一直都覺得依啲參類依啲係補嘅食材，係要冬天先啱用嚟煲湯，但原來花旗參就係除外，因為佢嘅功效就可以滋陰補氣、寧神益智及清熱生津，而且仲係補而不燥，所以都好啱一家大細飲用呀。
我係網上見到依個食譜，將花旗參、沙參、海竹頭、枸杞子加埋一齊煲，可以養陰清熱，潤肺化痰，生津止渴同埋增強免疫力。小小豬都就嚟開學，加上又開始轉天氣，係依個情況下增強免疫力係好重要，所以就跟住煲嚟飲下啦！
材料包括花旗參、沙參、海竹頭、枸杞子各1兩(一兩相等於37.5g)，無花果5粒，及瘦肉約$40
瘦肉洗淨汆水；其他材料就浸洗備用
煲內放約3L水，待滾起時，加入所有材料
然後用大火加蓋煲約15分鐘
再轉慢火加蓋煲多1.5小時
加入鹽調味後就可以飲得啦
其實初頭都好擔心嗰一種花旗參味小小豬係會唔鐘意，唔肯飲個湯(咁就浪費左我一番心血)。好在依隻豬仔都算乖乖，唔算太抗拒依個花旗參味，都肯半合作地飲左一大碗湯啦！
溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
