態完全冇錯, 但而家係喺風高浪急嘅時刻, 應該見好就收. 一來唔駛挪用老本, 二來跌市時仲可以即買即賺, 雖然唔多, 但已經好過蝕錢嗰班人.

可惜佢都係唔聽, 就算後來又再升多幾個價位, 帳面已經賺過萬, 佢仍然堅持要再多啲, 幫補吓手續費咁話喎.

結果幾日下來愈跌愈有, 唔只冇得賺, 仲要倒蝕, 佢老伴寧願拎老本畀佢找數, 都唔畀佢蝕放.

唉, 明明投機, 最後被逼變成投資, 皆因貪之故.

而家佢總係唉聲嘆氣, 唔係因為做咗大閘蟹, 而係因為手痕卻冇錢入貨. 估唔到佢咁大心癮, 希望唔好借錢買股做傻事就好嘞.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

434^#

發表於 18-2-14 12:35 |只看該作者

一連凍咗十幾廿日, 終於都稍為回暖少少, 暫時告別瑟縮身子嘅日子.

寒冷天最難捱就係每朝起身嘅時候, 要離開瞓咗成晚暖烘烘嘅被竇, 簡直係折磨.

其次就係沖涼時間, 要除下暖笠笠嘅衣服, 再跳入浴缸內, 雖然好快有熱水淋身, 但係喺身體一時間脫到一絲不掛, 仲要開住抽氣扇嘅當下, 一樣凍到騰騰震.

最覺得罪疚, 就係平時慳慳埋埋嘅水, 一次過喺沖涼時用盡, 而且仲要用突添. 無法啦, 因為實在太凍太凍, 加上用熱水沖身實在太爽太爽, 於是喺不斷淋淋淋嘅情況下, 一直都唔願關水龍頭, 結果唔覺唔覺就沖咗好耐, 最後要喺不情願下先至捨得離開浴缸, 我諗今期嘅水費電費應該幾和味.

如果極端地要我喺夏季與冬季作出選擇生活嘅地方, 我一定揀夏季, 雖然熱起上嚟每每汗流浹背, 但起碼仲有動力去郁動吓手腳或外出活動一下. 反之冬天, 根本已經凍到邊度都唔想去, 又何來仲有動力去做其他事呢.

所以如果可以嘅話, 我都想好似蛇可以冬眠, 喺冬天做隻死蛇爛鱔乜都唔駛做, 等天氣和暖至再出嚟舒展筋骨.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

435^#

發表於 18-2-20 10:44 |只看該作者

去親戚屋企拜年, 本來諗住拜完年就鬆人, 點知人家誠意拳拳係都要留我哋喺度吃飯, 見一場嚟到又好耐都冇飯聚, 如再三推搪就卻之不恭, 只好應承.

其實最初推卻嘅原因, 係唔想老人家忙碌一場, 因為根據過往, 對方一定自己落手落腳, 唔肯讓人幫忙, 所以唔食只係唔想佢勞累而已.

老人家每逢初一十五都有拜神習慣, 更何況新年期間拜得更多, 除夕夜年初一年初二年初三日日都要拜, 又拜神又拜祖先, 忙到團團轉.

見佢忙進忙出, 唔只要張羅飯餸, 同時亦要趁飯餸煮好後, 第一時間擺喺祭壇供奉, 供奉位置遍佈門外廳中廚房, 甚至連睡房都唔放過.

見佢將餸菜放於床上, 然後點香拜祭口中唸唸有詞, 跟住仲要燒金銀, 小小居室即時烏煙瘴氣, 我哋亦被煙燻至猛咁流眼水, 亦被嗆至不斷咳嗽...... 而老人家居然面不改容, 毫無難受之色, 睇嚟一年到晚期間一直置身於此環境, 佢已被鍛煉成煙火不入之軀.

始終年事已高, 行動亦不太靈活, 最驚險係見佢竟然想爬喺椅上再踮高腳裝香畀祖先, 嚇到我哋即刻代勞, 並囑咐佢要小心, 難為佢仲洋洋自得地表示平時都係咁做, 叫我哋唔駛緊張.

見佢咁樣拜神法, 我真係唔敢睇, 好似將啲燒緊嘅香插喺床邊, 四周圍又雜物又報紙, 萬一唔小心燒著就大鑊. 另外又要擒高爬低, 萬一跌親就麻煩, 何況佢仲自己一個人住, 發生事故霎時間真係求助無門.

聽其他親戚講, 呢位老人家出咗名固執, 性格又孤僻, 只要佢一人覺得冇問題, 就算全世界都話佢唔啱, 佢都唔會改. 即係佢覺得咁樣拜神法係冇問題嘅話, 恁地我哋戥佢覺得牙煙, 佢一樣十年如一日照做如儀.

唉, 既然唔肯聽人勸, 唯有希望佢老人家平平安安健健康康長命百歲啦.

唔知係唔係啲飯餸被多次盛出再倒入, 加上又經過煙火香灰嘅洗禮, 飯後回到家, 我哋相繼肚瀉.

睇怕下次都唔會再留喺度食飯咯.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 4387

436^#

發表於 18-2-20 16:37 |只看該作者

回覆樓主:

大吉大利

私人傳訊回覆引用

積分: 4387

437^#

發表於 18-2-20 16:57 |只看該作者

回覆樓主:

看你寫的生活雖然平淡，覺得有一種親切感。

私人傳訊回覆引用

積分: 2724

438^#

發表於 18-2-22 10:29 |只看該作者

回覆 yuenmeimei 的帖子

萬事如意! 多謝留言!

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

積分: 2724

439^#

發表於 18-2-22 11:02 |只看該作者

唔知係咪天氣乾燥, 皮膚缺乏潤滑, 致令胸圍帶成鬼日跣落嚟, 如果唔理的話, 有時跣到落臂彎位咁滯, 非常之唔舒服.

由於實在太過不適, 所以有時就算喺一啲公眾場所, 都唔顧得儀態, 直頭伸隻手入衣服內將胸圍帶拉回原位.

基於衣服厚重, 動作幅度自然大, 所以好肯定咁嘅動作, 看在旁人眼中, 一定係非常非常猥瑣, 不過冇辦法, 舒服為大, 其他唔理得咁多.

其實都試過隔住衣服企圖將帶拉回正軌, 諗住就算人哋見到, 最多咪以為我喺度抓癢, 但係每次都拉到唔三唔四, 總未能令之歸位, 致使未幾之後又跣落去, 於是又要再嚟過. 因為咁樣, 成日被問及為何總是身痕, 我只好以笑遮羞答 : 嘻嘻, 係囉可!

因為感到煩不勝煩, 所以索性唔戴胸圍, 就唔駛成日被視身痕. 好在冬天衣服夠厚, 內裡真空都唔怕.

哈, 不過冇胸圍承托之下, 咪好容易墮lin?

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用