吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 興趣嗜好› 閒來無事說些事.....

興趣嗜好今日: 3|主題: 124523

收藏本版

回覆發帖

返回列表

跳至頁

樓主: cforchat

[其他] 閒來無事說些事.....

[複製鏈接]

7 8910 11...43

cforchat

大宅

積分: 2724

161^#

發表於 17-5-28 11:16 |只看該作者

本帖最後由 cforchat 於 17-5-29 13:56 編輯

當家嘅前度好靚女 (唉, 明明其貎不揚, 偏偏遇著嘅都係沉魚落雁蔽月羞花之美人, 包括我 ((ok!ok! 講吓啫, 唔駛嘔嘅!)), 令好多男士恨得牙癢癢).

原本我只係喺當家畀我睇以前嘅相簿見到佢前度, 後來當家聽朋友講前度喺一家連鎖店做售貨員, 基於佢講好多前度嘅嘢, 引發我好奇心, 想一睹廬山真面目, 所以情商佢引見.

去到現場, 當家離遠向我指出邊個係前度, 跟住就行咗去第二處. 假如我唔在場, 佢會唔會入去同前度相認寒暄一番呢?

入到店內, 扮到漫無目的行去前度附近, 眼望吓呢樣手摸吓嗰樣, 狀似在研究貨架上嘅物品, 其實眼睛正偷偷望對方.

當佢全神貫注向客人推介貨品, 我就明目張膽望住佢眼都唔眨. 佢比相片中靚, 說話聲線好溫柔, 雙手線條好美..... 唔知係唔係唔覺意露出一副狼相呢, 搞到佢幾次向我投來詢問目光, 令我將眼光急急收回望向別處.

為免引起佢不安同埋懷疑, 反正都見過真人, 於是就離開該店, 與當家會合.

(..... 待續)

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

162^#

發表於 17-5-29 15:35 |只看該作者

當家見到我, 急不及待問我對佢前度印象如何, 我當然讚不絕口啦, 尤其強調語氣非常溫柔. 當家忙不迭認同, 並謂論溫柔程度, 我的確有所不及喎.

駛唔駛咁直接呀老友!..... 雖則係事實.

佢侃侃而談, 話自己一向眼光獨到, 所以揀親都係有番咁上下姿色..... 弊在我同佢前度嘅眼光都奇差呢, 唉!!!!!

當家與前度算係兩小無猜, 細細個就認識, 正式拍拖只得幾年, 最終難逃初戀多數沒結果嘅定律而分手收場. 我問當家仲有冇掛住對方, 佢話冇喎, 始終都過咗咁多年, 咩都唔記得晒.

其實我都問得多餘, 就算仲掛住, 打死都唔認啦, 未死過咩. 不過從佢談話中眼神閃着光彩, 相信佢哋那些年所經歷過嘅青蔥歲月, 任時光飛逝, 一樣無減當中甜蜜回憶.

過咗一段日子, 三人行入咗一間連鎖店逛, 當家與吾兒睇佢哋有興趣嘅商品, 我就行另一邊睇嘢. 未幾, 耳邊傳來當家與人打招呼嘅聲音, 我回頭望想睇吓遇到邊個熟人, 原來係佢前度.

咦! 乜佢轉咗嚟呢間咩?

一對前戀人難得相逢, 我冇理由趨前咁唔識做㗎嘛, 於是繼續睇嘢, 冇理到佢哋. 不過由於距離唔係好遠, 個場又幾靜, 所以隱約都聽到佢哋談話, 兩把聲音顯得尷尷尬尬......

當家 : 喺度做呀?
前度 : 係呀!..... 你個仔呀?
當家 : 係呀!
前度 : 好靚仔喎!
當家 : 係呀! 靚女生靚仔吖嘛!

哈哈, 聽當家最後嗰句, 我忍唔住笑咗出嚟, 識佢咁耐, 總算會講一句人話.

雖然明知佢哋已經傾完, 不過我都冇回頭, 心諗如果當家唔出聲, 我亦唔會過問, 反正又冇乜大不了嘅事.

繼續埋頭揀物品, 直至當家走過嚟會合, 向我告知剛剛遇到前度, 我哦一聲就算, 冇任何反應, 跟住就一齊步出店外去搵嘢食.

