吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 興趣嗜好› 閒來無事說些事.....

興趣嗜好今日: 0|主題: 124508

收藏本版

回覆發帖

返回列表

跳至頁

樓主: cforchat

[其他] 閒來無事說些事.....

[複製鏈接]

35 363738 39...43

wing0

大宅

積分: 4872

721^#

發表於 21-3-21 22:08 |只看該作者

cforchat 發表於 21-3-12 10:32
回覆 wing0 的帖子

掉咗嘅係物件，當中嘅記憶，若然值得回味就放喺心上，並唔需要忘記。 ...

我發現有好多野唔捨得，睇書睇片，掉，要D時間影左相就掉。

我諗要決心D~!

私人傳訊回覆引用

Stephinebobo

大宅

積分: 2719

牛年勳章

722^#

發表於 21-3-22 17:13 |只看該作者

今日又乾返少少啦

私人傳訊回覆引用

iiivy

禁止訪問

積分: 4310

723^#

發表於 21-3-23 04:59 |只看該作者

提示: 作者被禁止或刪除內容自動屏蔽

私人傳訊回覆引用

cforchat

大宅

積分: 2724

724^#

發表於 21-3-23 16:21 |只看該作者

男友人早兩年去東南亞公幹, 幾日裡都係同事負責揸車去每一個工作點, 佢覺得好爽, 所以一返到香港就立志要考車牌, 期待下次再出外, 就可以由自己揸車.

筆試順利合格, 喺等考路試期間, 撞啱疫情爆發, 佢拖到最後至去學車, 諗住學得嚟嗰頭就考得, 盡量縮短過程, 以免增加傳染風險.

自行上網搵教車師父, 可惜心儀嗰啲已被預約, 退而求其次嗰啲呢, 又講到明時間非常緊絀, 一星期最多只能教一堂.

咁就弊嘞, 佢嘅如意算盤係想一星期起碼學三至四或四至五堂, 咁一個月鬆啲就可以上試場, 如果一個禮拜只學得一堂, 咁咪要學成三個月? 點速戰速決呀?

佢四出問朋友有冇相熟師父介紹, 希望熟人易話為, 終於搵到喺車房工作嘅朋友, 輾轉下介紹咗個教車師父畀佢. 經過交談, 得知呢位師父可以相就時間, 一星期教二三堂都冇問題, 啱晒佢心意, 即刻約定學車時間.

初學時, 覺得能夠發動車輛, 緊張之餘又好玩, 幾堂下來, 開始有啲意興闌珊, 原因係學極都唔識, 成日畀師父鬧, 搞到冇心機.

之前聽佢講時, 我都會鼓勵一番, 不過去到後期, 我都冇咁好氣, 一來覺得可能係資質問題, 二來佢與師父嘅關係根本就係惡性循環, 愈鬧愈緊張, 愈緊張愈唔識, 愈唔識愈鬧..... 我同佢講不如換過師父啦, 可能呢個同佢唔夾, 第二個或者會好啲.

當佢猶豫不決時, 因應疫情全部駕駛考試暫停, 佢即刻鬆一口氣.

咁咪好囉, 到時重開, 肯定考期將會延後, 足夠時間搵過另一個師父.

而家已經回復正常, 問佢搵咗師父未, 佢話決定唔考.

吓!? 咁第時去公幹咪冇得自己揸車?

佢話呢段時間諗得好清楚, 對佢嚟講, 揸車只有兩種用途, 第一種係用嚟車震, 第二種係如果隔離坐住個女仔, 可以一隻手握軚盤, 另一隻手用嚟拖女仔隻手....... 哈, 滿腦子都係咸濕思想, 頂佢唔順.

言歸正傳, 雖則佢認為應該要有張車牌旁身, 不過一諗到叫車嗰種方便, 唔駛搵位泊車唔駛驚抄牌唔駛睇地圖, 拍吓籮柚就落車...... 佢又覺得有冇車牌都唔係咁緊要.

佢有佢嘅論點, 不過我始終覺得, 都行咗一大步咯, 點解唔繼續行埋佢呢, 再學多幾堂就可以考, 雖然唔一定合格, 但起碼都經歷過考試場面嘛, 而家半途而廢, 無論對已付出嘅金錢或時間都好可惜.

