冬天一到，最好就係飲多啲滋潤湯水，有朋友仔介紹左依款潤肺止咳同養陰益氣嘅湯水俾我，當然要即刻煮俾我兩位老闆潤吓啦！
材料包括：雪耳兩朵、紅蘿蔔2條細、鮮百合2個、瘦肉約$50、無花果3粒
紅蘿蔔刨皮洗淨後，切件備用。
雪耳浸透，用剪刀剪去硬蒂，撕成小朵後備用。
無花果浸洗後備用。
鮮百合切去頭尾啡黑色部份，逐塊剝開洗淨。
瘦肉洗淨，然後汆水後備用。
煲內放約3L水，滾起後加入瘦肉、無花果及紅蘿蔔，先用猛火煲半小時。
之後轉用慢火，再加雪耳鮮百合再煲一小時。
最後下鹽調味，可以飲得啦。
呢個湯真係唔錯，飲完之後都覺得成個身體由內潤到外。不過我個人覺得個亮點一定係啲雪耳，因為煲湯雪耳真係好味都不得了呀！
雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！