餐中, 當家又口若懸河講前度嘅點滴, 講到最後, 佢對吾兒講 : 阿仔, 頭先嗰個
姨姨, 玩吓手係你媽咪嚟㗎!

我差啲噴飯, 有冇常識㗎? 忍唔住插口 : 你都傻嘅, 假如你同佢所生嘅, 就唔係呢個仔啦.

佢以笑遮醜 : 係喎係喎!

往後日子, 我又一次獨自喺另一地區連鎖店遇上佢前度. 點解成日都轉場嘅, 唔通佢哋要不時被調去唔同區域.

今次我冇再如第一次般望到實一實, 只係隨意地望咗兩眼就離開, 畢竟同佢互不相識, 只係當家嘅關係令我知道有呢個人存在, 而又咁啱有過幾面之緣, 此後就算再遇見, 亦只會視為一位過客.

(完)

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

163^#

發表於 17-5-30 22:18 |只看該作者

我同胡渭康都幾有緣, 以前佢喺小虎隊時, 三不五時總會喺一啲場合遇見佢.

最近一次, 見佢入咗一間藥房, 冇幾耐之後就拎住大包細包步出, 然後喺街邊等的士.

期間除咗我, 好似冇乜人留意到佢.

當佢召來的士坐上車廂內, 耳機傳來我最鍾意佢嘅一首歌"心內語", 巧合得實在得人驚.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

YURICKY

公爵府

積分: 28523

畀面勳章

164^#

發表於 17-5-30 22:36 |只看該作者

回覆樓主:

今日買兩斤菜心，阿姐見有少少剩俾晒我，夠食四餐

私人傳訊回覆引用

jojodic

大宅

積分: 3899

165^#

發表於 17-5-30 23:18 |只看該作者

YURICKY 發表於 17-5-30 22:36
今日買兩斤菜心，阿姐見有少少剩俾晒我，夠食四餐

http://hk.myblog.yahoo.com/stickytoffee09

私人傳訊回覆引用

cforchat

大宅

積分: 2724

166^#

發表於 17-5-31 12:10 |只看該作者

回覆 YURICKY 的帖子

臨收檔至幫襯, 好多時檔主都會賣大包, 與其賣唔晒都係扔, 不如益街坊.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

167^#

發表於 17-5-31 13:08 |只看該作者

去街市途中, 前面有一個女人, 從後望, 長髮及腰, 身材高佻, 身穿一件頭大露背兼超貼身迷你短裙, 腳踏四吋高踭鞋, 將玲瓏浮突身形表露無遺.

不過唔知佢嫌條裙太短定係覺得膊頭太露, 行兩步就拉低條裙, 再行兩步又拉高膊位, 想點呢佢?

如果介意暴露, 就唔應該咁樣著, 著得就預畀人望, 唔係點叫迷你呀? 又要怕又要著, 好唔大方囉.

本來想超前望吓佢靚唔靚, 不過見佢拉高拉低嘅動作, 就算樣靚身材正又點吖, 舉止都唔優雅, 嘥料!!

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

靚b又靚媽

大宅

積分: 3862

168^#

發表於 17-5-31 13:11 |只看該作者

依排真係好濕

私人傳訊回覆引用

cforchat

大宅

積分: 2724

169^#

發表於 17-6-1 16:26 |只看該作者

巴士埋站, 上晒客閂咗門準備開車, 車前有乘客正狂奔並揮手示意司機等埋, 有啲司機好好人, 會重開車門讓來者上車, 有啲則擰歪面當睇唔到, 照閂門扭軚將車駛出, 只係差嗰一二秒就送車尾, 真係唔抵.

其實巴士唔似小巴, 走多一轉就賺多一轉錢, 所以如見到乘客氣喘吁吁趕過來, 如仍在站頭, 等埋都無妨. 當然, 要視乎嗰個乘客是否有誠意想上車啦, 好似我見過一位師奶, 見到架車已上晒客, 佢嘅人已經喺巴士車身範圍內, 只要稍為急行多兩三步, 肯定上到車. 但佢就慢條斯理好整以暇, 完全冇追車嘅意圖, 只係揚一揚手中嘅八達通咭, 就以為司機一定會等埋佢. 我心諗, 你估你張八達通係隨意通, 可隨你鍾意點就點咩, 好明顯司機都頂佢唔順, 未等佢埋嚟就開車絕塵而去.