或者佢當初只係一時興起, 羨慕人哋揸住架車周圍去, 自己都想嘗箇中滋味, 所以急不及待坐言起行. 假如由排期到考試可以喺短期內一氣呵成, 佢而家可能已經係有牌人士, 可惜就算冇疫情都要排大半年有多, 仲未計萬一肥佬仲要再耐啲. 隔咁耐, 乜熱誠都冷卻晒啦.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

725^#

發表於 21-3-30 16:05 |只看該作者

唔養狗狗之後，我就轉養植物，既可打發時間，收成後又有得吃，而且睇住植物一天天出芽長高，總覺得充滿生氣，能為沉悶日子添一點色彩。

不過因為屋細，只能種喺室內，因而惹嚟好多小飛飛。聽專家講，用辣椒加蒜頭灌溉可以導絕小飛飛，噴嘅時候我被濃烈氣味嗆到咳嗽連連，我尚且咁大反應，斷估蚊螆小飛飛肯定絕跡啦，點知唔只冇消失，仲好似多咗，唔通佢哋有另類癖好鍾意食辣蒜，咁真係唔得佢哋死咯。既然冇佢哋符，唯有見一隻趕一隻，趕唔盡殺唔絕就由佢哋，反正佢哋大多數都係圍繞喺植物周邊，就當養另類生物。

同吾兒傾開，我話啲植物好得意，會向住有光嘅地方伸展，所以我要成日轉方向，吾兒問我點解要咁做，係咪撚緊佢哋？哈，梗係唔係，只係諗住等佢哋曬得均匀啲，唔駛向死一邊啫嘛。

當家自動請纓，每日負責淋水，既然佢肯做，冇話唔畀嘅，不過就叫佢負責淋早上，晚黑交畀我。

我吩咐佢要淋勻每一粒種子，佢口就哦哦哦，手就按噴壺三兩下完事，佢話噴得多驚植物會浸死。我話你每次飲水都唔只飲兩三啖啦，植物同樣要有充足水份㗎，但係條友依然唔聽，最多都係喺我嘅監察下噴多一下半下咁大把。

一段日子之後，我發覺啲植物生得好慢，當家話因為天氣凍嘅關係，又或者係種子本身有問題，所以難生長。唔係嘞，都係我自己一手一腳打理吧。

自從我接手之後，早晚都有充足水份，好快就有成果。收割時，當家喺旁邊講：咦！咁快生得咁高，即係唔關天氣凍同種子問題，咁點解之前生得咁慢嘅？

仲問？咪你嘅問題囉，噴得嗰兩三下吊命咁，想收成都幾難。

哈，咁都畀到位你入我，而家終於知咩叫自己找死。

哼！以笑遮羞，次次做嘢都係半日香，指望佢就死得。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

726^#

發表於 21-4-8 21:38 |只看該作者

最近硬係周身骨痛，尤其是手臂，伸直會痛，稍為拗後少少更痛，所以每次扣胸圍帶都甚吃力，遲啲痛到扣唔到，怕且要買啲前扣款式。

同朋友講起，佢話如果係佢，寧願唔戴好過，反正係微波族，戴與唔戴分別不大，可以慳返唔駛買。

哈，就係因為微波，更加需要戴，唔係點托起呀，唔戴嘅話我驚會變成墮lin娜喎。。。。。你。

大家一輪嘴喺度討論買咩牌子，由A開始評至Z，邊款材質舒服，邊款剪裁貼身⋯⋯ 一副專家口吻。

通常呢，品質與價錢係掛勾，愈靚愈貴，對我嚟講，內在嘅嘢又唔駛見人，理得有冇牌子吖，穿得舒服最緊要，當然價錢都要實惠啦，咁先至合我心意嘛。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

727^#

發表於 21-4-13 15:02 |只看該作者

每逢有藝人離世，之前同佢係好朋友嘅人，如果唔及時出嚟哀悼，就會被滋事份子批判，質疑冇心肝，根本唔係朋友云云。。。。。

例如曾經與吳孟達關係匪淺嘅周星馳，例如與廖啟智素有往來嘅周潤發。

我覺得，真正悼念故人，並唔係片言隻語就可表達心中哀痛，亦正正係非泛泛之交，先至唔想喺呢個時候衝出嚟搶光環。兩位周先生，原本就係低調之人，除非咁啱被傳媒碰個正着，才會講幾句感想，不然嘅話，佢哋根本好少主動蒲頭，亦好少喺社交平台發言。如果平時唔聲唔聲，忽然第一時間衝出嚟寫段水蛇春咁長嚟悼文，我反而覺得有啲惺惺作態。難得由始至終不發一言，貫徹佢哋處事作風。

交情有幾深，好多時都係在心中，尤其是男人，一切盡在不言中。好朋友離去，心中痛楚唔需要流露，不知就裡被批冷血，實在寃枉。就係因為關係密切至有所顧慮，試問以佢哋嘅知名度，一旦出現肯定引來哄動，避免喧賓奪主而影響當事人及其家人，寧受千夫所指保持緘默，係對病者或逝者及其家屬最貼心做法。

