今朝早小小豬突然同我講：『MaMi....幾時有菊花茶飲呀？』。難得小小豬主動提出，我當然非常樂意煲俾佢飲啦！所以即刻去買材料，煲好味嘅蘋果菊花茶啦
等我要澄清一下先，其實我都定時有煲涼茶俾我兩位老闆飲呀，不過依排主要都係煲五花茶...夏枯草...依啲黑卒卒嘅涼茶。小小豬就可能因為個顏色影響，雖然都係有飲，不過就唔太願意飲咁啦！
既然佢主動提出，所以都順下佢意，今次用蘋果3個、蜜棗5枚、無花果4粒嚟煲菊花(約十蚊)，甜甜地一定好好飲呀。
首先將蘋果洗淨，記得要係洗蘋果前用刀刮了一圈，刮走面嗰一層果蠟
然後去核及切粗粒
蜜棗及無花果浸洗備用
菊花先用浸半個鐘後，瀝亁備用
先加入約1.5公升凍水，然後加蘋果粒、蜜棗及無花果
待水滾後轉用細火煲40分鐘
最後再加入菊花，要煲多約15分鐘
煲好之後待涼入樽放在雪櫃咁就可以飲得啦
，
哈哈哈...今次用蘋果又蜜棗又無花果，咁又點會唔甜甜呀，小小豬都不知幾鐘意飲，今次完全唔洗我提，轉眼間就飲晒成杯啦
佢兩父子都不知幾鐘意飲，真係提都唔洗提就識得自己去雪櫃拎，真係有史以來最滿意嘅一次。見佢地咁鐘意，等我下次又再煲先得。
