好多年前，與舊同事閒聊，講到關於自動櫃員機功能。
佢話雖然有存現金服務，但始終係人手操作，銀紙冇記認，明明入咗五百，萬一負責嘅職員監守自盗話只入得二百，口同鼻拗，作為入錢一方會好蝕底。 所以就算只存入小量現金，都寧願嘥時間喺櫃位排隊，費事自己嘅小人之心唔放心。
聽佢講完後，自此我一直銘記於心，因而唔敢透過櫃員機入現金。（之前以為櫃員機只係攞錢，唔知可以存錢。）
直至上年，因為得閒，去搵一位做會計嘅朋友飯聚，飯後陪佢到銀行入數。
甫一入銀行，嘩，條人龍打晒蛇餅，正想回頭睇吓朋友是否同我一樣眉頭皺。。。。。。。
只見佢一邊向櫃員機方向行去，一邊徐徐打開公文袋，喺內裡抽出一疊銀紙，然後手勢純熟喺櫃員機按呀按，跟住將全疊銀紙放入機內。
我 ： 吓！？ 咁大膽喺櫃員機入錢？ 你唔驚有職員落格，實際金額與存入金額條數有出入咩？
佢 ： 點會有出入呀？有單有據㗎嘛，我次次都係咁入㗎喎，一直都冇問題。
既然人哋都話冇問題，咁我梗係收聲啦，靜靜企喺一邊睇佢操作。
大鄉里嘅我以為入嘅幣值一定要一樣，但見嗰疊紙幣包含一百、五百 、一千（佢話最低面額需要一百）。 當機器吸入一張之後，螢幕就會出現所吸紙幣面值及總數。。。。。清清楚楚一目了然，睇嚟之前嘅顧慮應該可以一掃而空嘞。
但係過程並唔太順利，因為期間不時會彈出紙幣，朋友就要將嗰張紙幣用手扯直四角，佢解釋可能啲角有皺褶令機器吸唔入，所以要人手加工撫平。
雖然佢已經出盡力整理，不過有幾張依然好頑固，連入幾次都無法被吸入。 鑑於後面有多人輪候，為免霸佔部機太耐，無奈只好放棄。
朋友話好多時都係咁，明明想入8千，結果只入得7千3。 佢問我，呢啲係咪即係實際金額與存入金額條數有出入呢？
哈，我原意唔係咁，不過佢而家嘅情況又確係幾貼切。
早排睇東張報導3萬變3千事件，才令我記起以上。。。。。。
以我福爾摩豬之見，事件非常有可疑 ：
1. 正常嚟講，一般人唔會袋住3萬現金在身，如果係特登㩒機攞錢，點解唔直接轉賬過數。
2. 60張紙幣冇可能可以全數入機，點都會彈至少一兩張出嚟。（嗰位會計朋友極力強調）
3. 如果一早扔咗收據，點解要講大話，仲要煞有介事翻箱倒櫃周圍摷，分明身有屎。
退一步諗，如果櫃員機冇故障、銀行職員冇出錯、咁即係人為。。。。。 （主持都圈出事主收據副本銀碼位置與一般正本收據有偏差）
我唔明，假如有人誓神劈願將3千講到3萬，當紙包唔住火嘅時候，點樣圓謊呢？ （怕且佢會將大話講到底，將責任完全推卸畀銀行。）
難道以為只要報東張，為咗息事寧人，銀行就會乖乖投降補回差額？
我認為銀行一定要徹查呢件事，真係內部問題，就要還事主清白兼道歉，並加以改善漏洞。
若然係事主所為，則有必要公開指責及送官查辦，以杜絕有人仿效，致使再度發生同類事件，影響銀行自身聲譽。
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