對於嗰啲鍾意站在道德高地嘅人，動不動訓斥指責，我覺得非常十分絕對乞人憎，當事人都未出聲，唔明關佢哋咩事。如果同樣事情發生喺佢哋身上，唔知佢哋會自我綁架道德吖？抑或係搵藉口開脫呢？

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

728^#

發表於 21-4-20 22:03 |只看該作者

自從安心出行實施後，朋友已經好少出街食飯，問佢原因，佢話唔想嘟，有時真係局住嘅話，就選擇寫（假）資料。

好嘞，而家唔畀寫紙，咁點呢？一時之間都諗唔到有咩辦法。

其實嘟一嘟有乜問題？原來係唔想行蹤被監察，私隱被掌控。

唓，係咁咋嘛？？？

我同佢講：你一直都係用緊國內生產嘅手提電話，假如真係被監察，人哋晨早有晒你啲資料啦，可能大大日日都聽到你講嘢㖭呀，所以你平時言行要小心啲，無時無刻都要歌頌祖國，等阿爺龍顏大悅，到時氹得佢開心，話唔定將你加官進爵。

跟住之後，每逢同佢閒談起政治局勢國家大事，佢就雄辯滔滔，刻意提高聲線，並用唔太正宗兼夾硬要捲脷嘅普通話：就是嘛，你看我們的主席多麽的體察民情，就算這麽忙依然微服出巡上山下鄉向同志們問好，實在值得鼓掌。。。。。（跟住電話筒傳來拍手聲）

果然識時務呀吓，不過演技駛唔駛咁浮誇呀？奧D卡最欠揍大獎非佢莫屬。

可惜我完全唔知佢講乜，要佢用廣東話翻譯之後先知內容。

我話咁就死得啦，你亂咁嚟嘅腔調，干擾咗大大清淨嘅耳根，萬一將你扣上製造噪音之罪名，你洗定八月十五坐花廳都得嘞。

佢即刻話要好好學習普通話，仲要京腔嗰種，等阿爺聽得有親切感。

好咯，咁以後無論去到邊，總有阿爺在身邊，做咗竊聽風雲之大人常在線嘅主角。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

729^#

發表於 21-4-26 17:09 |只看該作者

睇鄭丹瑞主持一個訪問節目，通常我會選擇嘉賓嚟睇，其中一對係廖啟智陳敏兒夫婦。

我唔知實際訪問日期係幾時，從佢哋仲好後生容顏判斷，應該都有好幾年前。

全程訪問中，大部份都係陳敏兒侃侃而談，廖啟智貫徹佢一向低調內斂嘅性格，默默坐喺太太身邊微笑，偶然才回應一兩句。

每當廖啟智發言時，陳敏兒總以一種包含咗溫柔欣賞愛惜嘅目光注視丈夫，令我覺得佢哋真係好恩愛。（回望自己，我好似好耐好耐都未用過咁嘅眼神望住當家，每次唔係眼中噴火想殺人，就係鄙視嘅眼光暗示佢又做錯事，um...... 睇嚟彼此有必要反省一下，只要佢醒目啲，我自然會溫柔啲。)

最後，主持人問兩位有冇說話同已逝世嘅小兒子講，廖啟智就話：你就happy啦(喺天堂)!....... 我將來都會好似你咁happy! (唉，我諗佢自己都想唔到呢個將來咁快就到！）

當二人講如果去到生命盡頭，邊個想走先，廖啟智話如果有得㨂佢想走先........ （如願以償!)

雖然陳敏兒原意都係想走先，不過佢都補充，生命終結冇得由自己話事，邊個走先都好，剩下嗰位被揀選留低，即係證明佢有能力處理後事。

我都覺得假如女方走先，以男方如此愛妻情深，一定受唔住打擊，從二人對待小兒子離世嘅應對可見一斑。多年過去，父親雖然仍笑笑口，但不難察覺仍語帶哽咽流露不捨之情。只係短短五年父子情尚且難放低，更何況幾十年夫妻感情，若然真係女方走先，恐怕佢會殉情都有之。相反，女方則一直表現出豁達硬淨，一切睇得好開，含笑從容地娓娓道來，猶如講緊人哋嘅故事。加上仲有兩個兒子呵護，(或者係同性相斥，總覺得母子關係會好過父子關係)，所以由佢墊後會較為合適。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

