香港地其實有好多特別嘅地方，放假唔一定要高消費嘅。
今次我哋就用半日時間去咗港島南區玩，路線：香港仔>鴨脷洲(街渡)> 鴨脷洲兒童遊戲室 > 風之塔公園> 地鐵南港島線 (利東站)
話時話郵輪搭過未? 我哋未搭過
咁去長洲嘅大船搭過未? 我哋搭過
咁街渡(卜卜仔)呢? 和牛B未搭過
今次我哋就來到香港仔海濱公園乘搭街渡(卜卜仔)過海前往鴨脷洲，船費都好平，而且係可以用八達通俾船費，超方便。
船費：成人$2.2, 小童$1.2 (12歲或以下)。
旁邊仲有船可以去珍寶海鮮坊。
啱啱上船和牛B有少少緊張，好快睇到出面有咁多船景睇，佢就變得好開心好興奮。
船程大概5分鐘內，可以感受海風，又可以睇風景感受到漁村風味。
落船後，和牛B好想自己行橋過海，沿路仲見到船家喺到將收穫加工。
一落船步行唔洗5分鐘，就可以到達鴨脷洲體育館 (一樓)。
鴨脷洲體育館 - 兒童遊戲室
遊戲室嘅主題，名為「小魚仙」。面積大概140平方米，每節只限30人進入，而遊戲室嘅走動空間都足夠。設施唔算好多，大概有5組設施，比較適合幼兒及3-6歲小童。
適合幼兒嘅攀架滑梯遊戲組，又上又落，放咗唔少電。
殺人鯨滑梯組
波浪形嘅軟墊跑道，超放電呀!!! 唔知和牛B來回跑咗幾多次，眼都花埋呀
仲有個泳池添~唔落水都可以喺池邊訓練平衡力o架~
場內設有鞋架，進入後必須除鞋及穿上襪子。
地址：香港鴨脷洲洪聖街8號鴨脷洲市政大廈1樓
電話：2554 0832
開放時間：9am - 8pm (2pm - 3pm不開放)
*每節時間50分鐘至1小時
離開兒童遊戲室，附近有一個小寵物互動區(即狗公園)，活動空間唔算好大，但至少都有一個寵物休憩地方。
另外，仲有風之塔公園，入面有一個兒童遊樂場。
兒童遊樂場有組滑梯組
滑梯組都有多組設施玩，有斜台架、樓梯等。
小司機軚盤遊戲組
仲有搖搖青蛙組
公園入面有好多地方，都係影相最佳嘅拍攝場地嚟。
仲有同漁村相關主題嘅大件藝術品可以影相留念。
公園入面嘅設計都好寬敞，走動空間好多，好舒服。
風之塔，可以行斜路/ 樓梯登上觀光台。
公園沿路都係喺海邊，有好多漁船風景。
仲有日晷添，真係好少見呀! 日晷其實係由太陽位置告知每天時間嘅裝置，係中國古代時候嘅鐘嚟。
公園入面仲種有好多唔同品種嘅花，賞花之人可以慢慢欣賞啦。
玩咗幾個鐘，我哋要返九龍啦。
雖然我係百分百香港人，但我都係第一次搭港鐵南港島線 - 無人駕駛列車。
無人駕駛列車之前我哋喺機場搭過，不過就無風景睇嘅。但南港島線部份路段有風景睇，感覺好新鮮，好似打梗機咁呀!!
放假就係要去玩，去玩唔一定要高消費嘅，香港其實仲有好多免費嘅好去處o架。
