抵制美心呢個行動, 我會支持, 不過要等我將手上嘅餅咭全部用晒之後......
早於十幾廿年前, 美心與超群齊名, 各有捧場客, 而我就時常穿梭喺兩間餅店之間買所愛嘅西餅. 而因為餅咭較為划算, 所以就買入唔少餅咭, 以備隨時用嚟攞餅.
當時超群嘅拿破崙算係最出名, 我間中想吃時就會以餅咭換一打西餅, 主打當然係拿破崙啦, 不過又唔想只換一款咁單調, 所以會加兩三件其他款, 都係我鍾意食嘅.
至於持有美心餅咭, 一來係當年用嚟作為嫁女喜餅而大量入貨, 二來係因為分店比超群多, 幾乎各個地鐵站都有, 方便隨時隨地都可以取餅, 所以而家仲有美心餅咭嘅存貨.
記得當年超群宣佈結業時, 手上仲有幾張餅咭未用, 曾經好徬徨 (平時唔捨得用, 點知被一鑊翹起). 好在後來有食肆發起幫忙超群行動, 可以以餅咭作為現金券結賬, 先至唔覺得嘥. (但其實對我嚟講, 梗係想繼續換拿破崙啦, 因為平時根本唔會光顧嗰啲貴價食肆, 不過為勢所逼, 只好人出豉油我出雞, 好過眼白白睇住餅咭變廢紙)
大大話話, 都光顧咗美心好幾十年, 由當初認識佢嘅大小彩色花花餅盒, 到而家嘅白底深淺綠設計, 期間曾經換過好幾次, 但總係覺得新不如舊.
同樣, 西餅嘅款式亦每況愈下, 尤其係呢四五年間開始, 直頭覺得連普通餅店都不如.
以前每次取餅時, 款式之多, 簡直令我唔知揀邊款好, 因為款款都好精緻, 外相又吸引, 次次都要掙扎好耐先至決定要犧牲呢款而揀另外嗰款, 嗰陣時係有餅咭卻唔捨得用.
唔知由幾時開始, 發現曾經好多款嘅精緻西餅已經被升至特級位置, 即係唔再包含喺一打餅咭嘅價目內. 想換嘅話, 一張餅咭只能換得幾件, 而且仲要補錢, 咁我梗係唔制啦. 只能退而求其次, 換一打咩, 就要揀屬於一打嘅普通貨色, 呢個時候係有餅咭卻無所用.
好啦, 普通西餅實在太過輕飄飄細細件, 一打拎上手, 幾乎個紙盒仲重過西餅, 完全唔抵, 食咗都唔多覺. 於是我索性全部攞晒重量級, 例如紙包合桃蛋糕, 椰撻, 每樣半打. 比起西餅, 呢兩款算係叫做最抵又飽肚.
後來間中經過美心, 都會入內睇吓款式有冇更新, 時時會希冀唔知會唔會突然又有啲新款式, 可惜次次都失望.
就係因為來來去去都係嗰啲款, 所以就算依然有餅咭, 一直都束之高閣, 總係抱住一絲希望, 第時可能會有新款, 而家無謂浪費所剩無幾嘅餅咭.
當坊間發起抵制美心之後, 我就去倉底摷返啲餅咭出嚟, 就算只係攞紙包合桃蛋糕同椰撻都好, 務求快啲用晒去就同佢割蓆.
去到時又發現, 原本屬於一打數量內嘅椰撻已被升級, 頂!! 即係如要佢又要補錢.
哼! 我係唔會補錢㗎囉, 全部要晒紙包合桃蛋糕.
若然喺我未換晒所有餅咭之前, 連牛油蛋糕都升級, 咁我就連麵包都照殺, 總之就砌到啱啱好, 一毫子都唔會畀佢賺.
其實計起條數, 餅咭係永久通用, 愈遲兌對佢哋嚟講愈蝕. 因為以買入價比較, 起碼都升咗一倍有多, 即係假如當初係廿蚊一張, 而家已經值五十蚊, 十年之後, 可能變成七八十蚊.
問題係, 而家咁嘅形勢, 都唔知佢仲捱得幾耐, 為安全計, 都係盡快清倉, 費事變廢紙.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