730^#

發表於 21-4-29 12:03 |只看該作者

自從唔用豆漿機，此後如想飲豆漿，就會用攪拌機磨碎啲豆，隔渣過瀘後再煲滾嚟飲。

尋日如常做晒前期工序，跟住開始煲。

平時會用不銹鋼煲，不過早上用咗康寧煲煮咗麥皮，除咗因為懶唔想另外洗，亦因為可環保唔駛額外用水，於是就用佢嚟煮豆槳，反正都係自家人飲，就算夾雜咗少許麥皮留下嘅碎屑都冇乜所謂。

康寧煲嘅保溫能力好強，就算熄咗火，依然透過玻璃煲身見到食物仲繼續冒泡滾緊。好處係可以慳燃氣費，壞處係容易黐底。因為如果再揭開蓋攪一攪，或者可以避免黐底，但係咁就洩咗啲熱力，即係冇得由佢繼續滾，結果為咗慳火，搞到成日燶底，尤其是煮一啲較為杰身例如粥類或炆類，燶得更嚴重，往往事後要洗餐死。

講返煲豆漿，我一路不斷攪，驚過瀘唔晒嘅豆渣碎會黐底，一路就打醒十二分精神注視，一有準備滾起跡象就立即熄火，以防滾瀉。（好多年前試過用電飯煲煮，點知冇睇住搞到滾瀉晒出嚟，成個電飯煲浸晒，手忙腳亂清潔一番後，結果無補於事，電飯煲都係要打柴。）

當時景象仲歷歷在目，為咗唔想又忙活一場，我全程望到實一實。

手不斷攪，腦就喺度轉：如果係拍戲劇情，通常呢個時候一定有啲事發生，例如突然有電話打嚟，搞到主角掛住講電話而唔記得煲緊嘢；又例如唔小心碰跌物件灑滿一地，搞到主角掛住執嘢而唔記得煲緊嘢。。。。。鏡頭一轉，滾瀉晒。

我同自己講，正值緊要關頭，無論邊個來電或碰跌乜嘢，我一於唔理咁多，睇住煲豆漿先至最緊要。

好嘞，再揭開蓋攪幾攪就差唔多熄火，當真正滾起時都已經熄咗火，咁就唔怕佢會滾出嚟啦。

當我準備冚上煲蓋，見到啲豆漿好似火山爆發嘅熔岩咁迅速滾起，我除咗驚呼一聲：唔好呀！！！完全束手無策，腦中一片空白，一碌木企喺度，眼白白睇住溢出嘅乳白色液體一發不可收拾向四周圍流淌。

當一切靜止後，我不禁笑咗出嚟，呢啲係咪叫做人算不如天算呢？

由於我冇諗過會發生，由於康寧煲非常灼熱，所以從未準備隔熱手套，我相信如果我及時攞起，應該未至於會搞到滿目瘡痍嘅場面。又如果我當時即刻將蓋冚上，係咪會稍稍阻截瀉出嘅份量呢。

所有爐具配件濕晒，附近位置全係豆漿，足足清潔咗半個鐘，洗到我隻屐好閒，最唔抵就係飲少咗一大杯吖嘛。

切記，當豆漿遇上康寧煲，會令人手足無措，下次都係用不銹鋼較穩陣。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

731^#

發表於 21-5-4 17:23 |只看該作者

以前一入到圖書館，首先就去小說區，專攻愛情小說。

當少女情懷不再，對愛情已失去憧憬，唔再存任何幻想之後，就轉場睇寫實題材，冇再涉足愛情區域。

唔知係咪人大咗，睇書嘅心態亦有所改變，我而家唔鍾意睇百份百創作，覺得就算寫得幾好，始終都係老作，太過唔真實。

不過咁，如果係真人真事改編呢，都可以接受，話晒有事實根㯫，未至於全部都係流料。

所以如果見到有關歷史、人物傳記、作者日常記事等等嘅書籍我都好有興趣。

當中尤以記述一啲轟動嘅罪案，好似"重案組黃sir"同埋"危險人物"，每一系列都睇到津津有味。

而曾經有一段時期好鍾意睇鬼故，唔理真實定老作，一律唔放過，後來只睇真實嗰啲，作嘅已經唔再睇。

最近借咗兩本，分別係"阿公講鬼"一及二冊，作者係藍橘子，內容除咗講鬼之外，仲有好多靈界冷知識，作者偶然道出一兩句諷刺時弊嘅對白，睇完不禁會心微笑；而有啲對話亦風趣幽默，搞到我笑多過驚。

我唔知阿公講嘅鬼故到底係真定假，不過我就好鍾意阿公，所以下意識就當係真㗎嘞。

好羨慕豆姐有呢位咁疼錫佢又咁叻嘅阿公（如果係真嘅），我都想要呀！！！！唔敢奢望佢係我阿公，但求能夠認識一位咁有智慧道行又高嘅長者，於願足矣。（純粹想結識，並唔係為咗捉鬼，不過如果可以幫我捉走隻懶惰鬼又無妨！）