大部份巴士司機都好友善, 會予乘客方便, 有時見到啲乘客趕上車, 都會親切地講小心啲唔駛急, 又或者見到啲老人家或傷殘人士, 都會等佢哋上咗車安頓好後至開車. 作為乘客, 人哋咁好等埋你, 上到車一定要記得向司機道謝, 話晒等埋你唔係必然嘛.

有好司機, 亦一樣有心地唔好嘅司機, 好在只係佔好少部份. 呢啲司機, 我懷疑佢哋有玩弄乘客嘅傾向, 例如明明見到乘客仲有一兩步就追到, 甚至已經去到車門邊苦苦拍門, 明明前面有車阻塞未開得車, 佢都要將車頭扭出少許, 意思即係代表開咗車唔上客, 可憐嗰啲乘客, 辛辛苦苦跑一場都係上唔到, 又要等下一班.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

170^#

發表於 17-6-2 14:39 |只看該作者

初初出嚟做嘢嘅時候, 好鍾意去旺中逛, 一星期最少行一次, 有時見到啱但又怕一時衝動, 會返屋企再考慮清楚, 如果仲係念念不忘, 就會喺第二日專程再去.

而呢啲情況係十次會發生九次, 所以有時瘋狂起上嚟, 連放飯時間都不惜搭的士出去買, 慌死買遲咗會蝕底.

但係呢, 又有好多時幾經考慮之後買咗返嚟, 先至發覺原來都唔係太適合, 結果母親就多咗好多抹地布.

扯得太遠㖭, 講返旺中, 呢幾年來, 已經好少再喺嗰處買到心頭好, 唔係款式唔啱就係價錢太貴, 所以多數得個行, 好少可令我掏腰包.

之前嘅旺中只有一棟, 後來打通埋隔離嗰棟, 多咗好多嘢睇. 如果要比較, 舊翼較大眾化, 不過就殘舊咗少少. 新翼啲舖位話晒企理整潔啲, 但價錢相對亦貴啲.

講起新翼, 有一家店舖嘅老闆娘勁寸, 其實佢本身個樣唔差, 年紀又唔係大, 唔知點解總係以一副晚娘臉待客. 作為消費者, 買之前好自然會摸吓件衫嘅質地或攞件衫出嚟拼上身度吓, 況且你擺得出嚟又冇膠袋套住又冇寫住唔准摸, 摸吓都好正常啫, 又唔係驗屍咁驗, 假如覺得唔啱放低走人, 佢就會一路碎碎唸三字經, 直至你行遠聽唔到為止.

所以每次行過佢檔口都唔敢停留, 除非價錢與款式有八成啱自己心水至會上前睇睇, 又或者趁佢正在招呼其他客人唔得閒理我, 否則只會遠觀不會近看.

為存厚道, 我係唔會話畀人聽佢喺新翼頂樓, 而且店面掛滿晒手寫嘅清貨紙條.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

171^#

發表於 17-6-3 16:57 |只看該作者

當家一踏入家門, 就到廚房搵我, 見佢面容扭曲狀甚痛苦, 未等我開口, 佢已經話做嘢扭親條腰骨, 而家挺唔直, 好痛.

我叫佢沖完涼去搽跌打酒, 冇好轉就要去睇醫生, 佢冇回應, 逕自去梳化休息.

一夜無話.

翌日我問佢搽咗跌打酒有冇好轉, 佢話冇搽到, 我問係唔係觸手唔到, 不如我幫你搽啦, 佢話唔駛, 瞓咗一晚已經好好多.

當晚佢返來我又問佢條腰仲痛唔痛, 佢話少少, 我話不如幫你搽跌打酒啦, 快啲減輕痛楚嘛, 佢死都話唔駛, 強調要讓自身嘅修復機制發揮功能.

我話收皮機制就有你份, 一把年紀仲喺度逞強, 唔搽罷就, 你唔好同我講痛就得嘞.

都唔明點解愈老愈硬頸, 算! 一於又當自己死嘅, 費事理佢咁多, 等攞家用嘅時候先至復活.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

172^#

發表於 17-6-4 13:42 |只看該作者

張立基嘅兩首歌都好好聽, 就係"你好嗎"同埋"夜消沉".

