本帖最後由 oguh 於 12-9-1 17:06 編輯
乞兒肚
做得兩夫妻，就預左要互相包容，即使對方有問題，都要接受。所以多年來，注重飲食的我，都一直接受Bruce鍾意食垃圾呢個事實。
依家佢既頭號食堂係麥XX，最鍾意食XX雞，自己食晒一盒，一粒都唔比我，一定要配芥末醬，試過無芥末醬佢就發癲，寧願外賣拿走D雞回家食，因為屋企一定長期有支H字頭既芥末，係佢人生第二最愛（第一係車，第二係H字頭芥末，第三係狗，第四先到我！）佢試過一路食，一路拿住支芥末唱U2首歌 “with or without you...i can’t live with or without you...” 對住支芥末唱情歌，正宗癲佬。食完成盒XX雞，仲會好滿足咁自言自語：「簡直係人間美食。」我真係頂佢唔順。
為左食垃圾，佢甘願忍受佢最討厭既排隊，擠係人群中間，默默等待。有時繁忙時間，麥XX員工忙中出錯，例如比錯左野食佢，佢就會頻臨瘋癲邊緣，死忍爛忍，到佢拿左食物之後，就口黑面黑同我講，又話人地蠢又鬧爆佢地D效率，話自己當年細個做侍應從未試過落錯單，否則會被老闆掌摑。我當然唔信佢無出錯過，你咁不滿你咪唔好幫襯，但佢次次都係死死氣咁，排隊，等，order，再等，黑面，拿左野食走人，一路行一路咒罵以後唔再幫襯，轉下頭咪又係再去。
另一種食物佢不能live without係baked beans。曾經佢都係最愛B字頭，食左好多年，但係香港難買，只係間中係某D賣外國貨超市出現，唔係成日有貨，所以佢死死氣改食H字頭。我家長期有罐頭豆之餘，仲有罐頭英國午餐肉、沙甸魚同埋pickles。以為Bruce會正正常常煮熱食？佢只係打開個罐就咁直接凍冰冰食，仲要一路食一路自己話好味好味，比我話佢「乞兒肚」。外人唔知，以為佢終日都無餐好食，乞兒咁。但佢出去同客食飯，一餐飯都萬幾二萬面不改容，靚酒黑白松露樣樣有，不過佢呢個癲佬，竟然覺得最好食都係罐頭，唔係為左見客，佢根本唔會食果D野。而呢個係佢秘密，除左我知之外，都無咩人見佢咁食。
但Bruce忍唔到佢對垃圾喜好，會收埋一兩罐係佢office，有時得閒，會關上門，自己食晒一罐豆，加塊面包，咁佢就好滿足，最變態係，佢會影相比我睇，今日佢係公司「偷食」左D乜。
我講過無數次，佢咁易肚痾可能因為食得太多垃圾，但佢唔理。例如佢病既時候，都會照去麥XX食野，或者照食雪糕薯片，完全無戒口呢個觀念。算喇，我放棄說教，只要佢唔好強迫我一齊食垃圾就得喇。有時我自己食part-time傭人煮飯餸同湯，佢就自己食baked beans、薯片，同桌食飯，但完全各不相干。所以，我家從來都無「爭食」情況出現。不過，有時我想食佢一粒半粒XX雞，都會比佢話我搶佢D野食餓死佢！但佢飲我一啖汽水，就無左半杯！
而當年大家剛剛一齊無耐，Bruce完全對我既飲食習慣係無概念。我食得清淡，唔太食肉，唔鍾意「熱氣」野，我解釋「熱氣」至今佢都係唔明。亦都唔明中國人咩係「寒底」，點解食薑會「驅風」，佢問我，人體裡面點會有「風」？放屁都放晒出來啦！以佢食垃圾既資質，一世都唔會明。試過我患重感冒，佢買薯條炸魚比我食，算，我話我食唔落，咁佢改買雞湯。外國人病飲雞湯好普遍，但我一飲，即刻病上加病，發得更高燒，從此我都係依返中國傳統，病時唔食任何雞，以免太補反而出事。
多年來，經過我多次教育佢，Bruce終於白明，我病時，只能食清淡如白粥，但對於佢，白粥等如爛左既飯，佢見到就唔開胃，唔明我點解食得落，但佢都為我學點煮粥。同埋，多年後佢終於白明，我病時唔食得生果同雪糕，所以我一病，佢就唔會係我面前食雪糕，只會偷偷地食。因為我見佢食我又無得食，我就會怨佢引誘我。食，永遠係我地之間既分歧。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
好欣賞你c6 a"!!!
返回列表