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

732^#

發表於 21-5-8 21:15 |只看該作者

本帖最後由 cforchat 於 21-5-8 21:40 編輯

變種病毒一出現，政府宣佈只要有一宗個案，全幢樓就要檢測兼隔離廿一日。

接二連三於日內就有幾幢樓宇出現以上情況，搞到人心惶惶，包括我。

要知道一幢樓內住咗起碼幾百人，甚至過千人，而呢千人又各自接觸好多好多人，就好似開枝散葉般，若然不幸中招真係話都冇咁易，正所謂一人遭殃千人陪檢，機會不可謂不大。

有見及此，我就準備寫一張明細表，萬一要入隔離營，跟住清單執拾細軟，唔駛到時手忙腳亂。

我根據上次裝修期間入住酒店嘅物件作為參考，不過今次要執嘅嘢多好多，因為之前喺酒店出入自如，隨時可以出外買所需物品，而家強制隔離，同坐監冇分別，與其叫人攞乜攞物，不如自己預備一切，咁就唔駛麻煩人，可以安安樂樂坐廿一日監。

所以我買定好多乾糧餅乾公仔麵，帶埋迷你電飯煲，以防膳食差份量少，可讓當家與吾兒充飢。

後來睇報導先知道原來每個營房只住一人，吓！？！？咁咪冇得照顧佢兩仔爺？

我同當家吾兒講呢個消息，佢哋理所當然話梗係一人一房啦，唔係點叫隔離呀，驚會交叉感染嘛。

似乎得我一個咁無知，以為一家人一定係住埋一齊，只係將屋企搬去隔離營，方便防疫檢測。

一人一倉，咪更加似坐監？仲要係水飯房？

當家與吾兒好似對於入營冇乜大煩惱，係我一個喺度杞人憂天，擔心佢哋食唔飽，憂心自己唔習慣。喺屋企一啲問題都冇，但陌生環境，仲得自己一個人，都唔知點渡過廿一日，到時出到嚟會唔會彷如隔世呢？

正當繼續惆悵要為可能會入營而作進一步籌謀之際，政府又改變政策，唔係中招者，只需定期檢測毋須隔離。

梗係啦，每次要移動一千幾百人，仲唔知要移動幾多次，邊有咁多人力物力應付吖，既辛苦工作人員，又惹來入營者抱怨準備不周，兩面不討好。

政府改嚟改去已屢見不鮮，不過今次改動未嘗唔係一件好事，至少可令我舒一口氣。。。。。暫時。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

733^#

發表於 21-5-17 14:33 |只看該作者

近排娛樂圈談論對象，唔係Mirror就係Error，偏偏我咩ror都唔識，認真唔入流。

好似好耐都冇出現過如此追捧熱潮，尤其是本地團體，能夠得到咁多粉絲擁護愛戴，我覺得疫情都有關係。

以前天下太平嗰陣時，每當有受歡迎劇集，例如韓劇日劇，又或者純以唱歌為主嘅團隊，每次嚟香港宣傳，總受到大批粉絲包圍，有啲經濟許可嘅粉絲，甚至不惜大灑金錢越洋追星。

而家，好多國家都實施隔離限制，一則活動已經少舉辦，二則出入境唔再咁方便自由，粉絲們變相只能專注自家出品，如稍為有突出表現嘅偶像喺呢個時候就會跑出，食正條水。

時也命也，好多事都要天時地利人和配合，好似雙ror，恁地當中有其貎不揚者，一樣受歡迎，真乃時勢造英雄也。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

734^#

發表於 21-5-20 17:19 |只看該作者

每隔二三日，當家放工返屋企，口罩都未除，就開始抱怨公司同事嘅不是，來來去去都係嗰啲問題，聽到我有時都覺得厭。

通常我只做聽眾，好少加把口，始終我唔喺現場，誰是誰非好難下定論。（可能佢想我幫親不幫理，點知我就懶正義，唔知有冇令佢失望呢。）

有時忍唔住，我都會加一兩句意見，不過正如上面所講，我係以第三者立場出發，所以好多時都覺得係佢庸人之擾。

例如佢已經忙到死，某同事依然畀嘢佢做，做唔係問題，衰在仲要催，最嬲就係明明佢可以自己做卻假手於人，寧願不斷催硬係唔肯落手落腳。

另外一個係，公司規定到時到候要畀資料佢，但每次三催四請都未有，其他人一早交咗資料，唯獨是呢位仁兄成日掛住上網，累佢要等齊資料而遲收工。

明明全世界都睇到呢兩個人嘅問題，卻冇人解決佢哋，形成佢哋依然故我。

我同當家講：假如工作上要同佢哋合作都冇辦法，咪按本子辦事囉，好似第一個，如果你自己都唔得閒，佢啲嘢又趕，叫佢自己做囉，唔肯做就要等，到時上頭問到，你就照直講，佢理虧啫嘛。至於第二個，既然佢習慣例遲，你唯有等，好在幾個同事輪流畀資料，個個準時得佢遲，咁輪到佢時咪忍吓囉，捱過咗佢之後又係一條好漢。

