每次與朋友閒聊, 講到佢工作如何艱辛, 如何要為五斗米折腰, 總會加一句羨慕我可以提早退休唔駛做.
其實有乜好羨慕吖, 除非天意弄人啦, 否則每人嘅生活都可以自行選擇, 睇你點揀啫.
先講日常必須嘅衣食住行.....
衣 : 我鍾意自由配搭, 只要著得舒服就得, 所以大部份都係便宜貨, 平嘅十元八塊, 貴嘅都只係幾十蚊. 朋友就唔同, 鍾意著套裝, 質料又要上乘, 花費自然高. 試過一次同佢食飯, 由於所處嘅地方較凍, 我就喺袋內攞咗件出門總會帶備嘅外套, 而佢二話不說就往隔壁名店買披肩.
食 : 返工嘅日子, 尚且日日趕回家煮飯, 唔駛返工就更加少出外用膳, 除咗偶一為之大魚大肉, 其餘都係以素食為主, 肉類喺每餐只佔少量, 唔係為咗慳而唔食, 只係全家都奉行多菜少肉, 所以每日嘅伙食費, 拉勻唔過一百蚊. 朋友剛與我相反, 早餐在外解決, 午餐到酒樓嘆茶, 晚餐有魚有肉.
住 : 一般住嘅使費都差唔多, 所以冇得比較.
行 : 只要可行, 我多數選擇步行, 一來當健身, 二來省車資. 朋友呢, 遠程就話冇得揀, 局住要搭車, 但係就算車程五分鐘, 只係三四個巴士站嘅距離, 佢一樣會搭車, 雖然每次只係幾蚊, 但係少數怕長計, 呢啲咪又係錢囉.
另外, 一對仔女已經長大成人, 佢依然要請個工人跟出跟入, 除咗照顧仔女, 又可幫佢分擔家務. 淨係工人份糧, 都夠我一個月嘅伙食費.
仲有, 每逢假日, 全家多數外出遊玩, 而每年至少都會出埠旅行一次, 仲未計平日興之所至與朋友或親戚飯聚嘅消費. 當佢置身鬧市人擠人, 我樂於在家遠離繁囂, 當佢置身飯局中美酒住餚談笑風生, 我樂於在家玩煮飯仔.
我嘅生活平淡務實, 佢就多姿多采, 佢戥我覺得悶, 我為佢覺得攰, 佢選擇安逸, 所以請工人, 我選擇親力親為, 所以做到隻積.
正常情況下, 省錢與辛勞, 花錢與他條成正比, 省錢換來沉悶, 花錢換來享樂, 節儉可早點脫離營營役役, 揮霍要繼續為口奔馳..... 孰得孰失, 乃在乎心態, 子非魚焉知魚樂, 要過何種生活, 視乎如何取捨.
春有百花秋有月, 夏有涼風冬有雪, 若無煩事掛心頭, 便是人間好時節.
發表於 
返回列表
