早前同姨媽講開有關煲雪梨水嘅事，原來有一種雪梨水係好啱小朋友飲，除左有潤肺作用之後，因為加配陳皮可以化胃氣，咁小朋友飲左就可以對飲食好有幫助。可以有助小朋友飲食好，我當然都即刻學煲俾小小豬飲啦。
材料都係好簡單(當然啦，如果難嘅話我都冇咁大動力去煲啦...哈哈哈)。
將四粒無花果洗淨，然後切半備用。
浸洗一少扎南北杏。
兩片陳皮浸透去囊。
雪梨洗淨後去芯，唔洗去皮，所以要洗乾淨啲呀。
煲內放入約2L凍水，之後將所有材料放入一齊煲。
待煲滾後，改用慢火煲約一小時。
最後熄火焗多半個鐘，咁就可以出味多啲啲。
待涼後就可以入樽，飲得啦。
味道方面比起我之前所煲嗰啲就為淡左少少，但都叫做可以接受，大肥豬話清清地都唔錯哦。不過小小豬就話好好飲，一得閒就話要飲雪梨水，仲一次過飲左兩杯添。
胃口方面，暫時都未見有特別，都係同平時都係一樣啦。不過因為小小豬似我唔多鐘意飲清水，但今次依款雪梨水就比平日飲多左好多，所以都真係唔錯呀！
