決定做「全職媽媽」定「在職媽媽」呢個問題，睇落好似好簡單，但現實中，又係唔係人人都可以自由選擇呢？
從計劃生B，到真正成為咗一位媽媽，其實真係幾乎無諗過要做「全職媽媽」，一來都希望家庭經濟狀況可以輕鬆啲，二來，自問都真係唔係打理家庭細務嘅專家，甚至係有啲雞手鴨腳，當然你話有啲嘢都係自己安排，熟能生巧嘛，但係老老實實，有得揀都真係不了。
有人會話，做在職媽媽就要犧牲陪伴仔女嘅時間，仲會錯過仔女嘅成長，但如果咁講，即係大部份爸爸嘅崗位都係要負責錯過仔女成長？咁佢又有冇得揀？莫非要全家一齊黐住24小時先叫好？望到實就一定唔會錯過啦？
回想前排因爲疫症關係，可以留家工作嘅日子，都可以話係半體會到半職媽媽嘅生活；望住姐姐一日嘅工作，事實上，要忙住打理家庭細務，又要照顧住定咩，真係仲有心情同時間感受啲咩成長第幾次？當然相處嘅時光都總唔可以抹殺，好似一齊玩、整下蛋糕，呢啲都係我對眼望住，但又做唔到嘅事，如果係咁，若然個仔高興，自己又想參興，咁放假嘅時間又係咪可以同佢嚟多次呢？
其實有時就係因為知道親子時間有限，所以亦更珍惜彼此相處嘅時光，陪伴小朋友本來就應該重質不重量；講到陪伴，其實全職媽媽嘅一日都不比在職媽媽得閒，所以話錯過與否只在心態，全職媽媽落手落腳係照顧，在職媽媽返工搵錢，都係另一種照顧，兩者間都有利有弊，或者根本都唔存在比較，當然喺平衡工作同家庭嘅時候，在職媽媽有時都會因為偶爾嘅失衡，而產生內疚感，覺得自己花喺仔女身上嘅時間好有限，但其實媽媽有呢番反思，唔係就已經係個好好嘅時機，提醒自己重整比重咩？
更多文章：【Trouble 2 好難搞】我都無體罰，點解你打人？
雖然一開始都講到，做全職定在職媽媽都唔係你鍾意點揀就點揀，但有時候既來之，則安之，若然係局住要做在職媽媽，又日日花時間諗，錯過咗仔女啲乜乜乜第一次，其實都真係好攰咖，與其係咁不如好好享受同仔女相處嘅時光，製造更多屬於你哋獨有嘅第一次啦！
各位在職媽媽，你哋都係了不起！仔女嘅回應就係最好證明，唔好再質疑自己「唔合格」喇！
