本帖最後由 rose-mag 於 14-4-28 11:14 編輯
嗱，無聊人睇無聊嘢又嚟啦，劇情大反駁開始：
1）講咗好耐亦都好多JM都覺得，殷正豬到冇人有，堂堂大公司總裁，應該身經百戰，而且泡妞無數，冇理由可以俾一個藍蘭咁輕易吊到，如果講多D佢同夢中人一樣樣會好好多，但偏偏輕輕帶過，而且藍蘭真係冇咩驚艷鏡頭，唔覺邊度會令佢咁把持不住，酒吧見個紋身就要追出去，於是殷正成為色中餓鬼，同四爺清心寡慾完全唔同，而且殷正花花公子慣，要佢對一個女人死心塔地，頭十幾集舖排完全唔掂。
2）藍蘭係名模的話，理應會有好多job做，咩解究日日去震天由朝坐到黑？佢講到父母背景咁好，預咗有人查，唔通一間咁大公司唔做背景調查？教授喎歌唱家喎，點會查唔出？國內狗仔隊好利害，佢講自己父母相亡或係孤兒好過啦，要查好容易查到。
3）講到藍蘭咁攻心計咁醒，但佢好多嘢都係得個樣，手提電腦咁緊要嘢唔跟身會放喺公司，仲要係人都入得，呢間公司保安都好唔掂。
4）殷正明知藍蘭呃佢，亦都知佢有心理病，點解唔搵醫生幫佢，莫非佢以為自己嘅愛就搞得掂？明知之前張曉受襲矛頭直指藍蘭，殷正唔做嘢？最少都派個人保護佢，莫非佢覺得藍蘭只係痴線，一個張曉陪下就可以？張曉又唔係三頭六臂，又唔識打又唔係好醒，加上藍蘭根本好憎佢，除非殷正一早就想有人分唔清藍蘭同張曉而誤中副車。明明藍蘭都開口話唔想見到張曉，做咩殷正仲一直叫張曉每日送花去？設計師原來同打雜妹冇分別。
5）殷成貴唔知咩頭咩路，講到佢咁勁咁恐怖，來來去去得一個手下韓青，其他嘢只係得把口，加上佢係傷殘，如果係黑幫大佬之流應該有一大班保鑣至係，背景唔交代多D，好難令人相信藍蘭會咁驚佢喎。
6）大公司（成棟大樓喎）IT同保安都唔得，理應會有firewall，點會咁易俾人hack入去？而且藍蘭部電腦係公司嘅有晒security，要用佢部腦入黑客程式應該係好低機會，佢唔係IT部高層，權限應該唔高至係。
7）由始至終睇唔到殷正做嘢有幾得，只見佢公報私仇，假公濟私，連拍個微電影都好似如臨大敵，呢D細微嘢交俾宣傳部公關部就得啦，駛鬼總裁去做？睇落佢只似一個部門主管多D。
8）殷正個性喜怒無常，又唔得沉著，個心又黑，根本同四爺唔同，反而司瀚做嘢正路好多又冷靜，不過之前俾人吞併Z＆X就太兒戲，一個講到跨國品牌點會咁易死，而且以前一向都係喺歐洲做起，燒咗兩個店面又點會咁易死？我覺得係康震天為咗要個仔返去震天集團幫手，借刀殺人，殷正幫佢做幫死鬼，燒店同換samples都好似唔係殷正出手，一個咁嘅老豆真係要唔要都罷就。
9）張曉同情心過盛，一次又一次俾藍蘭整俾殷正整都仲要中個頭埋去，覺得藍蘭有親切感？真係點睇都唔信，比起若曦，張曉好幼稚，若曦幫人都睇情況，佢係有正義感但唔濫情，幫果D全部都係對過佢好嘅人，或者佢冇睇清楚果D人真面目，但無可否認喺若曦面前，就算係玉檀都唔係衰人。
10）驚情同驚心比較，好似8爺4爺掉換咁，明明八爺害四爺逼到四爺唔爭皇位唔得，而家係殷正處處整司瀚，明白佢覺得所有原本屬於殷家嘅都被康震天霸佔，但冇舖排點解佢咁憎康震天，而康震天似乎對佢唔錯，殷正所作所為只覺得佢小器小家又偏激。
吐糟住咁多先。。。。
花旗太太生活在花旗國，留意時差，你問我未必即時答到。
發表於 
(now我會fast play睇下d畫面)
返回列表