我講得容易，當家卻難做到，依然不時吐苦水，呻嚟呻去三幅被，有時不勝其煩，我就同佢講：每間公司總有一兩個變態同事，你改變唔到佢哋，你只能揀做定唔做。

意思即係隨時可以拍枱走人，唔駛難為自己，可是佢又話唔捨得其他好同事。

所以時至今日，仍舊聽到佢碎碎唸兩位變態同事嘅惡行，我一如既往，只聽不回應。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

735^#

發表於 21-5-23 16:44 |只看該作者

雖然我怕凍唔怕熱，可是呢幾日日日酷熱警告，我都熱到頂唔順。

因為實在太熱，原本夜晚瞓覺，開著風扇涼快一陣，再校時間掣自動熄，好多時就會一覺瞓到天光。但呢排真係唔得，當風扇一停就熱醒，再校一個鐘，點知一個鐘頭之後又熱醒，於是只好全晚開天光。

夏日炎炎正好眠，一到午後，周公總係催促我快啲去搵佢傾偈。

瞓到美夢正酣之際，忽然聽到一聲巨響，睡眼惺忪望吓房間四周，冇嘢呀。一般嚟講，如果聲音係來自間房，當家一定第一時間衝入嚟睇吓發生咩事，佢遲遲唔出現，即係聲音來源係佢發出㗎啦。哼！成日趁我午睡時間搞呢搞路擾人清夢，暫時唔理佢，等我瞓醒再同佢算帳。

諗住再同周公猜十五二十，點知又聽到聲音，今次只係好輕微，我又四處檢視一番。。。。。

咦，風扇好似唔郁嘅，望真啲，其中一片風葉好似跌咗落嚟，阻住另兩片運行，因而發生聲響。

我急急熄咗電掣，好驚熄遲半秒，跌下嘅葉片會被另兩片打到，強大衝力連風扇罩都打到飛脫，葉片直飛向我嘅頭。。。。。。（死神來了）

我開門出廳搵當家，佢見到我即刻除低耳筒，（唔怪得聽唔到房間內聲音）問我做乜唔瞓多陣。我話瞓乜鬼吖，風扇冧咗落嚟呀。佢大為緊張入房查看，發現扇葉脫落，第一句就話：頂！早幾日先至掉咗把舊風扇，唔係就可以借屍還魂啦。

雖然係同一牌子，但扇葉未必相容嘅（都掉咗咯，只好安慰自己佢哋唔匹配）。唔知係咪啲嘢壞開有個伴就會一齊壞，定係佢哋日開夜開不勝負苛，前幾日先至換咗廳嘅風扇，今日又輪到睡房。

最搞笑係，上次當家正想坐低嘆杯咖啡吃件餅嘅時候，廳中風扇忽然開唔著，搞到佢急急出門買，咖啡都唔得閒飲。今次係佢飲到一半，諗住一路聽歌一路慢慢㗳埋另一半，點知又被逼要快快飲埋趕出門，真係勞碌命。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

736^#

發表於 21-5-27 12:04 |只看該作者

聽人講打坐可以放鬆心情，對身體有益無害，所以我想嘗試一下，藉此洗滌心靈。

首先，搵當家幫手，睇吓有冇啲大自然聲音提供，等我喺打坐時用嚟做背景音樂，仿如置身世外桃源，就好似世外高人，恁地周遭發生咩事都置若罔聞，身心皆投入打坐冥想中。

當家平時聽埋唔少音樂，好快就畀到一批大自然音效檔案，仲幫我放入手機內，果然好效率。

佢叫我先聽吓，睇吓啱唔啱心水，其實大自然來去都係水流聲蟲鳴鳥叫聲，根本唔駛試聽，不過佢叫到就即管聽吓，費事話我唔在意。

戴上耳筒按播放鍵。。。。。。嘩！第一嘢就嚟行雷閃電狂風暴雨聲，震到耳膜差啲穿。

我除下耳筒問佢：呢啲點用嚟打坐呀？嚇都嚇死啦，仲話想心境平靜？心停就平靜嘞。

佢話後面仲有好多，叫我繼續聽埋落去。

經過千挑萬選，終於揀咗一首大部份時間係浪聲，偶然伴隨一兩聲海鷗叫聲，我就當自己身處海邊聽住潮聲浪聲去又來，幫我入定打坐啦。

通常打坐都要緊閉雙眼，等思想可以集中啲。由於乜都睇唔到，我唔敢揀夜晚，四周圍漆黑一片，總認住有嘢會經過而不時會張開眼巡視。若然心有雜念，打坐就冇意思，所以我揀日光白白嚟進行。

