本帖最後由 oguh 於 12-10-7 19:11 編輯
第二次機會
最近，有位好朋友第二次結婚。我同Bruce出席婚宴，衷心為我地既朋友開心。
佢第一段婚姻，好似童話咁，當時仲係男朋友，高大靚仔有錢有事業，拍拖半年左右就同佢求婚，包左間餐廳，有現場音樂，有好多花，有大大粒鑽石，有人拍埋video，好夢幻咁，朋友沖昏頭腦立即應承。
之後個婚禮，我係姊妹團其中之一。係某酒店大排延席，仲有明星獻唱，新郎哥又自彈自唱，有睇頭又有派頭，無論新郎定新娘都威盡。幾日後即刻飛去意大利honey moon，朋友臨上機前仲text我問我，佢係咪發緊夢。當時我為佢高興，好開心佢可以有個夢幻婚禮，再有個超浪漫honey moon。
婚後，朋友既夢繼續，只係慢慢由一個美夢，變成一個惡夢。
老公開始原形畢露，成日都唔返屋企，佢唔知佢去左邊；對佢忽冷忽熱，好既時候好好，壞既時候，朋友經常半夜喊住打比我訴苦。慢慢發現老公原來好爛賭，成日去左賭錢唔返屋企。亦都因為賭錢，老公同佢屋企關係搞到好僵，朋友話佢老公同佢老爺奶奶，係佢地結婚後一直都無見過面、無講過野。
由於老公係專業人士，身份同地位既關係，佢地又要經常「扮恩愛」出席一D場合，每次都令朋友感到非常大壓力同埋好辛苦，前一秒仲拖住手笑晒口，下一秒即刻鬆開手黑佢面，獨處時仲會用粗口鬧佢。朋友嘗試去解決問題，努力挽救，佢辭左職，留係屋企學煮飯、學整野食，甚至想生個BB，睇下有無轉機。
但佢老公經常都唔返來，返到來就唔理佢。無論佢點努力，都係無補於事。後來有次鬧交，老公終於出手打佢，推左佢落樓梯，事後佢要去醫院，本來可以報警，但佢老公苦苦哀求，朋友心軟，話係意外，但佢要求離婚。當時，佢地結左婚只係3年。
離婚，本來朋友每月可得唔錯既膳養費，後來老公因為賭到窮途末路，竟然伸請破產，反過來要問朋友借錢還部份既債。感情上受盡創傷，離婚已經係一個好大既打擊，連金錢上都因為呢個男人，令佢身家少左一半有多。
但人生總係可以重頭來過，朋友係屋企人同我地一班關心佢既人支持下，佢好快重新開始，重投職場，努力做野幾年之後，開埋自己公司。
佢有左自己事業之後，因工作關係，認識左第二任老公。第二任老公，我第一次見面已經覺得佢係一個老實、善良既人，內在性格好似一個細路仔咁，工餘好鍾意玩模型。佢地一齊左幾年，幾年間朋友一直好小心觀察，雖然佢無第一任老公咁高大靚仔、咁有錢，但佢一直都真心對佢好，同埋佢一直都想結婚，但怕朋友有壓力，所以一直都無急切咁追問，而係用時間去慢慢等。
幾年後，佢地終於結婚。第二個婚禮，無豪華派對、無明星助慶、無誇張儀式，但出席既人都係最親、最好既家人朋友，大家都舒舒服服，見證左一場簡簡單單既婚禮。
每次出席朋友們既婚禮，我都好眼淺，好容易喊。今次見到佢地讀出誓詞時，由於知道朋友過去受過既苦，我忍唔住喊到抽筋咁濟，又要用力忍住唔出聲，好辛苦。Bruce一直係我身邊，不停遞紙巾，細細聲話：「再喊人地以為你去喪禮。」忍唔住手肘批佢一下。
其後，朋友upload左當日既相上Facebook，見到佢既笑容係百份百幸福既笑容，我知道佢以後都會一樣咁幸福，終於放心。好多人受到打擊時，以為一切都完喇，一個男人對自己唔好，就係成個世界都對自己唔好。其實勇敢面對將來，講起黎好老土，實行起來好困難，但面對將來、放低過去真係唯一既辦法，點解要比過去既事，影響自己整個人生？
當你以為世界末日時，其實你仲可以選擇，你可以選擇去追求自己既幸福，只要你有呢個信念，你就有呢個機會。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
