夫婦情感 今日: 0|主題: 42793

誰是主力照顧者唔難証明,之前亞囡無返n班畀本地姨姨，係我朝早送亞囡過去，而佢死堅持要湊埋個囡去佢亞媽度食埋飯先返,我已經好不滿,奈何我無佢符,但返到屋企亞囡都係我湊返，平時放假一定係我主力照顧亞囡，而佢例必唔係屋企，加上亞囡係超級痴我的。

到我捱到亞囡返n班，佢都仲話要畀錢搵佢亞媽隔離屋年紀大的姨姨湊放學，因為搵人湊的費用佢要我畀出來，即又要我每個月出成$6000以上家用畀佢(除咗固定畀6000，另佢每個月借我一千幾百，我再要負責其他雜項亞囡奶粉尿片衫褲鞋襪玩具…)，亞囡間學校有延展，一個鐘都係$13，每日最多只係畀多$13-26(一個月延展費都唔過$500)，我就可以自己湊亞囡放學，對個囡多D時間，可以陪亞囡唱歌講故書，亞囡又可以早D休息。所以我堅持唔畀佢搵人湊由我自己湊返，亞囡所有開支由我直接支付，9月開始我無再過錢佢手(不過佢都借咗我幾百蚊無還)，變咗佢負責屋租$6000，我負責亞囡所有開支(日用品學費校服)同屋企其他開支。

一直我都知佢緊張錢，所以係我呢個做老婆畀家用個老公，到佢月尾問我借錢，或過時過節/亞囡到期交保費問我額外要錢時，試過同佢計過開支，如果大家都係拎等份出來係有個個月有錢淨，問佢D錢去咗邊，佢就將自己D洗費計埋落家用度，但我D洗貴就唔計，佢又話儲起留來有需要時用，到要用我問佢儲D錢去咗邊，又話拎晒投資蝕咗，仲氹我話金價高要溶咗我結婚時啲金器，我堅持要溶只可以溶男家畀的，女家畀的係我留來不時之需(結婚時我爸爸要咗4圍酒，但D人情畀返晒我，我全部畀晒佢儲---佢又係話我不善理財所以要佢保管)，我話由返我管數，佢又唔畀話自已攪惦，身邊朋友同屋企人都叫我唔好再過錢佢手，呢個男人信唔過。

到上星期嘈話要離婚，佢竟然可以怪我要自己湊返自己個囡，話我唔畀佢屋企人湊要自己湊係舖路霸住個囡，如果佢係有重視個囡就唔會日日無11點唔返，唔會所有假期都唔留係我度陪亞囡，佢要湊個囡佢可以唔日日去佢亞媽度的早d返咪可以陪個囡玩。佢湊個囡返佢亞媽度的理據，話畀我休息畀我relax，但我要的係有人陪我閒話家常，交流心事共同照顧亞囡。佢咪話佢晚晚都有同個囡返嚟瞓已經有陪我，我一樣係見到個囡同佢，佢都痴線的，返到嚟都夠鐘瞓啦，咁同陌生人有乜分別，大家都係零交流，咁我搵隻公仔都得啦！又唔會駁咀又有得畀搓圓禁扁。

我從來無阻止佢見佢亞爸亞媽，但係唔係真係要去到日日都返去，去到11、2點先返先，年頭嘈過要離婚，佢答應過我隔日陪我出街食飯(食飯錢我出)，之後又再搵借口話要ot，最後都變返日日返佢亞媽度食。調轉我咁樣返外家都唔得啦！不過我都唔會因為同佢鬥氣搵個囡嚟攪。但佢唔同，佢屋企人衰到話囡囡太祖母生日(10月中後期)，星期日果日一早湊咗亞囡過去，去到12點幾先返，無同亞囡沖涼又唔同佢著外套，亞囡返到屋企又扭又攰，第二日仲要返學，最後亞囡當然係病咗啦！之前我仲諗話晒個女佢都有份，點都會照顧好亞囡，點知唔係囉！我讚個囡乖又唔畀，成日話個囡曳，佢d起床氣超差，試過佢瞓咗，亞囡拍佢，佢推開亞囡係咁鬧佢，攪到亞囡嬲咗佢成個星期，都係我教亞囡唔可以咁對爸爸，要鍚返爸爸，亞囡先同佢好返咋。

我想同佢係和平咁離婚，我想分開咗亞囡都會有爸爸媽媽鍚，只係爸爸媽媽唔一齊住，其實亞囡好習慣佢爸爸長期唔係屋企，爸爸出街囡囡會好開心say goodbye，但如果媽媽出街囡囡會即刻喊住要跟埋去。試過有次亞囡返屋企我係廁所，佢一返到屋見唔到即刻喊到收唔到聲。佢好明白亞囡唔可以無咗我，所以真係好希望佢明白亞囡需要邊個多d。