本帖最後由 cforchat 於 22-4-28 12:19 編輯
最近睇咗"反起跑線聯盟"。。。。。
本來呢啲關於小朋友讀書嘅戲冇乜興趣，畢竟已經脫離行列，可以話事不關己，唔再有共鳴，之所以睇嘅原因，只為梁詠琪。
我唔係佢嘅粉絲，但印象中，佢好似從未喺電視劇集出現過，加上咁耐冇出現喺螢幕（可能有，不過我少睇電視，錯過咗都唔定。），所以都想睇佢演出。
劇集主要想帶出訊息，讓家長們深思，到底想小朋友開心平淡，還是要催谷更上一層樓。
還記得吾兒入幼稚園前，我不時向一啲已經歷過嘅前人請教，應該揀邊間學校。。。。。
有人教要揀師資優良，可以銜接上小學嘅一條龍最好。
有人認為一定要畀多啲功課，咁先至學到嘢，追得上名校進度。
有人話搵近屋企附近，免卻舟車勞頓之苦。
綜合各方意見後，第三位提議最得我心。
自問唔係一個勤力之人，學識亦唔淵博，若然吾兒僥倖入咗名校，肯定被狂谷，到時我就周身唔得閒，一來要為佢四處張羅學呢樣嗰樣，否則怕落後於人； 二來又會自責冇本事親自教，可預見嘅未來應該係暗無天日。
我覺得嚟到世上才兩三年嘅人仔，未睇清事物，就要為明日世界備戰，冇咁嘅必要囉。
無疑，現實的確係殘酷，但何不等佢長大後才親自去體會呢？ 況且，每人際遇唔同，喺起跑線前或後，並唔代表前者一定成功後者一定失敗。
同樣地，幾歲小人兒，仍需充足睡眠時間，假如學校離家遠，就要預多時間喺交通上，要佢睡眼惺忪咁辛苦，我會心疼的。
鎖定幾間喺屋企附近，設施與校舍算中規中矩，跟住再實地視察，又請教吓人，最後就選咗吾兒人生中第一間學堂。
在我嚟講，吾兒喺冇得選擇下被帶來世上，我最大心願係要佢身體健康開心成長，只要佢願意，我全力栽培，若然唔想，我亦唔強逼，一切順其自然。
有進取嘅媽媽一定對我嗤之以鼻 ：唓！小朋友梗係唔識揀啦，所以咪要你幫佢揀囉，你揀咗佢就要做㗎啦。
唉，就係大人們手握控制大權，小朋友咪局住聽從任由擺佈囉，真係有得佢哋揀，你認為佢哋會揀你所揀投你所好嗎？
唔排除有啲父母，頻頻撲撲全為子女未來着想，但當中，難道冇只想為自己臉上貼金？
我都係嗰句，一切以唔難為吾兒為大前提，只要活得自在，就算一事無成又何妨？
咳～ 咳～～ 其實講得白啲，只因我係一個冇大志又懶惰的媽媽。
題外話 ：劇中我最鍾意兩位小朋友，一個係 Billy，另一個係 Martin，前者孝順乖巧，後者古靈精怪。 假如兩個都係我個仔，我會又舒心又開心。
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