每次用耳筒聽"夜消沉", 去到接近臨尾嗰段嘅背後音樂, 有種好緊湊嘅感覺, 就好似熱煱上嘅螞蟻咁亂竄亂鑽, 效果好特別.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

173^#

發表於 17-6-5 12:04 |只看該作者

本帖最後由 cforchat 於 17-6-7 08:52 編輯

跟youtube一位烹飪高手照辦煮碗學一款用蔬菜汁做嘅蒸餃, 天氣咁熱冇乜胃口, 一於以蒸餃佐粥啦.

明明跟足晒份量炮製, 硬係成唔到糰, 唯有再加多啲粉, 加吓加吓, 幾乎已比食譜所定嘅份量落多咗一倍粉有多, 依然仲係稀流流. 假如再加粉, 豈不是與原有配方相距甚遠, 到時仲係咪餃子皮, 我真係唔敢包.

面對一團濕麵糰, 睇個勢根本包唔到餡, 但係餡料已備, 況且又落咗咁多粉, 呢個時候先至棄掉, 未免太過浪費, 亦唔符合我嘅慳儉原則, 所以要諗一諗點至唔嘥又可以照食.

有諗過將所有材料混合一齊煎, 但又唔想熱氣兼煎到身水身汗. 最後決定用蒸嘅方法, 將粉糰先盛一小半於撻模仔內, 再加入饀料, 然後再放麵糰於面, 咁就變咗圓形嘅餃子三文治.

我以為蒸起後可脫模, 點知好難脫, 唯有用小匙羮盛起嚟食.

當家與吾兒問係乜嘢, 我話係失敗咗嘅蒸餃.

吾兒話唔難食, 冇聲冇息就食晒分配畀佢嘅幾個.

至於當家, 佢試咗一啖之後, 就二話不說將之一啖接一啖放入口, 好快就解決晒幾個. 係咪以為因為太好食嘅關係, 所以佢欲罷不能呢? 正正相反, 佢嘅習慣係難食嗰啲佢就第一時間食晒落肚, 餘下佢認為好食嘅至會留嚟慢慢嘆.

因為真係衰咗, 所以佢咁直接嘅反應, 我並冇怪佢. (但就暗地裡決定唔會畀好日子佢過. 哼! 都唔識好似吾兒咁講吓善意嘅大話, 留低一個做吓道具都唔怕死啦)

我自己都食咗幾個, 其實味道唔係差, 至少狗狗都肯幫襯, 如果難食, 佢已經走得老遠咯.

歸根究底, 我都唔知邊度出咗錯, 莫講話今次失敗唔會再嘗試, 就算成功, 亦冇諗過再安歌. 有啲菜式旨在貪新鮮, 試過一次就夠, 世間仲有咁多美食, 有時間寧願用嚟試其他.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

174^#

發表於 17-6-6 09:22 |只看該作者

本帖最後由 cforchat 於 17-6-6 09:30 編輯

朋友兩公婆由於中年才得女, 所以對阿女百般遷就萬般呵護, 令佢儼如高高在上嘅小公主, 任性妄為不特只, 行事作風亦出人意表.

聽講前一排讀緊小學嘅小公主與一位女同學關係非比尋常, 放學後不時約相見, 就算在家亦日日喺電話中喁喁細語至夜半三更, 成績更一落千丈, 令父母擔心不已. 但礙於一開口只會惹來女兒大發脾氣, 又見暫時冇乜大改變, 只好不動聲息靜觀事態發展.

一日, 忽接工人來電, 小公主反鎖喺洗手間, 叫極冇反應, 撞開後發現佢割腕自殺, 已報警送院救治, 嚇到兩老急急由公司趕去醫院.

經警察查問後, 原來係嗰位要好嘅同學移情別戀, 於是小公主一時睇唔開就做傻事.

事後, 校方除咗口頭勸喻該同學行為要檢點之外, 亦冇再進一步行動, 所以朋友好激氣.

我問佢你想校方點做, 踢佢出校定記佢大過? 雖然話讀書時期唔適合談戀愛, 但男歡女愛嘅嘢..... 啊! 應該係女歡女愛嘅嘢, 邊理到咁多吖, 又唔係犯咗十惡不赦嘅罪, 況且係雙方面㗎嘛, 只係今次你個女鬧出事你至怪對方啫, 假如係對方自殺, 你最多咪為個女向對方家長道歉, 學校要踢你個女出校, 你咪又會覺得只懲罰一方太唔公平.

