本帖最後由 rose-mag 於 15-11-11 15:40 編輯
hugoma2015 發表於 15-11-11 06:54 
呢一段，我有幾個補充：
1、我睇返前面，靜妃同長公主講得好清楚有人想用“情絲繞 ”對付郡主，長公主當 ...
1.。尋晚寫時再翻睇（OK，我可以大聲講，到而家為止，每集我最少睇咗8次，初看。。重溫。。截圖。。再睇。。寫文又睇，寫寫下又睇。。）都發現呢個疑點，點解宗主唔講明白D，講有人會用情絲繞，起碼郡主會小心唔飲酒，你講得有道理，可能男女有別唔好意思講咁白，而且當時以宗主身份，同郡主又唔係熟到咩都可以講，而且當時喺大殿，都驚會有人聽到。
2。郡主真係唔覺自己仲有女兒心同溫柔，不竟已經10年帶領穆王府將領征戰，生活喺男人當中，加上以為林殊死後，佢都冇再為另一個人動過心，可能已經唔記得咗自己係女人啦，想落都覺得可憐，就好似夏冬一樣，孀居十二年，對住嘅都係重犯惡人，懸鏡司手段更不容佢有柔軟點。其實郡主同夏冬好似，郡主都好少少，有小王爺要照顧有成個穆王府要佢擔帶，多少可以分散到注意力，夏冬長時間都係一個人，又自小被訓練成心狠手辣，想落佢更慘，不過結局佢就好過郡主，起碼都等到聶鋒返嚟同佢廝守下半生。
3/4。宗主果兩句直情係自己挖坑啦，一時唔記得咗自己應該要用嘅身份，就好似打手咁，開得太多戶口，一時都唔記得未logout又用另一身份講嘢，宗主都好辛苦，表裡不一致，又要記住點應對，好多設定要步步為營至會記得住，越係投入得深，越容易將已有習慣同感情投入去，所以一急一亂就好易露底。我地以前都提過，情絲繞事件之後，宗主應該係好驚，對於郡主太上心，佢夠膽急到連靖王呢隻棋子都押上，如果當時靖王有事就冇後面果49集啦，宗主後怕要送走郡主係好令人理解，只係其實佢都唔捨得，以為之後到景睿生日前都避開郡主就冇事，但點都有D禮數要做，佢新居入伙，郡主有送禮，謝禮唔少得，口頭多謝都要，只係一直都想逃避，後來穆青相邀去睇屋，點知係郡主試探，呢一探都幾傷，帶佢去自己以前舊居，唔好話郡主睹物思人，宗主自己又何嘗唔想入去，但喺門口都已經咁激動，入到去後會點，宗主逼自己講果度係逆犯舊府。。。呢部份後面再講（唉，實在寫得太慢啦，但其實次次打寫加配圖都要成個幾鐘，真係始料不及。。。）
5。宗主係比郡主睇得開，比郡主豁然，我所講耐人尋味就係覺得宗主對郡主有D取笑意味，佢一方面好怕郡主會懷疑佢識穿佢，但又好沉瀝於同郡主一齊種種美好時光，就算係轉達長公主嘅提醒再順便話郡主大意，你冇講錯，以前林殊一定都係以呢種口吻同郡主講嘢，佢一直以保護者態度去對郡主，如果冇梅嶺一役，佢一定會好錫郡主，唔會俾佢受任何傷害，而家宗主做唔到以前果種保護方法，佢以梅長蘇嘅方式去繼續令郡主免被傷害。林殊一向面皮厚，豫津取笑佢，見到郡主尷尬，宗主或者尷尬有20％但開心就有80％啦。豫津唔識死架，如果知道宗主係林殊，佢應該嚇死，好似佢怕夏冬一樣。其實景睿以前鍾意跟住林殊，而家鍾意跟住宗主，人與人相處有D嘢真係好有趣。
** 林殊有智有謀有好才學有高武功，一個近乎完美嘅人，又係皇親國戚，有權有勢，要保護一個郡主佢駕輕就熟，而且當時年輕，處於國盛時期，林家又舉足輕重，穆王府亦為一方郡王，要保護郡主，林殊胸有成竹。其實當時佢同郡主都未算真正經歷過朝堂凶險，可以話係初生之犢不畏苦。經歷了梅嶺之劫，十二年艱苦經營後，宗主同郡主都唔同咗，宗主了解朝堂上人心入面有幾多醜惡、險象環生，佢會怕郡主有事，自己已非當日有權有勢有武功嘅天之驕子，以一介白衣，所持嘅只係無雙之智，但凡係人心都難測，宗主總係想將勝算設定到最多最高，但好多事上佢都要賭，戰勝百里奇後皇帝賞唔賞三個稚子自由身係未知之數，寧國侯府去到最後佢計唔到最後出手壓垮謝玉嘅居然係蒞陽長公主，九安山時譽王居然會敢造反而皇后又肯配合，就算係救衛錚，如果夏江唔心虛，佢就無機可乘。。。呢D宗主自己冒險，佢係有晒心理準備，就算其他人佢都敢賭，一去到牽涉郡主佢就唔敢啦，佢係死都唔會要郡主冒險。。。更覺得宗主嘅愛好大好深，唔係一個普通人可以回應到。
花旗太太生活在花旗國，留意時差，你問我未必即時答到。
雖然我無8次，但是你講到邊，我都將果個片段睇返2、3次，然後再復你噶。（我都覺得自己好認真！
）
發表於 
返回列表
