青青河邊草 發表於 21-3-5 18:56 
係，呢個三王子我寧願佢真係黑化想爭王權，都好過依家，無女人就好似天跌落嚟咁。
睇見王儇又係煩，佢真 ...
帝王業小說就係蕭綦同王儇兩公婆一步一步爬上去，帝王路從來都係殘忍冇情，於掃清阻力同時，點樣取捨人情，有時係無可奈何，三皇子係王儇嘅白月光，佢稱帝係蕭綦相逼，因為子隆死咗，子律作反（其實佢身體差，唔反都遲早死），馬靜跌傻咗，成個皇室馬家只剩佢一個，當時蕭綦未到時機稱帝，子澹係當時最自然最合理最適合嘅人選，佢完全冇任何奢望，亦有遲早一死嘅心，王儇已作人婦，佢雖然依然愛佢，但亦接受現實，所以佢值得有個好嘅結局（有胡瑤陪佢隱居），子澹嘅氣質應該係儒雅溫文，佢算係一個悲劇人物，而家劇裡面三皇子種種作為只令人覺得佢不自量力，完全覺得王儇冇同佢一齊係好彩。
王儇個角色唔知係咪章子怡要保持白蓮花形象而改成咁，書入面王儇係一步步成長，蕭綦最初成日感慨佢唔長大，唔肯面對皇權路上嘅無情。越係接近權力中心，越會見到好多黑暗面，有時心狠手辣係必需，唔係人不犯我，我不犯人，而係喺對方初顯野心時就要盡早斬草除根，王儇同王夙兩個意識到王倩對蕭綦起咗不軌之心，兩個即刻安排佢和親，只係王倩醒目，寧願放棄蕭綦換取留低。
而蕭綦亦冇對任何一個手下掉以輕心，因為佢太清楚權力嘅誘惑，喺利益面前，要把持野心好難，佢自己喺呢一方面做得好好，但唔代表其他人都可以唔被野心吞噬，劇入面蕭綦帶寧朔軍出戰，結果全軍覆沒，呢個唔應該出現，最後話佢被救，之後點樣救王儇再回歸，根本自圓其說，中間太多僥倖，太多巧合，冇拿拿又要兩夫婦去多一次笏蘭，可能係橫豎都去開拍外景，索性拍多D用盡佢。
小說同劇唔同在，前者係帝王路上披荊斬棘，一步一步走上帝王台階，劇係幾個男人爭個女人，王位只係佢地因為想要得到個女人而必須具備嘅，兒戲過玩泥沙，明明本身小說個架構都已經幾好，要旁加枝葉可以將人物劇情寫多D，而唔係大反轉再反轉，然後自圓不到其說，搞到節奏時快時慢，悶場百出。
花旗太太生活在花旗國，留意時差，你問我未必即時答到。
發表於 
返回列表
