8點前工作特別醒神 首先你要係老闆
昨日大台一套新聞記錄片主題叫「晨型人」，顧名思義，就係講一早起身嘅人，講緊嘅「早」，係要6點之前，節目中訪問嘅兩位香港人，一位香港媽媽，每朝4:45分就起身，跑步、沖涼、陪仔仔食早餐送返學，然後睇新聞再嘆早餐，返到公司只不過8點，然後開始工作。
另一位男士，同樣5點左右就起身，都係大同小異做下運動，然後開車返工，由於早，所以馬路都無乜車，施施然返到公司先開工。兩位早起人士不約而同咁講，「早起身見到嘅人同事都好好」、「香港好似好有朝氣有希望」等，故事講到呢度，係咪都好似好正面呢？可惜，真相係點？呢兩位早起人士，都係自己公司自己做老闆，係自僱人士。隨即網民就口痕痕話，唔係自己做老闆，點會咁有精神？以下網友分析，你同唔同意？
返工放工時間夠彈性
片中兩個人都話9點前已經返辦公室工作，一早已經處理好當日大部分工作，仲可以偷閒睇半個鐘書，甚至5點已經收工；如果你係打工仔，你會唔會工作時間之前已經返到公司做嘢？仲會唔會喺工作期間睇書？
唔OT先可以早瞓
片中兩位人士都係早早放工，然後成個晚上可以自由自在安排活動，例如湊仔、陪老公打機等天倫樂，然後早早11點就上床瞓覺。反觀打工作，當你7點收工（已經好叻豬架喇），再迫巴士地鐵返到屋企，食完飯沖完涼就已經11點，唔早瞓又可以點早起身？
晨早去早餐會傾生意
二人都話晨雞咁早做嘢，頭腦會清醒啲靈活啲，仲會喺9點返工之前參加「早餐會」，全部都係中小企嘅聚會，大家互相認識，仲可以交流生意。你唔係老闆，會唔會特登去呢？
發表於 
走5甩
.gif)
見到個大太陽但又冇野晾，個心好唔kur
返回列表
