想小朋友朝早同人打招呼，總係無反應；小朋友稍為遇到唔順佢意嘅事，就會責怪他人或者大發脾氣。唔知喺子女成長過程入面，家長有冇遇過呢啲事？
子女嘅禮貌應從小開始培育，但培育呢個重大責任應該落喺家長定學校身上？早前就有調查指出，有逾5成家長認為培育子女禮貌最大責任在於學校而非家庭教育。
但正所謂：養不教，父之過；教不嚴，師之惰。家長同學校其實都有責任教好小朋友，不可能只將責任推卸到其中一方。今次就同大家分享5 個培育禮貌好孩子嘅方法，實行以身作則！
熱門討論區：培育子女禮貌 逾半家長稱責任在學校
更多文章：餐桌上的禮儀 生活中的教養
第一招：以身作則 做個好榜樣
喺小朋友成長過程中，好多時都會由父母、同輩、學校中模仿學習。佢哋會喺日常生活中留意住父母嘅一舉一動，例如父母遇到鄰居會打招呼、出外用膳會向店員講「唔該」、「麻煩哂」。小朋友亦會從中模仿父母行為，學習待人處事。家長教育子女前，要先做個好榜樣供孩子學習！
第二招：適時向孩子解釋
生活中有好多機會可以向子女解釋禮貌嘅行為。例如可以向幫手開門嘅哥哥姐姐講聲唔該，解釋因為哥哥姐姐心地好好，為人著想去開門，向佢哋表示謝意係相當有禮貌嘅行為。調返轉，如果他日子女幫人門開，都會希望得到別人嘅謝意，令佢哋更加識將心比心。
第三招： 營造禮貌環境
家長同小朋友去唔同嘅場所，都有唔同展現禮貌嘅時候。例如去商場廁所，孩子要學識排隊等候嘅道理，絕對唔可以插隊。
更多文章：餐桌上的禮儀 生活中的教養
熱門討論區：培育子女禮貌 逾半家長稱責任在學校
第四招： 給予體驗嘅機會
除咗身教同陪同，家長亦可以向小朋友提供體驗嘅機會，俾佢哋親身感受同學習。例如可以俾小朋友自己向餐廳店員點餐，完成點餐後向店員講聲「唔該哂」。咁有禮貌嘅小朋友，店員一定好開心咁回應或稱讚！又或者遇到鄰居時，可以鼓勵小朋友主動打招呼，都係一個良好嘅體驗機會。
第五招： 以故事形式俾小朋友思考
某啲小朋友可能性格始終怕醜，唔洗急住要小朋友去體驗，可以透過講故事向小朋友講解待人接物嘅態度，從中同小朋友一齊討論情節，給予佢哋想像同思考嘅空間。慢慢建立一套正確觀念後，就可以展現到更禮貌嘅一面。
子女嘅行為舉止都反映咗一個家庭嘅家教，小朋友要學識以禮待人，家長責無旁貸。若果全盤交由學校教導，無父母嘅督導，就唔可能持之以恆。絕對需要三方共同努力去建立！
