【補肺養脾】合掌瓜紅蘿蔔猴頭菇素湯

秋天就當然要飲多啲改善秋冬乾燥嘅湯水，係網上見有朋友介紹依個素湯，簡單幾材料就可以煲到益氣又養好脾胃嘅靚湯水就當然要買材料試下煲啦！

合掌瓜可以理氣，對有氣管不適咳嗽多痰非常好；紅蘿蔔可健脾寬中及治咳嗽；而栗子可養胃健脾，更可益氣補腎氣；腰果則能夠健脾補腎及止久渴；猴頭菇含不飽和脂肪酸，能降低血膽固醇和甘油三酯含量，調節血脂，利於血液循環，是心血管患者的理想食品，而且具有提高肌體免疫力功能。(網上資料)

合掌瓜2個、紅蘿蔔1條、猴頭菇1粒、栗子2兩、腰果2兩、無花果3枚~

合掌瓜去核洗乾淨切開~

紅蘿蔔洗淨去皮切件~

猴頭菇浸軟身之後，擠乾水份，然後切開幾塊~

栗子去殼去衣~

腰果及無花果浸洗一陣~

煲內放約2.5L水，然後隨水加入所有材料~

之後轉慢火加蓋煲1.5小時~

合掌瓜同紅蘿蔔湯小小豬一向都鐘意飲，所以基本上我都唔會擔心，依個湯佢都不知幾鐘意，話咁快又KO左成煲湯添。

溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！