相對呢度嘅JM，我只係初班，我同老公相識好快結婚，因為大家年紀唔細，相識遲但大家理念一致就唔好嘥時間，到而家結婚12年，我從唔會check我老公行踪，亦唔會偷睇佢手機，以前直情佢電話響我都唔會幫佢聽，佢嘅信唔拆，仲比佢鬧我。我老公由我開始陀第大仔時就日日接我放工，每日都有最少一個電話打俾我，有時佢食飯有時間想起D嘢就打俾我講。有時見我好晏都未返到屋企，我老公就會打電話搵我，識過我喺屋企同仔女沖緊涼，聽唔到電話響，老公就打俾外母叫佢過去屋企搵我（我媽同我地住得好近）。
我老公好大男人，其實我都好獨立，不過喺佢面前我會做小女人，喺出面，面子一定俾足佢，但屋企好多嘢老公都靠我，有咩搵唔到都叫我，電腦軟件、網購連點用FB覆PM、新yahoo 個電郵點attach files佢都問我，有嘢想食就叫我煮，有時我都未煮過，佢就上網搵完食譜片叫我跟住煮，我鍾意煮嘢食，我又唔介意有人幫我做白老鼠。。。家庭入面，其實都係互相遷就，冇人係完美，我唔嫌你肥，你就唔好嫌我醜。
結婚最初大家都仲係好好火，有時老公D大男人嘢都惡頂，嘈交都有，試過一次冷戰三日，大家互不揪睬，但真係覺得好無謂，最後大家一人讓一步，互相道歉，之後講好，唔帶怨恨上床瞓覺，有咩問題一定瞓之前傾掂數，而家我地臨瞓前都會拖住手一陣，傾下計先。
我唔信咩御夫術，老公亦冇咩馴妻法，大家係互相扶持，互相做對方後墊，雖然佢成日拿C上身，我最後都會出手喺背後幫佢，老公開心我都開心。唔好話相處之道，我覺得兩個人一齊，目的係1加1有雙倍快樂，唔係互相折騰。只要清楚對方性格，識得點遷就，識得點自我調節，唔好將自己睇得太高，放低身段可以令自己得到更多，到而家為止，我都覺得自己一家好幸福，我地兩個都惜福。
花旗太太生活在花旗國，留意時差，你問我未必即時答到。
發表於 
返回列表
