「好介意！極介意！非常介意！」正所謂好重要要講三次，Juicy媽睇到呢個Post嘅時候，真係好大反應！先唔好講同住者啱唔啱傾、夾唔夾得嚟，要同老爺住喎？咪即係屋企無啦啦要多個陌生男人？仲要全屋得兩個房，放到老爺又放唔到姐姐？即係大家都無晒私人空間？呀！我真係好亂！處理唔到囉！
對於呢個問題，相信大部份JM都好難接受：「正常女人都唔會想同老爺或奶奶住！」、「叫埋你老公一齊返外家住啦。」，雖然話特別事件特別處理，之但係真係點搞呀？一係放租依家住果度，再出去租間有三個房？最起碼空間大啲拗撬都少啲，加上有咩事，大家都有個房匿埋冷靜下......
至於介意同老爺住是否就意味住唔孝順？Juicy媽就認為兩者係無關，學JM話齋：「唔關孝唔孝順事，係根本唔方便」，當然我都同意老公點都有責任安頓好爸爸囉，但安頓唔係等於要硬食啫，如果真係無能力、無空間，要個老竇瞓廳，難度又好孝順？
講到呢度，我都有諗過，如果將來老伴是旦一個走先，個新抱又拒絕同我一齊住，得返我一個人孤伶伶，咁佢哋係咪都好不孝？其實己所不用，所以又何必將一唔一齊住定義為不孝？相信呢個年代，都無幾多人係為咗養兒防老，仔女大個就有佢哋自己嘅世界！做乜係都要因為你個人需要就晒你先？
講到尾，如果要忽然改變生活習慣，多個一人住喺屋企住，就唔係話唔得、唔可以，只係唔可能答你唔介意囉！
