之後我關節痛又來又發燒，醫生又開消炎抗生素，仲叫我過兩日覆診，如果仲未退燒仲有關節痛就要入急症室，不過後來退左燒又冇痛以為冇事，點知食完藥過幾日又係咁，今次醫生幫我抽血驗。
本來約左睇報告前一日又發燒又關節痛，去睇醫生兼睇埋報告，醫生話我白血球指數高，身體某處發炎，仲問我有冇地中海貧血，其實我唔知不過以前捐過血，應該冇啩，仲話我接近貧血的邊緣，但排除了我患上類風濕關節炎。然後醫生專介我去風濕科，不過我睇開那個醫療機構冇風濕科，於是我在公司的醫療網絡搵風濕科醫生。
呢位風濕科醫生，一見到我個驗血報告及睇到我情況，神色好凝重咁同我講我唔係普通關節痛及濕疹咁簡單，我話我知道唔係類風濕關節炎已經冇咁擔心，佢話類風濕關節炎係小病，不過佢呢一刻唔敢講係咩病，話費事嚇親我，我心諗唔係呀嘛，咁我咪好嚴重？嗰下真係俾佢嚇到，然後佢叫我去化驗所驗血驗尿。我去化驗所的路上，忍不住哭了，到底我患了什麼病呀？到底呢啲病情反覆的日子仲要維持幾耐？我唔敢同媽媽講，因為佢自我久病未癒以來已經擔心得不得了，我打了給我朋友，一講係咁喊，佢還安慰我一定冇事，同佢傾左一陣，心情也好些。
過左幾日報告出左，那位風濕科醫生話初步懷疑我係紅斑狼瘡，但因為我食緊皮膚科醫生開的類固醇，所有嘢㩒低晒睇唔清楚，叫我停左類固醇等啲藥散晒再去驗，又係驗好多嘢，不過第一份報告佢冇詳細解釋代表啲乜，淨係開左止痛藥及叫我食omega3魚油丸，話佢呢度都有得買，其實我屋企都有幾樽，所以冇買
後來再去化驗所，話我張醫療咭有兩個test唔包，要另外俾錢，其中一個驗蠶豆症，講真，有冇蠶豆症自己一早知啦，咁都要驗？
到第二份報告出左，個姑娘打俾我話大概知我咩病但冇講詳情，話醫生要我去照pet scan，仲話幫我向保險公司申請，嗰日係星期五，個姑娘話如果我呢兩日有發燒就要去急症室，聽到呢度我覺得好奇怪，我到底有咩病，點解又要照pet scan，我上網查什麼是pet scan，原來係照全身邊度有cancer，那個周末好難過，我諗緊自己係咪淋巴癌，點解會咁？我自己係咪做錯啲乜食錯啲乜，有時諗諗下會喊，但我都係冇話俾媽媽知我發生咩事，仲氹佢只係關節問題。
捱到星期一我一早打去醫務所約下午見醫生睇報告，今次個醫生話我唔係紅斑狼瘡，而係患上罕有病Adult still disease，我問呢個係咩病，有咩病徵同埋最後會點，佢淨係話啲白血球會癲晒會食晒啲白血球，我覺得佢好唔專業，嗰個pet scan仲要差不多兩萬元，因為暫時冇一個測試係可以驗有冇adult still disease ，所以要用排除法，要否定我有cancer或其他病，我其實已經唔係好信佢講嘅嘢，一時話我紅斑狼瘡，一時又話罕有病，講嘢又只係嚇人，用詞又唔專業。所以當時我已經冇諗住再聽佢講去照pet scan, 佢開左25mg & 5mg類固醇俾我, 不過嗰晚我冇食，我覺得去睇多個醫生比較好。我上網查過好人好姐冇事去照pet scan反而會增加患cancer既風險。嗰下我真係覺得個醫生真係危言聳聽。（待續）
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
