本帖最後由 rose-mag 於 21-4-6 17:18 編輯
講個八卦，大概3月23日開始，微博突然有好多帖帶有「楊紫粉絲拒絕歐瑞世紀」話題tag，內容大概係有消息楊紫將會出演新劇《沉香如屑》，該劇根據蘇寞寫嘅一部仙俠小說改編，講一隻千年蓮花精嘅前世今生故事。男主係歐瑞自家演員成毅，楊紫粉覺得楊紫流量及實力兼具，佢值得更好，唔應該再拍呢類仙俠劇，更加唔應該接拍歐瑞嘅劇，列舉之前拍過歐瑞劇被坑，《青雲志》楊紫被認為搶番加戲；《青簪行》同吳亦凡爭番位爭輸，連海報上都靠邊站，另一套歐瑞出品《琉璃》播出時男女主成毅同袁冰妍戲內戲外都落力搞CP宣傳，但劇一播完男主就聯同其他歐瑞演員同女主拆CP，活動上孤立袁冰妍，男女主不但企到離行離辣，全程男主冇同女主傾計，小家到一個點。。。歐瑞亦出名捧男不捧女，長年拍劇都以女角襯托男主。。。於是楊紫粉覺得歐瑞又想借楊紫去捧自家男演員，於是群起出微博抵制歐瑞，原本係要逼楊紫工作室回應，但工作室一直冇澄清。直至4月2日，楊紫工作室、歐瑞世紀同優酷（製作平台）一齊發聲明，宣佈楊紫出演《沉香如屑》，更加話楊紫呢次係救場，因為女主一直未搵到。
呢套劇其實早前話女主定咗景甜，而佢嘅司藤大熱，圈粉無數，令佢身值上升，佢演新劇而男角係成毅的話，景甜一定係一番，定妝照都流咗出嚟，後來話景甜辭演。執二攤傳為白鹿，但白鹿經理人公司好快否認。而劇組消息係景搭好，已經開拍，但未定到女主。。。
事情似乎塵埃落定，但其中一個疑點：點解劇組未定到女主就開拍？咁得意？真係景甜辭演，白鹿唔肯執二攤，於是楊紫"被逼救場"？呢個世代仲有人會逼演員接劇？冇錢收嗎？有片酬的話就唔可以話被逼，而且楊紫有咩咁巴閉，非佢唔得？同齡或同樣級數嘅女演員都為數不少。
冇幾耐成毅粉出嚟爆料，仲晒埋劇組通告，有晒場次時間，女主亦係景甜個名，原來景甜唔係辭演，係有名為救場，實際係搶人角色，更甚係演女二嘅演員葉青戲份被完全刪減，戲份由女一演埋（據說係一人分飾兩角），葉青無端端進組後再被請走，呆喺橫店半個月，唔知有冇曾經拍過戲，更加唔知有冇片酬收，檔期留咗，進咗組，然後返屋企，小演員冇後台，唔會有人關心。而家楊紫唔駛撕番，名為救場，一定係一番，成毅（粉）當然想爭一番，但面對強悍嘅楊紫（粉），應該有難度，楊紫唔鍾意嘅，連宣傳都唔出席，已經有前科，唔係新鮮事。老實講，沉香如屑同香蜜、琉璃、三生三世同類型劇，仙幻愛情輪迴前世今生渡劫已經拍到爛，冇咩新意，再演都係食老本，反而戲外呢D花邊更有新鮮感，有時諗：呢個世界真係冇咩唔得，咁樣搶角色又得，咁樣解話又得，咁樣自圓其說又得，得咗！最難得係之前喺微博上晒熱搜嘅帶有「楊紫粉絲拒絕歐瑞世紀」話題嘅帖全部唔見晒，果然係冇咩唔得。
花旗太太生活在花旗國，留意時差，你問我未必即時答到。
發表於 
返回列表