又，通常打坐都要盤起雙腿，左手掌托住右手背放喺腿上，由於筋肉骨全部僵硬，盤起時非常吃力。只好用雙手傍住腿部，否則會好似蟹箝咁慢慢向外移，我雙手嘅作用就好似鹹水草，傍實後先至唔會移動。

一切準備就緒進入打坐狀態，可是啲汗係咁滴，原因係雙手要用力傍住雙腿，而雙腿又要配合雙手盡量唔好郁，雙方各自角力，結果搞到我大汗淋漓。

我諗打坐唔一定要拘泥於是否有盤腿啩，咁樣未免太執着。我索性搵一張櫈仔，腳平放喺地，雙手放膝上，呢個姿勢最放鬆自在。

擾攘咁耐，終於可以正正式式進入打坐程式。

有高人話，只要瞌上雙眼，眼觀鼻鼻觀心，呼吸有序，自然就會進入忘我境界。。。。。

我開始由眼望向心，咁心要望去邊呢？。。。。 Cut ! ！有雜念！ Take Two 再嚟過！

唔望眼心，直接放空整個人，想像自己係海鷗，天空海濶任飛翔。。。。。嗄！啲海鷗飛得耐唔知會唔會攰㗎呢，茫茫大海去邊度搵落腳處唞唞呢？。。。。。。 Cut！！又有雜念！ Take Three 再嚟過！

好嘞，還原基本法，眼望鼻鼻觀心，心觀內在，意念隨住血液向體內每個角落慢慢流淌。流向頭，流向頸，流向心，流向胃。。。。。係喎，今晚食乜餸呢？雪櫃有雞翼，不如鹽焗啦，好耐冇食嘞。。。。。 Cut！！ Cut！！ Cut！！

OK！我宣佈是日打坐失敗！！

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

737^#

發表於 21-6-1 10:33 |只看該作者

偶然會上IG瀏覽有關狗狗嘅帖，當中好多得意視頻與相片，令我呢個曾經係狗奴才嘅人勾起好多回憶。

通常睇完幾個慣常帖，跟住就會漫無目的呢度逛吓嗰度串吓門子。忽然見到一張漫畫，主題係：放進口袋的耳機。畫中係一個類似印度人喺度打坐，雙手雙腳卻撓到亂晒籠。睇埋主題，我諗作者黃生（佢自稱"黃生準備中"，斷估應該姓黃啩？）係想藉圖表達耳筒線放喺袋中，互纏之下撓到黐晒線。

望住幅圖，即時會心微笑，現實中我嘅耳筒線都係纏到解唔開，太有共鳴嘞，所以從不按讚嘅我亦破例畀個讚佢。

每次搭車或行得較遠時都會聽歌，當抽起條耳筒線，我往往眉頭皺。因為每次都係聽到目的地至掹走條線，跟手就放入袋，直到下次用才解，周而復始。

以前我會細心捲起，然後用橡筋紥住，咁下次解開橡筋就用得。但當家話咁樣捲住，耳筒線內藏微細電線會容易折斷，叫我隨意地收起就得。

隨意，即係求其，咁咪乜都唔做順手就放落袋，到下次先再算。

試過幾次，一到站就有車，原本諗住等車時才開始聽歌，只好上到車至聽。由於多人又冇位坐，一時之間未能抽出耳機，直至稍為鬆動，可以聽歌嘞，才抽出一串雞腸（即係耳筒線）。低頭慢慢解呀解之時，又不時要兼顧顛簸車廂而緊握扶手，結果到落車之時，仲未解得晒。