最終, 朋友為免愛女復課後要再面對嗰位同學會心思思, 所以決定讓女兒退學, 幾經托多方人面, 先至成功轉去佢哋認為校風純樸嘅學校.

朋友仲強調, 日後選中學, 一定要以男女校作為首選, 佢認為純讀女校, 喜歡同性嘅機會相對較高, 萬一因而進化為同性戀, 肯定脫離母女關係.

其實問題癥結所在根本唔關同校有冇異性, 而係當事人本身嘅取向. 我反而覺得身處同性之間, 更渴望接觸異性, 即係所謂讀男校(俗稱和尚寺)嘅和尚仔, 一年等到尾, 都係想盼來聖誕可以開舞會, 藉以邀請並結識女校(俗稱師姑庵)嘅師姑仔啫嘛. 而女生同樣都有咁嘅心態, 期待喺舞會內有男生邀請跳舞. (腦裡不期然諗記"荳芽夢"嘅片段.)

相反, 假如佢本身嘅取向已定型, 就算身處異性當中, 一樣無動於衷.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

175^#

發表於 17-6-7 10:09 |只看該作者

大大個太陽高高掛, 晾衫一定好快乾.

以前要返工, 日頭冇時間洗衫, 所以多數夜晚至洗. 又由於怕天有不測之風雲, 點知會唔會而家猛太陽陣間烏天黑地傾盆大雨㗎, 所以冇人在家可收衫嘅話, 免得過都唔會將啲衫晾出外. 因為實在領教過太多次, 搞到明明已八成乾嘅衣物被雨淋到全濕, 結果又要重頭再洗過.

但係如果全程晾喺室內, 一來阻地方, 二來又難乾, 所以好多時當晚洗完後就會晾出外, 諗住到第二朝出門前至收入嚟, 起碼都叫做吹過吓室外風, 又可令啲衫快啲乾.

不過老人家話夜晚有霧水, 清晨又有露水, 沾上衫再著上身, 對身體唔好喎. 春夏天濕氣較重就話啫, 我諗秋冬天氣乾燥唔怕啩, 況且霧水加露水, 應該唔及風乾咁快速, 所以就照晾如儀.

唉, 可能自己黑仔啦, 以為滿天星星一定好天, 點知十次晾有八次瞓到半夜總會落一兩陣雨, 朦朧中被雨聲驚醒, 即刻跳落床趕收衫, 收完入嚟就停雨. 雖然由醒至將衫收入嘅過程好短, 但係唔排除雨已經落咗一段時間, 所以好多時啲衫已被淋濕大半, 擾攘一番都係濕, 徒勞無功. 微雨仲衰, 連聽都聽唔到, 要第二日收衫至知.

後來我唔再喺晚上晾衫嘞, 除咗以上原因, 最重要係人喺瞓覺嘅時候, 身體所有器官都處於半休息狀態, 血液亦運行得較慢, 假如好似我咁成日一聽到雨聲就急急落床, 一時間令血液加速, 中風嘅機會會好大(尤其是老人家, 醒來唔好即刻彈起身, 要先慢慢活動身體伸展手腳先至落床), 而且除咗我落床, 當家亦會幫手, 即係中風嘅機會又再多一倍, 為咗啲死物影響健康, 實在唔划算.

而家瞓瞓吓聽到雨聲, 身體只會稍稍郁動, 眼睛張開望吓窗外, 腦中會諗落雨呀, 跟住再瞓過. 有時就會惦念狗狗而落床搜尋佢, 不過動作都好緩慢. 而微雨就更加唔知唔覺, 一覺瞓天光.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

luckybaby2011

水晶宮

積分: 72641

176^#

發表於 17-6-7 17:04 |只看該作者

cforchat 發表於 17-6-5 12:04
跟youtube一位烹飪高手照辦煮碗學一款用蔬菜汁做嘅蒸餃, 天氣咁熱冇乜胃口, 一於以蒸餃佐粥啦.

明明跟足晒 ...

