以下文章可能有少少長，但我衷心希望睇到嘅人，會比少少耐性，睇埋落去。
我明白大家可能會覺得依件事越演越烈。
但我想大家都明白點解年輕人會升級行動，我以下講嘅野都假設左你係明白送中有咩唔好嘅。
點解年輕人會多次衝擊呢？係咪真係佢地純粹想衝？定係有其他原因？
6月9，6月12，我唔再講落去，實在太多抗爭嘅日子。
100萬，200萬，政府嘅回應係冇回應。就算應，都係「Hea住你先」。
我真係明點解大家咁唔同意年輕人衝擊。可能係擔心年輕人，都可以係擔心香港，但我想大家諗深一層，佢地升級，源於政府冷處理。
相信你有睇過網上新聞（我指TVB外），有社工指出
前線年輕人已經係決定左要做死士，佢地明白有咩後果，佢地知道佢地要承擔嘅可能會係十年牢獄之苦。但佢地都去做，點解？佢地成班都係年輕人，大學生，有大好前途，點解要為左依件事而擺自己上一個咁高風險嘅位？
因為佢地真係好愛香港。佢地愛香港，所以佢地和平咁表達意見(6月9日)；佢地愛香港，所以當佢地見到高官唔回應，佢地繼續企出黎(6月12以及之後日子）；佢地愛香港，所以當高官不斷冷處理，佢地決定要升級行動，以自己嘅身軀、生命去希望高官回應（7月1日）。
我想同你講嘅係，依班年輕人，比我地任何一個人更愛香港。就好似你愛自己子女，當佢地做左一件好錯嘅事，你擔心同憤怒到打左佢一巴，係咪代表你係十惡不赦？我相信唔係咁架。我相信你打佢，係想打醒佢，係想佢知道你有幾愛佢，幾擔心佢，同希望佢會改。
年輕人就係處於一個咁嘅局面。
我想講一講7月1日。無可否認嘅係，前線行為的確係暴力，大家都有目共睹。但佢地嘅暴力，塗鴉，係好有目的性。佢地破壞立法會外牆嘅野，係因為佢地想入去立法會，希望高官回應。佢地唔會破壞周邊建築，例如中信大廈。如果真係暴徒，真係純發洩，我相信金鐘依家一定面目全非，而唔係只係立法會受到破壞。佢地入到立法會，會呼籲手足唔好破壞圖書館嘅文本，因為佢地知道，個啲僅存一份嘅文件，係記錄住香港嘅歷史，係對香港好重要。佢地愛香港，所以佢地選擇唔破壞。
重申一次，佢地的確係暴力，但佢地真係使用最低限度可以達到目的嘅暴力去攻入立法會。相比之下，警方612使用嘅點都唔會係最低限度。
或者你認為佢地嘅行為同暴徒冇分別。的確，佢地係暴力。但係，我引述有記者講：「當你係新聞見到一大班人戴頭盔，戴口罩，見唔到樣嘅人，可能會覺得佢地好冇人性。但當你意識到，佢地除低口罩嘅時候，可能只係你街邊見到嘅一個學生、只係你食飯時搭枱嘅後生仔、只係你同佢閒聊時會覺得佢好kai嘅香港人，你會發現，其實成班人，都係有血有肉，都係切切實實嘅香港人。」佢地嘅行為可能令你認為係暴徒，但佢地內心，唔係想破壞，只係想進入立法會，希望令高官回應。行為暴力，但佢地絕對唔會係暴徒。
一個月啦，香港依次運動持續左差唔多一個月啦。依班愛香港嘅人都辛苦左一個月，佢地有遊過行，有佔過路，但政府都係唔回應，冷處理，先會令到佢地心灰意冷。如果佢地唔係愛香港，真係會撐咁耐？一個月嘅抗爭，以及依家發生嘅白色恐怖，對於示威者身、心都造成極大嘅壓力。有三位年輕人因而輕生我相信你都知。但唔知你知唔知，噚日有十幾單企圖跳樓嘅個案？可能真係冇乜人知。因為新聞都冇播。可幸嘅係，因為年輕人、示威者認為一個人都不能少，佢地由前日凌晨開始，不斷係街上尋找企圖跳樓嘅人，搵到噚日凌晨，終於搵齊所有企跳嘅人，勸服佢地唔好輕易輕生。
有三人以死相諫，林鄭係7月1日升旗慶祝回歸。我係依到唔係講緊佢作為行政長官應該點，而係佢作為一個有血有肉嘅人，咁嘅行為係咪真係有人性？有記者四問林鄭回應三位死士，林鄭一概唔回應。作為一個行政長官，漠視人民；作為一個佢自稱嘅香港媽媽，冷血不仁；作為一個「人」，泯滅人性。
我想講一講你所講唔理智嘅黃絲。冇錯，有黃絲討論時可能會太激動。但佢地激動嘅原因，唔係因為冇理智，而係實在太嬲，太無力。當政府唔回應200萬人訴求時；當政府冷處理時；當有三位死士輕生時；有唔少香港市民仲認為佢地搞亂香港，認為幾塊玻璃重要過三位生命。佢地會好嬲，好無力，因而語氣過激，我希望你可以體諒佢地。正如都有藍絲語氣過激，我都會體諒。因為我明白，大家雙方都係做自己認為正確嘅事，只係我認為正確嘅事，比對方更正確，所以當對方反對，自然會嬲。
之後點？之後會點，其實唔係我地決定。而係政府決定。佢可以選擇出黎回應，令年輕人達到訴求，運動成功，完結；佢亦可以冷處理，等年輕人繼續依場運動，甚至升級，然後等年輕人受社會大眾責罵、備受壓力，然後再開記招，譴責年輕人，一路循環。依兩個係唯一嘅出路，因為我地唔會放棄，我地一定會爭取到底，就算係比人鬧，都會堅持落去，因為企出黎嘅，都係愛香港嘅香港人。
打左咁耐，其實我核心得一句。佢地升級，因為佢地真係冇得揀；唔認同冇問題，但希望可以理解。我相信你係一個理性嘅人，如果你想繼續討論，我地可以私下討論，我會盡我所能去說服你，你都可以盡你全力說服我。
發表於 
返回列表