行路又試過，一路行一路解，冇咁難纏好快就聽得。若然纏繞多幾圈難解難分，去到路程一半都仲未聽得。

有時都唔明，就咁放落袋，冇摸冇掂，點解可以撓到咁誇張呢？又一個令我陷入迷思嘅問題。

題外話：好羨慕有啲人嘅畫功如此出色，莊諧皆可。畀着我有咁嘅功力，一定將所思所想透過畫筆表達出嚟。可惜毫無藝術細胞嘅我只識胡亂塗鴉，相信畫完之後過多幾日，連自己都睇唔明畫中意。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

katiebebe

民房

積分: 16

738^#

發表於 21-6-1 19:58 |只看該作者

IamKitty 發表於 17-3-5 17:23
討厭濕度

開抽濕機

私人傳訊回覆引用

cforchat

大宅

積分: 2724

739^#

發表於 21-6-5 12:58 |只看該作者

最近睇咗viutv嘅一個劇集：瑪嘉烈與大衞系列之前度，第一次認識袁澧林，覺得佢好靚好清純，我幾鍾意佢。

故事背景發生喺九十年代末，或者因為係二十年前，無論人與物都好純樸，感覺特別親切。唔似得現今樣樣都追求快速電子化，讓人有點透不過氣，簡簡單單反而更舒服。

喺第26集，瑪嘉烈打電話去電台傾訴，收線後悲從中來默默垂淚。。。。。。我一路睇一路感慨，與我當年某一晚竟然這般相似。

初踏情場，以為此後嘅節日都有着落，點知對方甩底，事前明明講好咗一齊慶祝，當日卻音訊全無。一早抱着興奮心情期待見面，到晚上期待落空，打去佢屋企被告知唔喺度，傳呼佢又唔覆，到底發生咩事？。。。。。。全日裡被牽掛和擔心循環折磨。

到咗半夜才來電，原來與友人結伴到野外聯歡，因為冇訊號，所以收唔到傳呼，返到屋企先至覆到我。

我冇質問點解話同我慶祝又冇咗件事，只係好平靜地同佢有一搭沒一搭地閒聊，隔咗一陣我主動提出收線，因為佢聲音顯得好攰，唔想阻佢休息。

我一個人坐喺廳，四周漆黑一片寂靜無聲，透過金魚缸微弱燈光照射，見到魚兒悠閒自在地游，想起日間坐立不安，思念與盼望互相交織，原來佢卻別有懷抱，我不禁潸然淚下。。。。。

多少時日過去，當日畫面依然歷歷在目。

由於近乎係我嘅寫照，加上當年青春無敵時嘅樣同髮型與瑪嘉烈好相似，所以較偏愛劇中呢段情節，因而翻睇咗好多好多遍。

另外，當瑪嘉烈收線後，電台播放一首歌，或者係配合埋劇情嘅關係，覺得首歌好好聽，旋律優美柔和帶點輕快，一邊聽會一邊嘆喟，若然心有所思甚至可能百感交集淚盈於睫。

第一次聽就好鍾意，可惜唔知咩歌，連歌手係邊個都唔知，只係覺得聲音好熟。

後來幾經搜查，先至知道係張國榮主唱嘅"春夏秋冬"，一首咁好聽嘅歌竟然未聽過，簡直走寶。

"春、夏、秋、冬該很好，你若尚在場。。。。。" 無奈，很多人已不在場了。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

740^#

發表於 21-6-11 12:36 |只看該作者

我懷疑自己患上五十肩。。。。。

雖然有疑問，但並冇打算睇醫生，因為而家醫護們已經忙到一頭煙，既要照料長期病患，又要應付突發事故，更要時刻預備處理染疫個案。。。。。身心俱疲。若非緊急，我點好意思加重佢哋嘅負擔呢。

其實係咪五十肩，我唔多肯定，只係發覺手臂每逢舉到某一角度就痛楚。初初以為無意扭傷，即管搽跌打酒，以往有類似情況，搽幾日已漸漸康復，但係今次搽咗好多日，情況一啲都冇改善，所以就上網查資料，結果得出好大機會係五十肩。

以前嘅工作係文職，雖然好少搬搬抬抬，不過偶然要搬嘅話，我係完全唔錫身，全力以赴，一股蠻力可與男士看齊。

再回看前半生買餸煮飯嘅日子，逢親去街市或超市，總係一抽二袋，經常左手一個大西瓜／大袋生果，右手一包5-8公斤米／同樣重嘅物品，加埋當日餸菜，自己嘅大手袋。。。。。如此架勢，往往令過路途人為之側目。

能有咁嘅氣力，我仲沾沾自喜，覺得自己好有阿信的精神，實幹不矯情，相比起十指不沾陽春水嬌滴滴們嘅同儕們，更顯得自己刻苦耐勞拚勁十足。（以前幼稚先至有咁嘅諗法，近年才發現，不事生產之人，才是好命人。畀我重頭嚟過，我一定事無大小扮柔弱，乜都唔曉唔識唔夠力。）

少時人欺病，老時病欺人，終於殺埋身，幾十年肆無忌憚屢創體能肌肉承受力新高，係時候要還嘞。

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用