你太認真了、皮買就好、無機好難整太薄

私人傳訊回覆引用

cforchat

大宅

積分: 2724

177^#

發表於 17-6-8 10:21 |只看該作者

回覆 luckybaby2011 的帖子

唔係呀, 正常嘅餃子皮我做到㗎, 今次係因為用蔬菜汁先至失敗咋. 唔失敗都得嘅, 不過可能要加好多好多粉至能夠混合成糰囉, 我唔想成個禮拜食蒸餃呀.
薄嘅餃子皮我都可以擀到, 不過可能粉糰唔夠強韌, 滾兩滾就穿, 所以我較為鍾意厚少少嘅皮, 唔易破又有咬感.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

Reminder

禁止訪問

積分: 12736

178^#

發表於 17-6-8 10:27 |只看該作者

提示: 作者被禁止或刪除內容自動屏蔽

私人傳訊回覆引用

cforchat

大宅

積分: 2724

179^#

發表於 17-6-8 11:03 |只看該作者

成日喺公園見到啲大姐做伸展運動, 有幾位嘅筋骨好柔軟, 腳可以踢至頭頂高, 腰可以彎至雙手觸到腳尖, 全程無論上身腰板雙手雙腳係完全挺直冇彎曲.

實不相瞞, 其實我都得㗎, 毫無難度就擘到一字馬, 橫一字或直一字都冇問題, 輕易就做到拱橋, 莫講話彎腰直腳用手碰腳尖係等閒事, 就算彎腰直腳雙手握拳拳頭觸地面都係家常便飯咋......... 當年.

而家?? 唉!!!!!!!!!!!!

經過歲月洗禮, 加上疏於練功筋骨硬化, 致令直1字變7字, 橫一字就變人字. 至於拱橋喇喎, 一早變咗獨木橋啦, 即係瞓到直一直仲要唔對稱得對腳可以拱起頭至臀部嘅位置全程貼住地.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用

cforchat

大宅

積分: 2724

180^#

發表於 17-6-9 10:09 |只看該作者

狗狗雖然外表依然如小伙子般毫無老態, 但有啲表現已經顯示佢係一位老人家了.

以前佢嘅聽覺極度靈敏, 當家人歸家時還在電梯內未踏入家門, 佢已經企喺門後狂搖尾等開門第一時間迎上去. 而家開咗門入埋屋佢有時會無知無覺, 甚至四目交投佢都未及時會意, 要等多陣先記起主人剛回家, 先至識上前相迎. 當然, 如果佢企喺門後等開門, 依然會好熱情撲上嚟又咀嘴又歡喜若狂地跳來跳去, 但呢啲場面只限於全家人一齊返嚟佢至會咁做, 個別人士唔會特別優待. 以前連出去倒完垃圾返入屋, 佢都好似成日未見過咁熱情招待㗎.

以前未落雨佢已經感應到快將下雨而顯得坐立不安(呢個舉動曾經幫過我無數次能及早收衫入屋免被淋濕), 而家要落緊雨佢至有反應, 仲要係大雨㖭, 微雨佢反應唔大, 不過間中都仲會有啲靈敏度嘅.

以前帶佢外出多數佢拖住我行, 扯到我死死吓, 人哋唔知以為我偷佢返嚟, 致使佢急於要扯斷條繩末路狂奔. 而家就我拖住佢行, 因為佢行得好慢, 唔知係攰定係無力氣.

以前佢在床與梳化跳上跳落身手敏捷, 而家間中狗有失腳跳唔上卡在半空, 每次失腳佢都靜止動作傻更更回望我哋, 唔知係求救定係想人唔好睇到佢出醜, 成日畀我哋笑佢唔認老不自量力, 搞笑背後其實更可悲, 已不復當年勇矣.

以前佢好安靜地坐喺度等食, 而家喉際不斷發出刺耳聲音, 往往要叫佢先收聲才有得食, 當然佢並冇聽依舊照發聲. 除咗等食時, 間中都聽到佢嘆息聲, 唔知係唔夠氣定條氣唔順.

以前佢活躍好動周屋走, 而家多數喺度瞓覺.......

有幾個朋友嘅狗狗已相繼離開, 我知道我家狗狗亦難逃此日, 所以我才暫時唔做嘢, 想陪伴佢身邊至終老, 免得獨留佢在家孤伶伶.

春有百花秋有月, 夏有涼風冬有雪, 若無煩事掛心頭, 便是人間好時節.

私人傳訊回覆引用