自從裝修咗廚房廁所之後，我每日無時無刻都喺度洗洗刷刷抹抹，有時都覺得甚厭倦。
先講廚房，未裝修之前，煮完飯洗完碗，只係係咁意擦拭表面污漬，好快就完事，一啲壓力都冇。
當然，每餐又油又煙，而清潔功夫只草草了事，日子有功，積埋唔少千年油漬污漬。基於冇辦法輕易去漬，自然地就當時運高睇唔到，由得啲漬繼續增厚，順理成章就變為惡性循環，自己睇到唔開胃之時，卻一直提唔起勁去大清除。
尤其有一段時間，當家負責午晚餐，佢連表面清潔都懶得做，煮完餸唔抹爐頭，灶邊沾滿油漬亦冇理，洗完碗碟筷子唔抹乾就放入碗盤內。。。。。。佢所接觸哋地方，充滿污漬。 而我只能偶一為之稍為善後一下，長遠嚟計，我係冇精力去幫佢執手尾。
有時實在睇唔過見，會的起心肝花一日時間去大清洗嗰啲日積月累嘅污漬。 可惜肯的起心肝嘅決心唔係時時有，所以好多時都係隻眼開隻眼閉，眼不見為淨就算。
廁所嘅污漬冇廚房咁難搞，清潔起上嚟較容易，不過都係嗰句，懶起上嚟，只能偶然洗吓擦吓，整體上都係唔算乾淨。
趁裝修之後，舊嘅全部已掉，換上新簇簇設施與用具，我就唔可以再懶，一見到污漬就即時清除，以防又好似之前咁，貪一時閒適，唔理唔理就以後都唔想理。
而家就最好，三餐都係由我負責，成個廚房我玩晒，連本來飯後由當家負責洗碗嘅慣例都豁免，直頭唔駛佢做，我寧願辛苦啲自己做晒，都唔想被佢搞亂檔，所以將廚房列入禁地，唔准佢隨便進入。
當家梗係樂於遵從啦，飯來張口，飯後放下碗筷往沙發一靠就睇電視直至瞓覺，完全十指不沾水喉水，咁嘆，我都想做佢。 （有時我會質疑佢，到底係咪一種陰謀，為咗唔想做而求其做，好等我唔駛佢做，咁就正中下懷，雖然佢矢口否認，但我唔信囉。）
至於廁所，每日都會洗刷馬桶，不過唔知係咪鹹水嘅關係，每隔一段短時日點都會起漬，我就要徒手擦走啲漬，否則日子一耐，明明微漬都變厚漬，到時仲難擦。
而家日抹夜抹的確覺得有啲煩，不過趁污漬仲新鮮易清潔，總好過變頑固才去除，到時好容易又會因難除而搵藉口逃避，跟住就故態復萌。
想要保持窗明几淨，實在要付出好多時間與勞力。
唉，點解呢個塵世有咁多塵㗎呢？
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
